महापालिकेच्या रुग्णांना नकार. रेफर रुग्णाला दारात अडवलं... फोर्टिसच्या बेपर्वाईला मनसेची चपराक
ठेकेदाराकडून स्वीकारली ३० हजाराची लाच ‘सिडको’चा कार्यकारी अभियंता रंगेहाथ जेरबंद
नवी मुंबई ः केलेल्या कामाचे बिल मंजूर करण्यासाठी ठेकेदाराकडे दिड लाख रुपयांची लाचेची मागणी करुन त्यापैकी ३० हजाराची लाच स्विकारणाऱ्या ‘सिडको’तील कार्यकारी अभियंता कल्याण पाटील यांना ठाणे लाचलुचपत प्रतिबंधक विभागाच्या पथकाने रंगेहाथ अटक केली. विशेष म्हणजे कल्याण पाटील यांनी पूर्वीची ३ बिले मंजूर करण्यासाठी १ लाख २० हजार रुपये स्विकारले होते.
सदर प्रकरणातील तक्रारदार ठेकेदार विपीन पाटील खारघर येथील कोपरा गावात राहण्यास असून त्याने कळंबोळी ब्रीज, खांदा कॉलनी आणि खारघर रेल्वे स्टेशनची कामे पूर्ण केली होती. या तीन कामांचे ७ लाख ५६ हजार रुपयांचे बिल मंजूर करण्यासाठी कार्यकारी अभियंता कल्याण पाटील यांनी विपीन पाटील यांच्याकडे २ लाख रुपये लाचेची मागणी केली होती. त्यानंतर पाटील यांनी दिड लाख रुपयांची मागणी केली होती. त्यावेळी ठेकेदार विपीन पाटील यांनी कल्याण पाटील यांना १ लाख २० हजार रुपये दिल्यानंतर त्यांचे बिल मंजूर करण्यात आले होते.
त्यानंतर ठेकेदार विपीन पाटील यांनी कळंबोली ब्रीज आणि खारघर रेल्वे स्टेशन येथील ब्रीजची कामे पूर्ण करुन बिल सादर केले होते. यावेळी देखील कल्याण पाटील यांनी मागील तीन बिलाचे बाकी राहिलेले ३० हजार रुपये आणि चालू नवीन तीन बिलांचे दिड लाख रुपये दिल्यानंतरच बिलावर सही करणार असल्याचे सांगितले होते. त्यामुळे ठेकेदार विपीन पाटील यांनी १८ जानेवारी रोजी ठाणे लाचलुचपत प्रतिबंधक विभागाकडे लेखी तक्रार दिली होती. त्यानंतर कल्याण पाटील यांनी मागील बिलातील राहिलेली ३० हजाराची रक्कम घऊन विपीन पाटील यांना सीबीडीतील एमजीएम हॉस्पीटल जवळ बोलावले होते. त्याअगोदरच ठाणे लाचलुचपत प्रतिबंधक विभागाने सदर ठिकाणी सापळा लावला होता.
यावेळी आपल्या चार चाकी कारमधून आलेल्या कल्याण पाटील यांनी ठेकेदार विपीन पाटील यांच्याकडून ३० हजारांची रोख रक्कम स्विकारल्यानंतर लाचलुचपत प्रतिबंधक विभागाने त्यांना रंगेहाथ पकडले. त्यानुसार कल्याण पाटील यांच्या विरोधात सीबीडी पोलीस ठाण्यात गुन्हा दाखल करुन त्यांना अटक करण्यात आली.
