दिवाळीत आनंदाबरोबर सुरक्षितताही जपा ! नॅशनल बर्न्स सेंटरचा नागरिकांना सावधतेचा सल्ला
ज्येष्ठ नागरिक महामंडळ स्थापन करण्याचा महाराष्ट्र शासनाचा निर्णय स्तुत्य
महाराष्ट्रातील ज्येष्ठ नागरिकांच्या धोरणाबाबत मुख्यमंत्र्यांच्या अध्यक्षतेखाली २९ जुलै २०२४ रोजी मंत्रिमंडळाच्या बैठकीत ज्येष्ठ नागरिकांसाठी कल्याणकारी महामंडळाची स्थापना करण्याचा निर्णय घेण्यात आला व शासन निर्णय क्रमांक संकीर्ण - २०२४ / प्र.क्र.१११ /महामंडळे दिनांक १२ सप्टेंबर २०२४ जाहीर करण्यात आला.
सन २०११ च्या जनगणने नुसार साठ वर्षांवरील ज्येष्ठ नागरिकांची महाराष्ट्रातील लोकसंख्या एक कोटी पंचवीस लाख होती.गेल्या तेरा वर्षांत त्यात मोठ्या प्रमाणांत वाढ झाली आहे.
सध्या ज्येष्ठ नागरिकांना अनेक समस्यांना तोंड द्यावे लागत आहे. शासनाने महामंडळातर्फे राबवल्या जाणाऱ्या योजना तळागाळातील ज्येष्ठ नागरीकांपर्यंत पोहोचण्यासाठी प्रत्येक तालुका पातळीवर एक सरकारमान्य ज्येष्ठ नागरिक संस्था स्थापन करावी. सर्व तालुकाअध्यक्षांची मिळून एक जिल्हास्तरीय संस्था व सर्व जिल्हाध्यक्ष मिळून एक राज्यस्तरीय संस्था स्थापन करावी. ज्येष्ठ नागरिक महामंडळाचा अध्यक्ष हा राज्यस्तरीय ज्येष्ठ नागरिक संस्थेचा अध्यक्ष असावा.
तालुका स्तरीय ज्येष्ठ नागरिक संस्थेच्या पदाधिकाऱ्यांची निवड तहसीलदार तसेच जिल्हास्तरीय संस्थेच्या पदाधिकाऱ्यांची निवड जिल्हाधिकाऱ्यांच्या मार्गदर्शनाखाली व्हावी. तालुक्यात राहणारा साठ वर्ष पूर्ण झालेल्या ज्येष्ठ नागरिकांकडून शंभर रुपये नाममात्र शुल्क जमा करून तालुकास्तरीय ज्येष्ठ नागरिक संस्थेचा सभासद व मतदार होऊ शकेल.
दर तीन वर्षांनी संस्थेची निवडणूक होऊन त्यात साठ ते पंचाहत्तर वर्षांपर्यंत असलेल्या ज्येष्ठ नागरिकांना विविध पदावर निवडणूक लढवता येईल. एक व्यक्ती एका पदावर फक्त तीन वर्ष राहू शकेल. वयाची पंचाहत्तर वर्ष पूर्ण झाल्यानंतर त्यास निवृत्त करावे.
शासनाच्या ज्येष्ठ नागरिकांच्या संदर्भातील योजना ज्येष्ठ नागरिक संस्थेतर्फे राबवाव्यात. पूर्वी ज्याप्रमाणे कामगार कल्याण मंडळातर्फे दरवर्षी कामगार साहित्य संमेलन आयोजित केले जात असे. त्याचप्रमाणे ज्येष्ठ नागरिक महामंडळातर्फे दरवर्षी ज्येष्ठ नागरिक साहित्य संमेलन आयोजित करावे.
दरवर्षी तालुका, जिल्हा पातळीवरील ज्येष्ठ नागरिक संस्थांचे कार्य अहवाल मागवून घेऊन उत्तम काम करणाऱ्या संस्थांना सन्मानित करावे.
शासनाने आमदार निधी व खासदार निधी पैकी कमीत कमी दहा टक्के ज्येष्ठ नागरिक संस्थेच्या उपक्रमासाठी खर्च करण्याचे बंधन घातले तर संस्थांना उपक्रम राबवणे शक्य होईल. प्रत्येक तालुक्यात एक ज्येष्ठ नागरिक भवन बांधण्यात यावे.
मुख्यमंत्री, उपमुख्यमंत्री आणि सर्व मंत्रिमंडळाला ज्येष्ठ नागरिक महामंडळ स्थापन केल्याबद्दल धन्यवाद. -दिलीप प्रभाकर गडकरी
