वनविभाग तर्फे कर्नाळा अभयारण्यामधील पक्षी आणि प्राणी यांची गणना
नवी मुंबई : पनवेल परिसरात मोठ्या प्रमाणात सिमेंटचे जंगल उभे राहत आहे. त्यामुळे पनवेलपासून अवघ्या १५ किलोमीटर अंतरावर असलेल्या कर्नाळा अभयारण्य ठिकाणाला वेगळे महत्त्व प्राप्त झाले आहे. लाखो पर्यटक दरवर्षी कर्नाळा अभयारण्यमध्ये येत असतात. सुमारे १२.१५५ चौरस किलोमीटर अंतराच्या परिसरात कर्नाळा अभयारण्य वसले आहे. कर्नाळा अभयारण्य मध्ये स्थानिक तसेच स्थलांतरित मिळून एकूण १४७ प्रजातीचे पक्षी आहेत. यामध्ये ३७ प्रकारचे पक्षी स्थलांतरित पक्षी आहेत. विविध प्रकारच्या हिंस्र प्राण्यांचाही कर्नाळा अभयारण्यामध्ये आहे. या प्राण्यांच्या सध्याची स्थिती माहिती करण्यासाठी वन्यजीव विभागामार्फत विविध महत्वाच्या ठिकाणी यंत्रणा कार्यान्वित करण्यात आली आहे.
सध्याची वातावरणातील परिस्थिती तसेच वाढता उकाडा पाहता, पाणथळ भागावर वनविभाग कर्मचारी लक्ष ठेवून आहेत. याकरिता काही ठिकाणी ट्रॅक कॅमे-यांची देखील मदत घेतली जात आहे.
स्वयंसेवक आणि कर्नाळा अभयारण्य मधील वनविभाग कर्मचारी प्राणी आणि पक्षी गणनेसाठी २४ तास प्राणी आणि पक्षांवर लक्ष ठेवून राहणार आहेत, अशी माहिती 'कर्नाळा अभयारण्य'चे वनपरिक्षेत्र अधिकारी नारायण राठोड यांनी दिली.
कोविड काळात प्राणी आणि पक्षी गणना बंद
मार्च-२०२० पासून सुरु असलेल्या 'कोविड'च्या प्रादुर्भावामुळे गेल्या दोन वर्षांमध्ये कर्नाळा अभयारण्य मधील पक्षी आणि प्राणी यांची गणना होऊ शकली नव्हती. मात्र, 'कोविड'चा प्रादुर्भाव कमी झाल्याने यावर्षी वनविभाग तर्फे कर्नाळा अभयारण्य मधील पक्षी आणि प्राणी यांची गणना करण्याचे काम हाती घेण्यात आले आहे, नारायण राठोड यांनी सांगितले.
