आदिवासी पाड्यात ग्रामस्थांचा मालमता कर रद्द करा - युवासेनेची मागणी
खारघर : खारघर परिसरात असलेल्या आदिवासी पाड्यात ग्रामस्थांना पालिकेकडून भरमसाठ मालमत्ता कर लावण्यात लावण्यात आले आहे. सदर ग्रामस्थ मोलमजुरी करून उदरनिर्वाह करीत आहे. त्यामुळे पालिकेने पाड्यातील ग्रामस्थांचे मालमत्ता कर रद्द करण्यात यावे मागणी युवा सेनेच्या शिष्ठमंडळाने पालिका आयुक्त गणेश देशमुख यांची भेट घेवून केली. या शिष्ठमंडळात युवासेना उपजिल्हा अधिकारी अवचित राऊत, खारघर शहर संघटक अनिल पाटील, पनवेल उपतालुका संघटक शंकर ठाकूर, खारघर विभाग संघटक रामचंद्र देवरे, विभाग प्रमुख उत्तम मोर्बेकर, युवासेना पनवेल उपतालुका अधिकारी अनिकेत पाटील, खारघर विभाग अधिकारी प्रेम ठाकूर, युवासैनिक रोशन पाटील तसेच आदिवासी पाड्यातील ग्रामस्थ उपस्थित होते.
पनवेल पालिका अस्तित्वात येण्यापूर्वी खारघर आणि ओवे ग्रामपंचायत हद्दीतील बेलपाडा वाडी, फणसवाडी, चाफेवाडी, हेदोरवाडी, धामोळापाडा, कातकरीपाडा आदी आदिवासी पाडे आहेत. सदर पाड्यात ग्रामपंचायत अस्तित्वात असताना, दोनशे ते अडीचशे रुपये मालमत्ता कर आकारला जात असे, मात्र पालिका अस्तित्वात आल्यानंतर पालिकेने वीस ते पन्नास हजार मालमत्ता कर आकारल्याने ग्रामस्थांमध्ये भीतीचे वातावरण पसरले आहे. सदर ग्रामस्थ हे परिसरात मोलमजुरी करून कुटुंबाचा उदरनिर्वाह करीत आहे. त्यांच्याकडे उत्पादनाचे कोणतेही साधन नाही. त्यामुळे पालिकेने सदर पाड्यातील ग्रामस्थांना नाममात्र मालमत्ता कर आकारणी करावे अथवा रद्द करण्यात यावे अशी मागणी शिष्टमंडळाने पालिका आयुक्तकडे केली आहे. या भेटी दरम्यान पाड्यातील ग्रामस्थांनी पहिल्यांदाच आयुक्तांची भेट घेतल्याचे समजले.
