सिडको'मध्ये ‘व्यवसाय सुलभता कक्ष' सुरु
नवी मुंबई ः सिडको भवन येथे स्थापन करण्यात आलेल्या ‘व्यवसाय सुलभता कक्ष'चे उद्घाटन ‘सिडको'चे उपाध्यक्ष तथा व्यवस्थापकीय संचालक डॉ. संजय मुखर्जी यांच्या शुभहस्ते २० ऑवटोबर रोजी संपन्न झाले. याप्रसंगी ‘सिडको'चे सह-व्यवस्थापकीय संचालक अश्विन मुद्गल, सह-व्यवस्थापकीय संचालक डॉ. कैलास शिंदे, पोलीस उपमहानिरीक्षक तथा मुख्य दक्षता अधिकारी शशिकांत महावरकर, विभागप्रमुख, ‘एमसीएचआय-रायगड'चे अध्यक्ष मधु पाटील, आणि ‘सिडको'चे अधिकारी-कर्मचारी उपस्थित होते.
मुख्यमंत्री एकनाथ शिंदे यांच्या मार्गदर्शनाखाली ‘व्यवसाय सुलभता कक्ष'ची स्थापना करण्यात आली आहे. मुख्यमंत्री शिंदे यांनी बांधकाम क्षेत्राच्या उन्नतीसाठी व्यवसाय सुलभता कक्ष स्थापन करण्यासाठी पुढाकार घेण्याची घोषणा केली होती. आपल्या बहुतांशी सेवा ऑनलाईन माध्यमाद्वारे उपलब्ध करुन दिल्यानंतर, ई-प्रशासनाच्या दिशेने ‘सिडको'ने टाकलेले सदर आणखी एक क्रांतिकारी पाऊल आहे.
या एकाच पोर्टलवर अर्ज सादरीकरण, अर्जांचे मुल्यमापन आणि अर्जांचा निपटारा होणार आहे. सदर सेवा अधिक पारदर्शक आणि प्रतिसादात्मक पध्दतीने पुरविणे, नागरिक आणि शासन यांच्यातील सुसंवाद वाढवणे, २४ X ७ तत्त्वावर सेवा पुरविणे ‘सिडको'च्या व्यवसाय सुलभतेची उद्दिष्टे आहेत. सध्या व्यवसाय सुलभता पोर्टल अंतर्गत वसाहत सेवा (६४ दुय्यम सेवा), बांधकाम परवाना सेवा (४ दुय्यम सेवा), अभियांत्रिकी सेवा (३ दुय्यम सेवा), सर्वसाधारण सेवा (४ दुय्यम सेवा) आणि नैना प्रकल्प संदर्भातील सेवा (४ दुय्यम सेवा) उपलब्ध करुन दिल्या आहेत. तसेच सदर पोर्टलवर नागरिकांना त्यांनी केलेल्या अर्जाची स्थिती आणि संबंधित विभागाकडून सेवा मिळण्यासाठी लागणारा कालावधीही जाणून घेता येणार आहे. विविध भाषांमध्ये उपलब्ध करून देण्यात येणाऱ्या क्यूआर कोडद्वारे व्यवसाय वापरकर्त्यांना आवश्यक ती कागदपत्रे आणि निपटाऱ्यासाठी लागणारा आवश्यक वेळ यांबाबतची अद्ययावत माहितीही सदर पोर्टलद्वारे मिळू शकणार आहे.
नागरिकांना ैैै.म्ग्म्दग्ह्ग्ी.म्दस्/ाद्ं पोर्टलची माहिती करुन देण्याच्या उद्देशाने सिडको भवनमध्ये नागरिक सुविधा केंद्रही (सीएफसी) स्थापन करण्यात आले आहे. अशाच प्रकारची सुविधा ‘सिडको'च्या सर्व विभागीय कार्यालयांमध्येही लवकरच उपलब्ध होणार आहे. व्यवसाय सुलभता पोर्टलमुळे ‘सिडको'च्या सेवांचे सुलभीकरण, सुसूत्रीकरण आणि डिजीटलायजेशन होऊन सर्वसामान्य नागरिक, गुंतवणुकदार, बांधकाम व्यावसायिक, विकासक अशा विविध घटकांना अधिक जलद, पारदर्शक आणि कार्यक्षम सेवा मिळणार आहे. तसेच यामुळे नवी मुंबईच्या आंतरराष्ट्रीय दर्जाचे शहर या लौकिकात भर पडणार आहे. -डॉ.संजय मुखर्जी, उपाध्यक्ष तथा व्यवस्थापकीय संचालक, सिडको.
‘सिडको'ने ई-प्रशासनाचे उद्दिष्ट साध्य करण्यासाठी मालमत्ता हस्तांतरण, बांधकाम परवाना, वसाहत सेवा आदि सेवा यापूर्वीच ऑनलाईन माध्यमाद्वारे उपलब्ध करुन दिल्या आहेत. यामुळे नवी मुंबईतील नागरिकांना केवळ एका क्लिकद्वारे ‘सिडको'शी संबंधित सेवांचा लाभ घरबसल्या घेणे शक्य झाले आहे. परंतु, सदर सर्व सेवा एकाच ठिकाणी ‘एक खिडकी निपटारा' (सिंगल विंडो क्लिअरन्स) पध्दतीने उपलब्ध करुन देण्यासाठी ‘सिडको'तर्फे व्यवसाय सुलभता (ईज ऑफ डुइंग बिझनेस) पोर्टलची निर्मिती करण्यात आली आहे.
