‘मंत्रालय विधीमंडळ वार्ताहर संघ'च्या अध्यक्षपदी प्रमोद डोईफोडे यांची तर कार्यवाह पदी प्रविण पुरो यांची निवड
‘मंत्रालय विधीमंडळ वार्ताहर संघ'ची द्वैवार्षिक निवडणूक संपन्न
मुंबई ः ‘मंत्रालय विधीमंडळ वार्ताहर संघ'च्या अध्यक्षपदी प्रमोद डोईफोडे यांची तर कार्यवाह पदी प्रविण पुरो यांची निवड झाली. कार्यकारिणी सदस्यपदी जळगाव येथील दैनिक लोकशाही चे कार्यकारी संपादक कमलाकर वाणी यांची निवड झाली. ‘मंत्रालय विधीमंडळ वार्ताहर संघ'ची द्वैवार्षिक निवडणूक प्रक्रिया ३० जानेवारी रोजी पार पडली. दिवसभर मतदान झाल्यानंतर सायंकाळी मतमोजणी झाली. निवडणूक निर्णय अधिकारी म्हणून राजन पारकर यांनी काम पाहिले. त्यानुसार ‘मंत्रालय विधीमंडळ वार्ताहर संघ'च्या अध्यक्षपदाच्या निवडणुकीत प्रमोद डोईफोडे यांना सर्वाधिक ७८ मते मिळून ते विजयी झाले. त्यांचे प्रतिस्पर्धी राजा आदाटे यांना ४९ तर दिलीप जाधव यांना २८ मते मिळाली.
‘मंत्रालय विधीमंडळ वार्ताहर संघ'च्या कार्यवाह पदासाठी ज्येष्ठ पत्रकार तथा दैनिक ‘आपलं नवे शहर'चे स्तंभलेखक प्रवीण पुरो यांना ८५ तर मिलिंद लिमये यांना ७१ मते मिळाली. उपाध्यक्ष पदाच्या निवडणुकीत ५८ मते घेऊन
महेश पवार विजयी झाले. पांडुरंग मस्के यांना ४१, राजेंद्र थोरात यांना ३० तर नेहा पुरव यांना २९ मते मिळाली. कोषाध्यक्षपदी ६७ मतांसह विनोद यादव विजयी झाले. त्यांच्या विरोधात प्रवीण राऊत यांना ५०, तर किशोर आपटे यांना ३६ मते मिळाली. कार्यकारिणी सदस्यपदी सर्वाधिक ७१ मतांनी आलोक देशपांडे यांच्यासह मनोज मोघ्ो (६८), कमलाकर वाणी (६१), खंडुराज गायकवाड (५९) आणि भगवान परब (५८) यांची वर्णी लागली. कार्यकारिणी सदस्य पदासाठी निवडून द्यावयाच्या पाच जागांमधुन वाणी यांनी ६१ मते मिळवून तिसऱ्या नंबरवर विजयी झालेत. खान्देशातील पत्रकार मुंबईत ‘मंत्रालय विधीमंडळ वार्ताहर संघ'च्या चुरशीच्या निवडणुकीत विजयी झाल्यामुळे वाणी यांचे सर्वत्र अभिनंदन होत आहे.
सर्व कार्यकारिणी आणि ‘मंत्रालय विधीमंडळ वार्ताहर संघ'च्या सदस्यांना सोबत घेऊन काम करणार असल्याचे नवनिर्वाचित अध्यक्ष प्रमोद डोईफोडे यांनी सांगितले. ‘मंत्रालय विधीमंडळ वार्ताहर संघ'ची प्रतिष्ठा जपण्यावर तसेच सर्व सदस्यांच्या हिताच्या योजना राबविण्यावर आपला भर राहील, असेही डोईफोडे यांनी सांगितले. दरम्यान, ‘मुख्यमंत्री वैद्यकीय सहायता कक्ष'चे कक्ष प्रमुख मंगेश चिवटे यांनी मंत्रालय वार्ताहर कक्षात जाऊन ‘मंत्रालय विधीमंडळ वार्ताहर संघ'चे नवनिर्वाचित अध्यक्ष प्रमोद डोईफोडे यांच्यासह इतर पदाधिकारी आणि सदस्य पत्रकारांचे पुष्पगुच्छ देऊन अभिनंदन केले. यावेळी संघाचे वर्तमान अध्यक्ष मंदार परब उपस्थित होते.
