स्वच्छताकर्मींच्या दैनंदिन कामाचा सन्मान
स्वच्छता कामगारांना सुट्टी देत २८०० हून अधिक नागरिकांनी केली बेलापूर विभागाची स्वच्छता
नवी मुंबई ः माझा कचरा, माझी जबाबदारी अशी ओळ केवळ घोषवाक्यापुरती मर्यादित न ठेवता बेलापूर विभागातील नागरिकांनी पुढाकार घ्ोत तेथील स्वच्छताकर्मींच्या दैनंदिन कामाचा सन्मान करण्यासाठी त्यांना सुट्टी दिली आणि स्वतः झाडूसह इतर स्वच्छता साधने हातात घेत रस्ते, गल्ल्या साफसफाई केली. याद्वारे नागरिकांनी स्वच्छतेचा नवा आदर्श स्वकृतीतून प्रदर्शित केला.
सकाळी ६.३० वाजल्यापासून बेलापूर विभागात ठिकठिकाणी नागरिक आपापल्या परिसरातील सफाई करण्यासाठी रस्त्यावर उतरले आणि २८०० हून अधिक नागरिकांच्या सहभागाने जणू बेलापूर विभागात स्वच्छतेची व्यापक चळवळच उभी राहिली. यामध्ये तरुणाईची मोठी संख्या अत्यंत लक्षवेधी होती. वाशी विभागानंतर १४ जानेवारी रोजी बेलापूर विभागानेही स्वच्छताकर्मींच्या सेवाभावी कामाविषयी आपुलकी आणि आस्था दाखवित त्यांच्या जागी स्वतः झाड़ू हातात घेत स्वच्छताकर्मींच्या कामाचा सन्मान केला.याचवेळी बेलापूर विभागातील स्वच्छताकर्मींसाठी बेलापूर विभाग कार्यालय इमारतीत आरोग्य तपासणी शिबिराचे आयोजन करण्यात आले होते. सीबीडी, सेक्टर-१५ येथील क्रोमा समोरील मैदानात ३२५ हून अधिक स्वच्छताकर्मींनी एकत्र येत सेक्टर-११ येथील बेलापूर भवन पर्यंत स्वच्छता रॅली काढली. कचरा वर्गीकरणाचे महत्व, प्लास्टिक प्रतिबंधाची गरज, ओल्या कचऱ्याची कम्पोस्ट बास्केट वापरुन घरच्या घरी अथवा सोसायटीच्या आवारात कम्पोस्ट पीटस्द्वारे विल्हेवाट अशा स्वच्छताविषयक अनेक महत्वाच्या गोष्टींविषयी फलक उंचावत तसेच घोषणा देत या स्वच्छताकर्मींना परिसर दणाणून सोडला.
महापालिका आयुक्त राजेश नार्वेकर यांच्या मार्गदर्शनाखाली, घनकचरा व्यवस्थापन विभागाचे उपायुक्त तथा स्वच्छ भारत मिशनचे महापालिका नोडल अधिकारी डॉ. बाबासाहेब राजळे यांनी या आगळ्यावेगळ्या उपक्रमाचे सहा. आयुक्त तथा विभाग अधिकारी डॉ. मिताली संचेती यांच्यासह सुयोग्य नियोजन केले. मुख्य स्वच्छता अधिकारी राजेंद्र सोनावणे तसेच स्वच्छता अधिकारी विजय पडघन यांनी स्वच्छता निरीक्षक विजय नाईक, मिलींद तांडेल, किरण सोळसकर, पवन कुवे यांनी सर्व सहकारी तसेच स्वच्छता कामातील पर्यवेक्षक यांना एकत्र घेऊन उपक्रमासाठी मोलाचे योगदान दिले. परिमंडळ-१ चे उपायुक्त दादासाहेब चाबुकस्वार यांनीही सक्रिय सहभाग नोंदविला.
अशा प्रकारे स्वच्छताकर्मींचा सन्मान करण्यासोबतच ३२५ हून अधिक स्वच्छताकर्मींची बेलापूर विभाग कार्यालय येथे विशेष शिबीराद्वारे आरोग्य तपासणी करण्यात आली. हार्ट फाऊंडेशनचे प्रमुख डॉ. ईलीस जयकर यांच्या सहयोगाने, मेडिकव्हर हॉस्पिटल आणि ड्रीम ऑप्टिक्स यांच्या माध्यमातून आयोजित सदर शिबिरात स्वच्छताकर्मींची रक्तदाब, मधुमेह, बी.एम.डी., नेत्रतपासणी, ई.सी.जी. तसेच दंतचिकित्सा अशा विविध तपासण्या करण्यात आल्या.
बेलापूर विभाग कार्यक्षेत्रातील विविध स्वयंसेवी संस्था, स्वच्छताप्रेमी जागरुक नागरिक, लोकप्रतिनिधी, शाळा-कॉलेजचे शिक्षक-विद्यार्थी, मॉल्स हॉटेल्स तसेच इतर व्यावसायिक आस्थापनांचे मालक आणि कर्मचारी असे सर्वजण स्वच्छता उपक्रमाच्या माध्यमातून मोठ्या संख्येने एकत्र आल्याने व्यापक लोकसहभागातून एक भव्यतम आणि स्वच्छताकर्मींविषयी आपुलकीची भावना प्रदर्शित करणारा आगळावेगळा उपक्रम यशस्वीरित्या साकार झाला.
