आजुबाजूच्या शहरांतील पाण्याची परिस्थिती पाहून नवी मुंबईकर नागरिकांनी पाण्याचे महत्व ओळखावे
मोरबे धरणात सप्टेंबर पर्यतचा जलसाठा
नवी मुंबइ ः प्रति दिन ४५० द.ल.लि. क्षमतेच्या स्वतःच्या मालकीच्या मोरबे धरण प्रकल्पामुळे नवी मुंबईची जलसमृध्द शहर अशीही ओळख असून समाधानकारक पाणी पुरवठा शहराचे एक वैशिष्ट्य आहे. तथापि आजुबाजूच्या शहरांतील पाण्याची परिस्थिती पाहून नवी मुंबईकर नागरिकांनी पाण्याचे महत्व ओळखून गरजेपुरताच पाण्याचा वापर करावा, असे आवाहन नवी मुंबई महापालिका मार्फत नियमित करण्यात येते.
सन २०२१ मध्ये मोरबे धरण क्षेत्रात ४२२६.८० मि.मि. इतकी पर्जन्यवृष्टी झाल्याने १९०.८९० एम.सी.एम. जलसाठा धरणात जमा झाला होता. मात्र, सन २०२२ मध्ये मोरबे धरण क्षेत्रात ३५५९.४० मि.मि. इतकीच पर्जन्यवृष्टी झाल्याने १३८.०८८ एम.सी.एम. इतका जलसाठा धरणात जमा झाला आहे. आजची धरणाची पातळी ८३.२३ मीटर इतकी असून गतवर्षी याच दिवशी म्हणजे ९ जानेवारी रोजी ही पातळी ८२.२३ मीटर इतकी होती. या जलसाठा द्वारे नवी मुंबईकरांना सप्टेंबर महिन्याच्या अखेरपर्यंत सुलभपणे पाणी पुरवठा करणे शक्य आहे.
तरीही नवी मुंबई महापालिका क्षेत्राबाहेरील शहरांच्या नागरी वसाहतींमध्ये सध्या केली जात असलेली पाणी कपात लक्षात घ्ोऊन नवी मुंबईकर नागरिकांनीही पाण्याबाबत सतर्क राहणे गरजेचे आहे. अनेक ठिकाणी पाणी वापरण्याबाबत नागरिकांकडून निष्काळजीपणा केला जात असल्याचे निदर्शनास येत आहे. सोसायट्यांमधील भूमीगत आणि टेरेसवरील जलकुंभ ओव्हरपलो होणे, गाड्या धुण्यासाठी पाईपद्वारे पाण्याचा वापर करणे, पिण्याच्या पाण्याचा वापर इमारतींचे आवार अथवा पॅसेज धुण्यासाठी करणे, रस्ते धुणे अशा विविध प्रकारे पिण्याच्या पाण्याची नासाडी होत आहे. याबाबत नागरिकांमध्ये जागरुकता आणण्यासाठी महापालिकेच्या वतीने स्थानिक पातळीवर विविध माध्यमांतून प्रयत्न केले जात आहेत.
त्यामुळे नागरिकांनी आसपासच्या शहरांतील पाणी टंचाईसारखी परिस्थिती लक्षात घ्ोऊन आपल्याला लाभलेली पाण्याची संपन्नता काटकसरीने वापरावी. जल देखील एक प्रकारची संपत्ती आहे याचे भान ठेवून तिचा काळजीपूर्वक वापर करावा आणि जागरुक नागरिक बनावे. असे आवाहन नवी मुंबई महापालिकाच्या वतीने करण्यात आले आहे.
