महापालिका रुग्णालयाला १ कोटी रुपयांची वैद्यकीय उपकरणे प्रदान
नवी मुंबई ः आमदार गणेश नाईक यांच्या मागणीनुसार सँडोज कंपनीतर्फे ऐरोली येथील नवी मुंबई महापालिकेच्या राजमाता जिजाऊ रुग्णालयाला एक कोटी रुपयांची विविध वैद्यकीय उपकरणे प्रदान करण्यात आली आहेत. सदर वैद्यकीय उपकरणे आ. गणेश नाईक यांच्या हस्ते रुग्णालयाला हस्तांतरीत करण्याचा सोहळा १७ डिसेंबर रोजी पार पडला. कंपनीच्या सीएसआर निधीतून सदर उपकरणे रुग्णालयाला देण्यात आली आहेत.
याप्रसंगी माजी खासदार संजीव नाईक, माजी आमदार संदीप नाईक, माजी महापौर सुधाकर सोनवणे, माजी नगरसेवक नवीन गवते, कंपनीचे टेक ऑफ हेड इंडिया सुधीर भंडारे, टॅक्सेशन विभागाचे महाव्यवस्थापक पंकज गुप्ते, एच.आर. पी अँड ओ विभागाचे समीर कोरे, ‘अमेरिकेअर इंडिया फाऊंंडेशन'चे डॉ. गुरुप्रसाद जानवेकर, कंपनीचे युनियन नेते सोमनाथ विरकर, व्यवस्थापक राहुल सातोस्कर, रुग्णालयाच्या वैद्यकीय अधिकारी डॉ. वर्षा राठोड, आदि उपस्थित होते. नवी मुंबईमध्ये निर्माण केलेल्या सक्षम आरोग्यव्यवस्थेमुळे आपले शहर कोरोनावर लवकर नियंत्रण प्राप्त करु शकले याचा उल्लेख करून शहरातील प्रत्येक विभागामध्ये अद्ययावत रुग्णालयाची निर्मिती करणार असल्याची माहिती आमदार नाईक यांनी दिली. दिघा, घणसोली, कोपरखैरणे, तुर्भे आदि विभागांमध्ये रुग्णालयासाठी कार्यवाही सुरु आहे. कोरोना काळात ऑक्सिजनची कमतरता पाहता एक कोटी रुपयांच्या स्थानिक स्वराज्य विकास निधीमधून राजमाता जिजाऊ रुग्णालयात ऑक्सीजन निर्मिती प्रकल्प स्थापन करण्यात आला. आज या प्रकल्पातून निर्माण होणारा ऑक्सिजन याच रुग्णालयातील रुग्णांचे प्राण वाचवत आहे. सँडोज कंपनी व्यवस्थापनाकडे पत्र पाठवून आणि त्या अनुषंगाने चर्चा करुन नाईक यांनी महापालिका रुग्णालयासाठी आवश्यक वैद्यकीय उपकरणे उपलब्ध करुन देण्याची मागणी केली होती. त्यानुसार एक कोटी रुपयांची उपकरणे महापालिका रुग्णालयाकडे हस्तांतरीत करण्यात आली आहेत. यामध्ये ईसीजी मशीन, बेबी इंक्युबेटर, ईएनटी इंडोस्कोपी मशीन, फोटो थेरेपी मशीन अशा एकूण ८५ महत्त्वाच्या वैद्यकीय उपकरणांचा समावेश आहे. त्यांचा पुरेपूर उपयोग करुन रुग्णालय व्यवस्थापनाने जनसामान्यांना चांगली वैद्यकीय सेवा देण्याचे आवाहन नाईक यांनी यावेळी केले. सँडोज कंपनीच्या सामाजिकतेचा नाईक यांनी गौरव केला. कंपनीचे टेक्निकल हेड सुधीर भंडारी यांनी सीएसआर निधीच्या माध्यमातून सँडोज कंपनी आणि नवी मुंबई शहराचे ऋणानुबंध घट्ट करण्याचा प्रयत्न असल्याचे सांगून यापुढेही महापालिका रुग्णालयांना वैद्यकीय उपकरणांनी अद्ययावत करण्याचा मानस व्यक्त केला.
