शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
तुर्भे गावातील रस्ते खड्डेमय!
स्थानिक रहिवाशांना पाठीच्या मणक्याचे आजार
तुर्भे : तुर्भे गावातील अंतर्गत आणि मुख्य रस्त्यांवर पुष्कळ प्रमाणात खड्डे पडले आहेत. त्यामुळे स्थानिक रहिवाशांना पाठीच्या मणक्याचे आजार होऊ लागले आहेत. याशिवाय नवी मुंबई महापालिकेच्या सार्वजनिक शौचालयाकडून तुर्भे नाकाकडे जाणाऱ्या रस्त्यावरही मोठ्या प्रमाणात खड्डे पडले आहेत. मंजुला सायकल मार्ट ते हनुमान मंदिराकडे जाणाऱ्या रस्त्यावर तसेच सामंत शाळा, तलाठी कार्यालय ते तुर्भे गाव प्रवेशद्वार कमान, पेट्रोल पंप मागील सर्व्हिस रस्ता, जैन मंदिर रस्ता आदी ठिकाणी खड्डेच खड्डे पडले आहेत. तुर्भे येथील चिराग हॉटेलपासून माजी नवी मुंबई जिल्हा भाजपाध्यक्ष रामचंद्र घरत यांच्या निवासाकडे जाणारा मुख्य रस्ता खड्ड्यांनी व्यापलेला आहे. चिराग हॉटेल ते गणराज हॉटेल समोरील रस्त्याचीही पूर्णपणे चाळण झाली आहे.
तुर्भे गाव मधील रस्ते खड्डे मुक्त होत नसल्याने आश्चर्य व्यक्त केले जात आहे. तुर्भे गावातील रस्त्यावर पडलेल्या खड्ड्यांमुळे सर्वसामान्य नागरिक मेटाकुटीला आले आहेत. रस्त्यावरील खड्ड्यांमुळे किरकोळ अपघातही होत आहेत. इतकेच नाही, तर मणक्याचे आजार असलेल्या ज्येष्ठ नागरिकांना रस्त्यावरील खड्ड्यांचा अधिकच फटका बसत आहे. त्यामुळे वरिष्ठ अधिकाऱ्यांनी लक्ष घालून तुर्भे गावातील रस्ते लवकरात लवकर दुरुस्त करावेत, अशी मागणी तुर्भे गावातील नागरिकांकडून केली जात आहे.
दरम्यान, सर्व ठिकाणचे रस्त्यावरील खड्डे तात्पुरते स्वरुपात भरले जातात. पाऊस उघडताच त्या ठिकाणचे खड्डे पुन्हा भरुन घेऊन डांबरीकरणही करण्यात येत आहे, अशी माहिती नवी मुंबई महापालिका कार्यकारी अभियंता संजय पाटील यांनी दिली.
