शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
तणावमुक्तीसाठी प्रत्येक कार्यालयात किमान १५ मिनिटे योगाभ्यास करण्याची राज्यपालांची सूचना
योगाला आपल्या दैनंदिन आयुष्याचा भाग बनवा - राज्यपाल रमेश बैस
मुंबई : सप्टेंबर २०१४ मध्ये ‘संयुक्त राष्ट्रसंघ'मध्ये प्रधानमंत्री नरेंद्र मोदी यांनी २१ जून रोजी आंतरराष्ट्रीय योग दिवस म्हणून जगभर साजरा करण्याचा प्रस्ताव ठेवला. या प्रस्तावाला ‘संयुक्त राष्ट्रसंघ'ने मान्यता देत २१ जून रोजी आंतरराष्ट्रीय योग दिवस म्हणून साजरा होत आहे. त्यामुळे आपला योग जगात पोहोचला. प्रत्येकाला निरोगी आयुष्य जगायचे असेल, तर योगाला आपल्या दैनंदिन आयुष्याचा भाग बनविले पाहिजे, असे प्रतिपादन राज्यपाल रमेश बैस यांनी केले.
विधानभवन प्रांगणात ‘योगप्रभात विधानभवन' कार्यक्रमाचे आयोजन करण्यात आले होते. यावेळी राज्यपाल बैस यांनी आपले विचार व्यक्त केले. याप्रसंगी व्यासपीठावर मुख्यमंत्री एकनाथ शिंदे, उपमुख्यमंत्री देवेंद्र फडणवीस, विधान परिषद विरोधी पक्षनेते अंबादास दानवे, आमदार मनिषा कायंदे, आमदार संजय कुटे, आमदार विक्रम काळे, आदि उपस्थित होते.
योगामुळे आत्मविश्वास, सहनशक्ती वाढीस लागत असल्याचे सांगत राज्यपाल बैस म्हणाले की, योगाचा संपूर्ण जगात प्रचार झाला पाहिजे. नव्या पिढीला योग शिकविणे आपली सर्वांची सामुहिक जबाबदारी आहे. आत्म्याला परमात्म्याशी जोडण्याचे सामर्थ्य योगात आहे. देशात मधुमेह आजार वेगाने वाढत आहे. या आजारावर योगाच्या माध्यमातून नियंत्रण ठेवणे शक्य आहे. सर्वाधिक युवाशक्तीचा भारत देश आहे. युवाशक्तीने योग केला पाहिजे. सदर योग चळवळ पुढे नेली पाहिजे. व्यसनाच्या आहारी गेलेल्या युवकांना योगामुळे व्यसनांपासून दूर राहता येऊ शकते. देशात योग विद्यापीठ होण्यासाठी प्रयत्न झाले पाहिजे. तणावमुक्तीसाठी प्रत्यके कार्यालयात किमान १५ मिनिटे योगाभ्यास झाला पाहिजे, असेही राज्यपाल म्हणाले.
योग करुन निरोगी राहूया, करो योग रहो निरोग - मुख्यमंत्री एकनाथ शिंदे
संपूर्ण जगात आंतराष्ट्रीय योग दिन म्हणून २१ जून रोजी साजरा केला जातो. आजचा दिवस निरंतर स्मरणात ठेवावा असा दिवस आहे. शरीर, मनाच्या आरोग्यासाठी आजचा दिवस महत्त्वाचा आहे. बदलत्या जीवनशैलीत योगाला आपलेसे करुन निरोगी आयुष्य जगावे. त्यासाठी प्रत्येकाने निरोगी राहण्यासाठी योग करावा. करो योग रहो निरोग असा मंत्र अंगीकारण्याचे आवाहन मुख्यमंत्री एकनाथ शिंदे यांनी यावेळी केले.
निरोगी भारतासाठी प्रत्येकाने योग करावा - उपमुख्यमंत्री देवेंद्र फडणवीस
प्रधानमंत्री नरेंद्र मोदी मोदी यांच्या प्रयत्नांनी ‘संयुवत राष्ट्रमहासंघ'ने २१ जून आंतरराष्ट्रीय योग दिवस म्हणून साजरा करण्याचे ठरविले आणि संपूर्ण जगात योग पोहोचला. योग प्राचीन चिकित्सापद्धत आहे. निरोगी राहण्यासाठी वैज्ञानिक पध्दतीने योगशास्त्र तयार करण्यात आले. निरोगी भारताच्या निर्माणासाठी प्रत्येकाने योग करावा, असे उपमुख्यमंत्री देवेंद्र फडणवीस यांनी सांगितले.
सध्याच्या जीवनात ताण-तणावांचा सामना करताना अनेक ‘लाइफ स्टाईल' आजार बळावत आहेत. या आजारांचा सामना करण्यासाठी योगशास्त्र त्यावर प्रभावी उपाय आहे. रोग होऊच नये म्हणून योगशास्त्र प्रभावी उपाय असल्याचे उपमुख्यमंत्री फडणवीस म्हणाले.
यावेळी योग प्रात्यक्षिक करण्यात आले. कार्यक्रमाचे आभारप्रदर्शन विधानसभा अध्यक्ष ॲड. राहुल नार्वेकर यांनी केले. त्यांनी कार्यक्रमाच्या आयोजनामागील भूमिका स्पष्ट केली. कार्यक्रमाचे संचालन निलेश मदाने यांनी केले. कार्यक्रमाला विधानभवनातील अधिकारी, कर्मचारी तसेच योगप्रेमी उपस्थित होते.
कार्यक्रमात शतकी परंपरा असलेल्या कैवल्य धाम, मुंबई संस्थेच्या वतीने योग प्रात्यक्षिके करण्यात आली.
