शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
महाराष्ट्रातील ११४ मंदिरांमध्ये वस्त्रसंहिता
मुंबई, ठाणे, रायगड, पालघर जिल्ह्यातील १८ मंदिरांमध्ये वस्त्रसंहिता लागू!
नवी मुंबई : जळगाव, अकोला, धुळे, नागपूर, नाशिक, अमरावती, अहिल्यानगर (नगर) यांसह कोकण विभागातील मिळून महाराष्ट्रातील एकूण ११४ मंदिरांमध्ये वस्त्रसंहिता लागू करण्यात आली आहे. यामध्ये मुंबई, ठाणे, रायगड आणि पालघर जिल्ह्यांतील १८ मंदिरांचा समावेश आहे, अशी माहिती ‘महाराष्ट्र मंदिर महासंघ'चे समन्वयक सुनील घनवट यांनी ९ जून रोजी ‘महाराष्ट्र मंदिर महासंघ' तर्फे मुंबई मधील श्री शीतलादेवी मंदिरात घेण्यात आलेल्या पत्रकार परिषद मध्ये दिली.
यावेळी जीवदानी मंदिराचे अध्यक्ष प्रदीप तेंडोलकर, कडाव गणपती मंदिराचे विश्वस्त (कर्जत) विनायक उपाध्ये, ‘केरलीय क्षेत्रपरिपालन समिती'चे आचार्य पी. पी. एम. नायर आदी उपस्थित होते. वस्त्रसंहिता लागू करण्यात येणाऱ्या मंदिरांच्या नावांची घोषणा यावेळी सुनील घनवट यांनी केली.
महाराष्ट्र मंदिर महासंघ द्वारे ७ जून रोजी दादर येथील स्वातंत्र्यवीर सावरकर राष्ट्रीय स्मारकामध्ये मुंबई, ठाणे, रायगड आणि ठाणे जिल्ह्यांतील मंदिरांच्या ट्रस्टींची बैठक आयोजित करण्यात आली होती. या बैठकीला उपस्थित सर्व मंदिर ट्रस्टींनी मंदिरांमध्ये वस्त्रसंहिता लागू करण्याला ठराव एकमताने संमत केला. वर्ष २०२० मध्ये महाराष्ट्र शासनाने मंत्रालयासह राज्यातील सर्व शासकीय कार्यालयांमध्ये वस्त्रसंहिता लागू केली. यामध्ये ‘जीन्स पँट', ‘टी-शर्ट', भडक रंगांचे कपडे यांवर बंदी घालण्यात आली आहे. वस्त्रसंहिता लागू करण्यामागे जनमानसांत शासकीय प्रतिमा बिघडू नये, असा सरकारचा हेतू होता. देशातील अनेक मंदिरे, गुरुद्वार, चर्च, मशिदी आणि अन्य प्रार्थनास्थळे, खाजगी आस्थापने, शाळा महाविद्यालय, न्यायालय, पोलीस आदी सर्वच क्षेत्रांत वस्त्रसंहिता लागू आहे. त्याप्रमाणे मंदिरांमध्येही वस्त्रसंहिता असावी, असे सुनील घनवट यांनी यावेळी नमूद केले.
काहीजण मंदिरांमध्ये अंगप्रदर्शन करणारी उत्तेजक, अशोभनीय, असभ्य, फाटलेल्या जीन्स आणि तोकड्या कपड्यांमध्ये येतात. सात्त्विक वेशभूषा परिधान करुन मंदिरात आल्यावर भक्तांना मंदिरातील चैतन्याचा लाभ होतो. तसेच मंदिरातील पावित्र्य, मांगल्य, परंपरा आणि संस्कृती टिकून रहाते, अशी हिंदु धर्मांची शिकवण आहे. यासाठीच मंदिरांमध्ये वस्त्रसंहिता लागू करण्याचा निर्णय मंदिर विश्वस्तांनी स्वयंस्फूर्तीने घेतला आहे. भविष्यात मुंबई, ठाणे, रायगड आणि पालघर या जिल्ह्यांतील आणखीही काही मंदिरांमध्ये वस्त्रसंहिता लागू करण्यात येणार आहे, असे यावेळी ‘जीएस्बी टेंम्पल ट्रस्ट'चे मानद चिटणीस आणि कायम विश्वस्त शशांक गुळगुळे यांनी जाहीर केले.
आतापर्यंत १२ ज्योतिर्लिंगांपैकी एक असलेले उज्जैन मधील श्री महाकालेश्वर मंदिर, महाराष्ट्रातील श्री घृष्णेश्वर मंदिर, अंमळनेर मधील श्रीदेव मंगळग्रह मंदिर, वाराणसी मधील श्री काशी-विश्वेश्वर मंदिर, आंध्रप्रदेश मधील श्री तिरुपती बालाजी मंदिर, केरळ मधील विख्यात श्री पद्मानाभस्वामी मंदिर, कन्याकुमारी मधील श्री माता मंदिर अशा काही प्रसिद्ध मंदिरांमध्ये अनेक वर्षांपासून सात्त्विक वस्त्रसंहिता लागू आहे. गोवा राज्यातील बहुतांश मंदिरांसह ‘बेसिलिका ऑफ बॉर्न जीसस' आणि ‘सी कैथ्रेडल' या मोठ्या चर्चमध्येही वस्त्रसंहिता लागू आहे. मंदिरामध्ये सात्त्विक पोषाख परिधान केल्यामुळे मंदिरातील पावित्र्याचा लाभ होतो, असे ‘सनातन संस्था'च्या सौ. धनश्री केळशीकर यांनी सांगितले.
याप्रसंगी ‘जीएस्बी टेंम्पल ट्रस्ट'चे मुख्य कार्यकारी अधिकारी ऋत्विक औरंगाबादकर, खजिनदार सौ. कल्पना प्रभू, ‘श्री शीतलादेवी आणि मुरलीधर देवस्थान'चे पालक विश्वस्त अनिल परुळकर, ‘श्री भुलेश्वर आणि श्री बालाजी रामजी देवस्थान'चे पालक विश्वस्त दीपक वालावलकर, माहीम येथील ‘श्रीदत्त मंदिर'चे पुजारी किशोर सारंगुल, ‘श्री वाळकेश्वर मंदिर'चे पदाधिकारी पंकज सोलंकी, आदी उपस्थित होते.
