शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
प्रश्नपत्रिकाही हॅक करण्याचा होता प्रयत्न -पोलीस आयुवत भारंबे
‘लोकसेवा आयोग'च्या हॉल तिकीटाचा डाटा हॅक करणारा पुण्यात जेरबंद
नवी मुंबई ः ‘महाराष्ट्र लोकसेवा आयोग'च्या वेबसाईटवर टाकण्यात आलेले संयुक्तपूर्व परीक्षेचे तब्बल ९४१९५ हॉल तिकीट बेकायदेशीररित्या डाऊनलोड करुन सदर हॉल तिकीट टेलिग्राम चॅनलवर प्रसारित करणाऱ्या रोहित दत्तात्रय कांबळे (१९) या तरुणाला नवी मुंबई पोलिसांच्या सायबर सेलने पुणे येथून अटक केली आहे. या प्रकरणातील आरोपी रोहित कांबळे डार्कनेट वरील काही हॅकर्स सोबत संपर्कात असल्याचे आढळून आले असून त्यांच्याकडून त्याला ‘एमपीएससी'च्या वेबसाईट वरुन परीक्षार्थींचे हॉल तिकीट आणि एमपीएससी परीक्षेची प्रश्नपत्रिका हॅक करण्यासाठी तब्बल ४०० डॉलरची सुपारी मिळाल्याचे तपासात आढळून आल्याची माहिती पोलीस आयुक्त मिलिंद भारंबे यांनी दिली.
‘महाराष्ट्र लोकसेवा आयोग'ने (एमपीएससी) गट-ब आणि गट-क च्या संयुक्त पूर्व परीक्षेच्या परीक्षार्थींचे प्रवेशपत्र ( हॉल तिकीट ) २८ एप्रिल रोजी आपल्या वेबसाईटवर टाकले होते. सदरचे हॉल तिकीट विद्यार्थ्यांच्या सुविधेसाठी बाह्यलिंकद्वारे ‘आयोग'च्या वेबसाईटवर टाकण्यात आले होते. मात्र, याच गोष्टीचा फायदा उचलत अज्ञात हॅकरने ‘आयोग'ने वेबसाईटवर टाकलेल्या बाह्यलिंकमध्ये बेकायदेशीररित्या प्रवेश करुन त्यातील माहिती अवैधरित्या प्राप्त करुन त्याद्वारे वेबसाईट वरील तब्बल ९४१९५ परीक्षार्थींचे हॉल तिकीट डाऊनलोड केले होते. त्यानंतर सदर हॅकरने आयोगाच्या वेबसाईट वरुन डाऊनलोड केलेला परीक्षार्थींच्या हॉल तिकीटाचा डाटा एमपीएससी २०२३ ए या टेलिग्रामच्या चॅनलवर बेकायदेशीररित्या प्रसारीत केला होता.
या प्रकारानंतर ‘महाराष्ट्र लोकसेवा आयोग'च्या परीक्षार्थींमध्ये गोंधळाचे वातावरण पसरले होते. त्यानंतर ‘आयोग'चे सहसचिव सुनिल अवताडे यांनी नवी मुंबई पोलिसांच्या सायबर सेलकडे याबाबत तक्रार दाखल केल्यानंतर नवी मुंबई पोलिसांच्या सायबर सेलने या संपूर्ण प्रकरणाच्या तपासाला सुरुवात केली होती. या तपासात सायबर सेलचे वरिष्ठ पोलीस निरीक्षक विजय वाघमारे आणित्यांच्या टीमने या प्रकरणाचा सखोल तांत्रिक तपास करुन अज्ञात हॅकरने गुन्हा करताना वापरलेला आयपी ॲड्रेस मिळवून तांत्रिक माहितीच्या आधारे संशयित आरोपी रोहित दत्तात्रय कांबळे याला पुण्यातील चिखली, पाटीलनगर येथून २४ मे रोजी ताब्यात घ्ोतले. यावेळी पोलिसांनी रोहित कांबळे याच्या घरातून सदर गुन्ह्यात वापरलेले १ डेस्कटॉप, १ लॅपटॉप, ३ मोबाईल फोन आणि १ इंटरनेट राऊटर जप्त केले आहे.
पोलिसांनी केलेल्या चौकशीत रोहित कांबळे याने त्याच्या साथीदारासह सदरचा गुन्हा केल्याची कबुली दिली आहे. त्यानुसार त्याला अटक करण्यात आल्याची माहिती पोलीस आयुक्त मिलिंद भारंबे यांनी दिली. रोहित कांबळे याने डार्क नेट वरील साथीदारांच्या मदतीने अशाच प्रकारचे आणखी काही गुन्हे केले असण्याची शक्यता आहे. त्यानुसार त्याची कसून चौकशी करण्यात येत असल्याचे पोलीस आयुक्त भारंबे यांनी सांगितले. न्यायालयाने त्याला २७ मे पर्यंत पोलीस कोठडी ठोठवल्याचे भारंबे यांनी सांगितले.
पोलिसांनी केलेल्या चौकशीत रोहित कांबळे बीएससीच्या दुसऱ्या वर्षात शिकत असून त्याने सायबर सिक्युरिटीचे विविध प्रकारचे कोर्सेस केल्याचे तपासात आढळून आले आहे. तसेच तो डार्क नेट वरील काही हॅकर्स सोबत संपर्कात असल्याचे तपासात आढळून आले आहे. डार्कनेट वरील हॅकर्सनी त्याला ‘महाराष्ट्र लोकसेवा आयोग'च्या वेबसाईट वरुन परीक्षार्थींचे हॉल तिकीट आणि एमपीएससी परीक्षेच्या प्रश्नपत्रिका हॅक करण्यासाठी तब्बल ४०० डॉलरची सुपारी दिल्याचे तपासात आढळून आले आहे. त्यानुसार पोलिसांकडून पुढील तपास करण्यात येत आहे.
