शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
१० हजार ३३८ जणांकडून सुरक्षित वाहतूक नियमांना हरताळ
वर्षभरात १४ हजाराहून अधिक बेशिस्त वाहन चालकांवर कारवाई
वाशी ः नवी मुंबई आरटीओ मार्फत बेशिस्त वाहन चालकांवर नित्याने कारवाई करण्यात येत असते. मागील वर्षभरात तब्बल १४ हजार ७९७ बेशिस्त वाहन चालकांवर कारवाई करण्यात आली आहे. यामध्ये १० हजार ३३८ जणांकडून सुरक्षित वाहतूक नियमांना हरताळ फासून वाहने चालवित असण्याचे समोर आले आहे. या वाहन चालकांवर वाशी आरटीओ द्वारे कारवाईचा बडगा उगारण्यात आला असून, ३३८.८७ कोटी रुपये दंड वसूल करण्यात आलेला आहे.
परिवहन विभागाने सुरक्षित वाहन चालवण्यासाठी वाहतुकीचे नियम घालून दिले आहेत. रस्ता सुरक्षा अभियानांतर्गत रस्ता सुरक्षित प्रवास वाहतुकीचे धडे दिले जातात. मात्र, नियम असून देखील काही वाहन चालक नियमांना पायदळी तुडवून वाहने हाकत असल्याने रस्त्यांवर अपघातांची संख्या वाढत आहे. त्यामुळे रस्ते अपघात रोखण्यासाठी नवी मुंबई आरटीओ विभागाकडून बेशिस्त वाहन चालकांवर नियमित कारवाई करण्यात येत आहे. दरवर्षी साधारण ३ ते ४ हजार वाहन चालकांवर कारवाई करण्यात येते. मात्र, मागील वर्षी यात कमालीची वाढ झाली असून, एप्रिल २०२२ ते मार्च २०२३ दरम्यान आरटीओ विभागाकडून तब्बल १४ हजार ७९७ बेशिस्त वाहन चालकांवर कारवाई करण्यात आली आहे. यामध्ये १० हजार ३३८ जणांकडून सुरक्षित वाहतूक नियमांना हरताळ फासून वाहने चालवित असण्याचे समोर आले आहे. या वाहन चालकांवर वाशी आरटीओ विभागाने कारवाईचा बडगा उगारला असून, ३३८.८७ कोटी रुपये दंड वसूल करण्यात आलेला आहे.यामध्ये सर्वाधिक कारवाई विना हेल्मेट आणि योग्यता प्रमाणपत्र नसणाऱ्या तसेच वाहन चालवताना मोबाईलवर बोलणे, विना सीट बेल्ट इत्यादी त्रुटी असणाऱ्या वाहनांवर कारवाई करण्यात आलेली आहे. उर्वरित ४ हजार वाहन चालकांकडून विनापरवाना, क्षमतेपेक्षा अधिक प्रवासी वाहतूक, अवैध वाहतूक, अवजड वाहतूक इत्यादी नियम मोडणाऱ्या वाहनांवर कारवाई करण्यात आली आहे.
-----------------------------
वाहतूक नियम तोडत असल्याने नवी मुंबई शहरात वाहन अपघातात वाढ होताना दिसत आहे. त्या अनुषंगाने रस्ते अपघात रोखण्यासाठी बेशिस्त वाहनांवर कडक कारवाई करण्यात आली आहे. वर्षभरात १४ हजार पेक्षा अधिक वाहनांवर कारवाई करण्यात आली असून, यामध्ये सुरक्षित वाहतूक नियम मोडणाऱ्या १०,३३८ वाहनांवर कारवाई करण्यात आली आहे. - हेमांगिनी पाटील, उपप्रादेशिक अधिकारी - आरटीओ, नवी मुंबई.
