शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
सिडकाेचा अर्थसंकल्प दहा हजार कोटींच्या पार
सिडकाेच्या अर्थसंकल्पात पारदर्शकता व उत्तरदायित्वावर भर
नवी मुंबई : आगामी आर्थिक वर्षाकरिता वैशिष्ट्यपूर्ण अर्थसंकल्प सादर करताना सिडकोने पारदर्शकता व उत्तरदायित्वावर भर देताना भविष्यासाठी आव्हानात्मक उद्दिष्ट रचले आहे. राज्यातील श्रीमंत महामंडळ म्हणून ओळख असलेल्या सिडकोने यावर्षीच्या अर्थसंकल्पात गृहनिर्मिती व पाणीपुरवठ्याकरीता भरीव तरतूद करत दहा हजार कोटींचा टप्पा ओलांडला आहे.
या आर्थिक वर्षासाठी १० हजार ५४४ कोटी रुपये जमा तर १० हजार ४९८ कोटी खर्चाचा आणि ४६६ कोटी रुपये शिल्लकीचा अर्थसंकल्प सादर करताना सिडकोचे व्यवस्थापकीय संचालक डॉ. संजय मुखर्जी यांनी अर्थसंकल्पात विविध स्वरुपाच्या महत्त्वाकांक्षी प्रकल्पांना चालना देण्याच्या दृष्टीने भरीव तरतूद केली आहे. गृहनिर्मितीसाठी तब्बल ३ हजार ७५१ कोटींची तरतूद करण्यात आली आहे. तरमेट्रो प्रकल्पांवर ८९१ कोटींचा खर्च अपेक्षित धरला असून नैना प्रकल्पाच्या विकासासाठी २४३ कोटींची तरतूद केली आहे. विशेष म्हणजे मार्केटिंग, नवी मुंबई आंतरराष्ट्रीय विमानतळ, अग्निशमन, नवीन पालघर आदींवर ४ हजार १५६ कोटी रुपये खर्च अपेक्षित करण्यात आला आहे.
विशेष म्हणजे २०२३-२४ या आर्थिक वर्षासाठी महसुली खर्चाचा अंदाज २७४६ कोटी तर भांडवली खर्चाचा अंदाज ७७५१ कोटी दर्शविला आहे. २०२२ २३ च्या सुधारित अंदाजपत्रकापेक्षा यावर्षीचा अर्थसंकल्प २१.७९ टक्क्यांनी जास्त आहे.
विकासासाठी कटिबद्ध असणाऱ्या सिडकोने नवी मुंबईतील नागरिकांना सिडकोद्वारे देण्यात येणाऱ्या सेवा अधिक पारदर्शक व सुलभ पद्धतीने मिळाव्यात याकरिता ई- प्रशासनाचे उद्दिष्ट मोठ्या प्रमाणावर साध्य केले आहे. सिडकोच्या इतिहासात पहिल्यांदाच अर्थसंकल्प (स्टेटमेंट ऑफ अकाउंट) समाज माध्यमांवर सादर करण्यात आला आहे.
मागील वर्षातील सिडको महामंडळाच्या उत्कृष्ट कामगिरीबद्दल आपण समाधानी असून महामंडळाच्या कामगिरीचा सार्थ अभिमान आहे . कोविड महासाथीमुळे निर्माण झालेल्या आव्हानांवर यशस्वीपणे मात करत महामंडळातील कर्मचारी व अधिकाऱ्यांनी नवी मुंबईला खऱ्या अर्थाने जागतिक दर्जाचे शहर बनवण्यासाठी सतत प्रयत्न करून सिडकोचे शहरांचे शिल्पकार हे बोधवाक्य सार्थ केल्याचे डॉ. संजय मुखर्जी यांनी सांगितले.
उत्पन्नाचे अंदाजित स्त्रोत -
- मार्केटिंग, शहर व वसाहत अग्निशमन आदी विभाग : ४ हजार ७६५ कोटी
- गृहविक्री : ५ हजार ५०७ कोटी
- मेट्रो प्रकल्प : २७४ कोटी
- पाणीपुरवठा : ९४८ कोटी
- नैना प्रकल्प : १७३ कोटी
- नवी शहरे : १२६ कोटी
- रेल्वे प्रकल्प : ६ कोटी ५२ लाख
- एकूण अपेक्षित उत्पन्न : १० हजार ५४४ कोटी
