महापालिका जिल्हास्तरीय शालेय क्रीडा स्पर्धा आयोजन पूर्वबैठक संपन्न
नवी मुंबईत क्रीडा विषयक अडचणी सोडविण्याला प्राधान्यक्रम -उपायुवत ललिता बाबर
नवी मुंबई : सन २०२३-२४ या शैक्षणिक वर्षात शासन मान्यताप्राप्त अनुदानित ४६ क्रीडाप्रकार आणि विना अनुदानित ४४ क्रीडाप्रकार अशा तब्बल ९० क्रीडा प्रकारांच्या स्पर्धा नवी मुंबई महापालिका क्रीडा विभागाच्या वतीने आयोजित करण्यात येणार आहेत. या स्पर्धांच्या सुनियोजित आयोजनाच्या दृष्टीने पूर्वतयारी म्हणून महापालिका कार्यक्षेत्रातील शासन मान्यताप्राप्त अनुदानित आणि विनाअनुदानित सर्व शाळा, कनिष्ठ महाविद्यालये यांचे प्राचार्य, मुख्याध्यापक आणि क्रीडा शिक्षक यांच्यासमवेत विचारविनीमय बैठकीचे नुकतेच वाशी येथील विष्णुदास भावे नाट्यगृहात आयोजन करण्यात आले होते.
दरम्यान, नवी मुंबई महापालिका क्षेत्रातील शालेय क्रीडा स्पर्धांना स्वतंत्र जिल्ह्याचा दर्जा प्राप्त झालेला आहे. त्याअनुषंगाने सन २००९-२०१० पासून नवी मुंबई महापालिका क्रीडा-सांस्कृतिक कार्य विभागाच्या वतीने मागील ११ वर्षे जिल्हास्तरीय शालेय क्रीडा स्पर्धांचे यशस्वीरित्या आयोजन करण्यात येत आहे.
क्रीडा-सांस्कृतिक कार्य विभागाच्या उपायुक्त ललिता बाबर यांच्या अध्यक्षतेखाली संपन्न झालेल्या सदर बैठकीमध्ये महापालिका कार्यक्षेत्रामधील २२ शाळांतील क्रीडा शिक्षक, क्रीडा मार्गदर्शक उपस्थित होते. या स्पर्धेत जास्तीत जास्त शाळांनी सहभागी होण्याच्या दृष्टीने स्पर्धा प्रवेशापासून ते प्रमाणपत्रापर्यंत कागदपत्र विषयक सर्व बाबी ऑनलाईन प्रणालीमध्ये उपलब्ध करुन देण्यात आलेल्या आहेत. या ऑनलाईन प्रणालीचे उजळणी प्रशिक्षण आणि नव्याने समाविष्ट केलेल्या बाबींची माहिती सदर बैठकीत उपस्थितांना देण्यात आली.
या स्पर्धा नियोजन बैठकीप्रसंगी उपायुक्त ललिता बाबर यांनी महापालिका क्षेत्रातील सर्वच शाळांना या स्पर्धांदारे मोठी संधी मिळालेली असून त्याचा फायदा प्रत्येक शाळेतील खेळामध्ये रुची असलेल्या होतकरु खेळाडुंना मिळाला पाहिजे याकरिता शाळांनी पुढाकार घेण्याचे आवाहन केले. नवी मुंबई सुनियोजित शहर म्हणून ओळखले जाते. येथील प्रत्येक नोडमध्ये खेळाची मैदाने आरक्षित करुन ठेवलेली आहेत. शहरामध्ये विविध खेळाच्या सुविधा निर्माण कराव्या लागणार आहेत, याची कल्पना आम्हाला आहे. त्यादृष्टीने आगामी काळात सर्व प्रकारच्या सुविधा उपलब्धतेसाठी संपूर्ण क्षमतेने प्रयत्न करण्यात येतील. शहरातील कोणत्याही शाळेमध्ये क्रीडा प्रशिक्षणाची आवश्यकता भासत असेल, विशेष करुन ॲथलेटिक्सकरिता त्यावेळी थेट मला संपर्क करावा, मी स्वतः प्रशिक्षणासाठी मदत करेन आणि क्रीडाविषयक अडचणी सोडवीन, अशी ग्वाही उपायुक्त ललिता बाबर यांनी यावेळी दिली. दरम्यान, जिल्हास्तरीय शालेय क्रीडा स्पर्धांमध्ये जास्तीत जास्त खेळाडुंनी सहभागी व्हावे अण शाळांनी त्यासाठी सर्वोतोपरी प्रयत्न करावेत, असे आवाहनही उपायुवत बाबर यांनी केले.
सदर बैठकीस ठाणे जिल्हा क्रीडा अधिकारी सुवर्णा बारटक्के, क्रीडा अधिकारी सुचिता ढमाले, राज्य क्रीडा मार्गदर्शक मधुरा सिंहासने, महापालिकेच्या क्रीडा अधिकारी अभिलाषा पाटील, रेवप्पा गुरव, शिक्षण विस्तार अधिकारी सुलभा बारघरे, स्पर्धा आयोजन समिती सदस्य धनंजय वनमाळी, सुधीर थळे, पुरुषोत्तम पुजारी, आदि उपस्थित होते.
