शहराच्या शाश्वत विकासासाठी ‘केडीएमसी'चे ७ कलमी मुद्दे -आयुक्त गोयल
‘परिवहन विभाग'चे प्रधान सचिव पराग जैन यांचे इड्युस पार्क कंपनीला निर्देश
पनवेल बस स्थानक पुनर्विकासासाठी ठेकेदाराला १५ दिवसांचा अल्टीमेटम
पनवेल ः पनवेल बसस्थानक पुनर्विकासाच्या कामासंदर्भात आमदार प्रशांत ठाकूर आक्रमक झाल्याने येत्या १५ दिवसात बस स्थानकाच्या कामाला सुरुवात न झाल्यास ठेका रद्द करण्याचे निर्देश ‘परिवहन विभाग'चे प्रधान सचिव पराग जैन यांनी इड्युस पार्क इंटरनॅशनल कंपनीला दिले आहेत.
‘परिवहन विभाग'चे प्रधान सचिव पराग जैन, ‘महाराष्ट्र राज्य मार्ग परिवहन महामंडळ'चे मुख्य अभियंता गोसावी यांच्यासोबत आमदार प्रशांत ठाकूर यांची बैठक ६ जुलै रोजी मंत्रालयात प्रधान सचिव जैन यांच्या दालनात झाली. या बैठकीस ‘महाराष्ट्र राज्य मार्ग परिवहन महामंडळ'चे वास्तुविशारद निलेश लाहिवाल, परिवहन विभागाच्या कक्ष अधिकारी मेंडे, ठेकेदार इड्युस पार्क इंटरनॅशनल कंपनीचे प्रतिनिधी उपस्थित होते.
मुंबईचे प्रवेशद्वार आणि मुंबई, ठाण्याहून राज्याच्या इतर भागाकडे जाणाऱ्या बसेसचे प्रमुख गंतव्य स्थान म्हणून ओळखल्या जाणाऱ्या पनवेल बस स्थानकाच्या बांधा, वापरा, हस्तांतर करा या तत्वावर पुनर्विकास कामास २०१६ साली मान्यता देण्यात आली होती. त्यानंतर सन २०१८ मध्ये सदर बस स्थानकाच्या पुनर्विकासाच्या कामासाठी ठेकेदाराची नियुक्ती करण्यात आली होती. परंतु, जवळपास सहा वर्षापेक्षा जास्त कालावधी होऊनसुध्दा बस स्थानकाच्या पुनर्विकासाच्या कामास कोणत्याही प्रकारची सुरुवात झाली नाही. पुनर्विकासाच्या नावाखाली जुने बस स्थानक पाडून तात्पुरते शेड उभारण्यात आले आहे. सद्यस्थितीत तात्पुरत्या शेडमध्ये अनेक गैरसुविधा असुनही नवीन बस स्थानकाच्या प्रतिक्षेने प्रवासी सदर त्रास सहा वर्ष सहन करीत आहेत. त्यामुळे बस स्थानकाच्या पुनर्विकास कामाला तातडीने सुरुवात करुन पूर्णत्वास नेण्याबाबत आमदार प्रशांत ठाकूर यांनी विविध माध्यमातून आंदोलन तसेच बैठका आणि विधिमंडळातही अनेक वर्षे पाठपुरावा करीत आहेत. संबंधित विभागामार्फत अद्यापपर्यंत पुढील कार्यवाही न झाल्याने अखेर आमदार ठाकूर यांनी ‘परिवहन विभाग'ला रायगड जिल्हा भारतीय जनता पार्टीच्या वतीने तीव्र आंदोलनाचा इशारा दिला होता. त्या अनुषंगाने सदर बैठक पार पडली.
सदर बैठकीत पनवेल बस स्थानकात प्रवाशी वर्गाला होणाऱ्या त्रासाबद्दल आ. प्रशांत ठाकूर यांनी आक्रमक भूमिका मांडत २०१८ साली इड्युस पार्क इंटरनॅशनल कंपनीला स्वीकृती पत्र देण्यात आले असतानाही अद्यापही काम सुरु झाले नसल्याने सदरचा ठेका रद्द करुन ताबडतोब नवीन ठेकेदाराची नियुक्ती करुन बस स्थानकाच्या विकास कामाला सुरुवात करण्याची आग्रही मागणी केली. नव्या बांधकाम नियमावलीमुळे (युडीसीपीआर) अतिरिक्त बांधकाम करावे लागत असल्याने आर्थिक नुकसान होत असल्याची तक्रार ठेकेदाराने केली. मात्र, या संदर्भामध्ये नियमांचे पालन करुनच काम करावे लागेल, असे निर्देश संबंधित ठेकेदाराला प्रधान सचिव पराग जैन यांनी दिले. त्या अनुषंगाने प्रधान सचिव जैन यांनी तातडीने कार्यवाही होण्यासाठी येत्या १५ दिवसाचा अल्टीमेटम संबंधित ठेकेदार इड्युस पार्क इंटरनॅशनल कंपनीला दिले आहे.
पनवेल एसटी स्थानकाचा वापर सर्वसामान्य गोरगरीब माणूस दैनंदिन कामासाठी करीत असून त्याला अनेक हालअपेष्टांना सामोरे जावे लागत आहे. तरी या संदर्भामध्ये ठेकेदाराला यापुढे एकही दिवसाची मुदत देऊ नये, अशी मागणी यावेळी आ. प्रशांत ठावूÀर यांच्या वतीने करण्यात आली. त्यावर सदर मागणी प्रधान सचिव पराग जैन यांनी मान्य केली असून एसटी बस स्थानकाच्या पुनर्विकास कामासंदर्भात पनवेल महापालिकाआयुक्त गणेश देशमुख यांनाही या कंत्राटाचे आराखडे मंजूर करण्यासंदर्भात सूचना केल्या असल्याचे त्यांनी नमूद केले. दरम्यान, सदर महत्वपूर्ण बैठकीमुळे आता पनवेल बस स्थानकाच्या पुनर्विकास कामाला लवकरच सुरुवात होईल, अशा अपेक्षा निर्माण झाल्या आहेत.
