पनवेल महापालिकाकडे ६ महिन्यात २०० कोटींचा कर भरणा
मालमत्ताकराच्या उच्चतम थकबाकीदारांना जप्तीपूर्व नोटीसा
पनवेल : महापालिकेचा मालमत्ता कर न भरलेल्या उच्चतम थकबाकीदारांना पनवेल महापालिकेच्या वतीने जप्तीपूर्व नोटीसा देण्यास सुरुवात करण्यात आली आहे. आत्तापर्यंत औद्योगिक १०० मालमत्तांना, निवासी ३०१ मालमत्तांना, वाणिज्य (कमर्शिअल) क्षेत्रातील ३४९ मालमत्ता अशा एकुण ७५० थकबाकीदारांना नोटीसा बजावण्यात आल्या आहेत. या कामासाठी खारघर, कळंबोली, कामोठे, पनवेल अशा चारही नोडमध्ये पनवेल महापालिकेची ८ पथके तैनात करण्यात आली आहेत.
महापालिकेच्या सर्व प्रस्तावित कामांसाठी मालमत्ता कर प्रमुख स्त्रोत आहे. तसेच न्यायालयानेही मालमत्ता कर वसुलीला स्थगिती दिलेली नाही. त्यामुळे महापालिका प्रशासन मालमत्ता कराच्या वसुलीवर भर देत आहे. मालमत्ता कराच्या वसुलीसाठी आता महापालिकेने पुढचे पाऊल टाकले आहे. महापालिकेने मालमत्ता कर न भरलेल्या औद्योगिक, निवासी, वाणिज्य (कमर्शिअल) क्षेत्रातील उच्चतम थकबाकीदारांना त्यांच्या स्थावर आणि जंगम मालमत्ता अटकावणी संबंधीच्या तसेच जप्तीपूर्व नोटीसा देण्यास सुरुवात केली आहे. त्यामुळे येत्या काळात जप्ती पूर्व नोटीसा दिलेल्या मालमत्ताधारकांनी मालमत्ता कर न भरल्यास त्यांच्या स्थावर मालमत्तांचा लिलाव करण्यात येणार आहे. जप्तीपूर्व नोटीसा देण्यासाठी महापालिकेच्या वतीने प्रत्येक प्रभागासाठी दोन अशी आठ पथके तयार केली आहेत. तसेच मालमत्तांधारकांना महापालिका कडून एसएमएस पाठविण्यात आले आहेत, अशी माहिती महापालिका आयुवत गणेश देशमुख यांनी दिली.
या आर्थिक वर्षामध्ये महापालिकेचा मालमत्ता कर भरणाऱ्या मालमत्ताधारकांकडून उत्तम प्रतिसाद दिसून येत आहे. एप्रिल महिन्यापासून ते १९ ऑक्टोबर पर्यंत २०० कोटी रुपयांची भर महापालिकेच्या तिजोरीमध्ये झाली आहे. आजपर्यंतच्या आर्थिक वर्षामध्ये सहा महिन्यामध्ये एवढ्या मोठ्या रक्कमेची करवसुली होण्याची सदर पहिलीच वेळ आहे. गेल्या चार वर्षांपासून ते आजपर्यंत ४७५ कोटींची वसुली करण्यात आली आहे. तसेच मालमत्ता कर न भरल्यास त्याच्या शास्तीमध्ये प्रतिमहा २ टक्क्यांची वाढ होत असल्याने दिवसेंदिवस मालमत्ता कर भरण्याकडे नागरिकांचा कल वाढू लागला आहे. याशिवाय ऑनलाईन पध्दतीने मालमत्ता कर भरल्यास शासकीय कर वगळता मालमत्ताधारकांना दोन टक्के सूट मिळत आहे, असे आयुवत गणेश देशमुख यांनी सांगितले.
मालमत्ता कर भरण्याबाबत नागरिकांमध्ये जनजागृती होण्यासाठी महापालिका कार्यक्षेत्रात रिक्षातून लाऊड स्पीकरच्या माध्यमातून जनजागृती केली जात आहे. ऑनलाईन पध्दतीने मालमत्ता कर भरल्यास मालमत्तांधारकांना दोन टक्क्यांची सूट देण्यात येत आहे. महापालिकने मालमत्ता कर ऑनलाईन भरण्यासाठी ‘PMC TAX APP’ असे मोबाईल ॲप विकसित केले आहे. तसेच www. panvelmc.org या वेबसाईटवर जाऊनही आपला मालमत्ता कर नागरिकांना भरता येणार आहे.
मालमत्तेचा मोबाईल नंबर अपडेट करण्यासाठी १८००५३२०३४० या टोल फ्री नंबरवर तसेच ८६६९९४१४८८ या व्हॉटस्ॲप नंबरवर आपले आधारकार्ड, सूची क्रमांक २ पाठवल्यास आपले मोबाईल नंबर अपडेट होऊन जातील. तसेच आपल्याला घर बसल्या आपला मालमत्ता कर भरता येईल. याबरोबरच किरकोळ दुरुस्त्याही करता येतील.
पनवेल महापालिकेच्या आजुबाजुच्या परिसरांमध्ये मोठ्या प्रमाणात विकास कामे सुरु आहेत. येत्या काळात पनवेल शहराचा चेहरा मोहरा बदलणार आहे. सध्या महापालिकाही विकासाच्या महत्वाच्या टप्प्यावर आहे. महापालिकेचा विकास आराखडा राबविताना प्रस्तावित कामांसाठी मालमत्ता कर हाच प्रमुख स्त्रोत आहे. नागरिकांनी मालमत्ता कराचा भरणा करुन महापालिकेला सहकार्य करावे. -गणेश देशमुख, आयुक्त-पनवेल महापालिका.
नागरिकांनी मालमत्ता खरेदी विक्री करताना मालमत्ता आयडी (युपीआयसी आयडी) नमूद करावा, असे आवाहन मालमत्ता कर विभागाच्या वतीने करण्यात आले आहे. जेणेकरुन मालमत्ता कर भरला आहे की नाही याची माहिती नागरिकांना त्वरित कळणार आहे. नागरिकांनी मालमत्ता खरेदी अथवा विक्री करताना महापालिकेचा मालमत्ता कर भरला आहे की नाही याची शहानिशा करुनच मालमत्ता खरेदी अथवा विक्री करावी. -गणेश शेटे, उपायुक्त-कर विभाग, पनवेल महापालिका.
