प्रमोद महाजन ग्रामीण कौशल्य विकास केंद्रांचे पंतप्रधानांच्या हस्ते लोकर्पण
कोकण विभागात ५४ कौशल्य विकास केंद्र कार्यान्वित
नवी मुंबई : तरुणांच्या रोजगार संधीसाठी आणि ग्रामीण भागाच्या विकासाला चालना देणाऱ्या ‘प्रमोद महाजन ग्रामीण कौशल्य विकास केंद्र'चा पंतप्रधान नरेंद्र मोदी यांच्या हस्ते दृक श्राव्य प्रणालीच्या माध्यमातून १९ ऑवटोबर रोजी शुभारंभ झाला. यावेळी सह्याद्री अतिथीगृह येथून मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्यासह कौशल्य, रोजगार, उद्योजकता-नाविन्यता मंत्री मंगल प्रभात लोढा, मुख्य सचिव मनोज सौनिक दृक श्राव्य प्रणाली माध्यमाद्वारे उपस्थित होते.
राज्यातील ५११ ग्रामपंचायतीमधील सदर केंद्रे एकाच वेळी सुरु करण्यात आली असून, त्यापैकी कोकण विभागात ५४ केंद्र १९ ऑवटोबर रोजी सुरु करण्यात आली.
महाराष्ट्रातील २८ हजार ग्रामपंचायतींमध्ये आजवर एकही कौशल्य विकास केंद्र नव्हते. पंतप्रधान नरेंद्र मोदी यांच्या संकल्पनेनुसार कौशल्य विकास केंद्र सुरु करण्याचा निर्णय घेतला. रोजगारासाठी तरुणांचे गावातून शहरात स्थलांतर होऊ नये या दृष्टीने कौशल्य विकास केंद्राची संकल्पना महत्त्वाची असून, भविष्यात राज्यातील या केंद्रांची संख्याही वाढवण्यात येणार आहे. सदर केंद्र ३४ जिल्ह्यांच्या ग्रामीण भागांमध्ये स्थापन करण्यात आली आहेत. कोकण विभागातील ठाणे जिल्ह्यात ९, पालघर जिल्ह्यात १२, रायगड जिल्ह्यात १४, रत्नागिरी जिल्ह्यात ११, तर सिंधुदूर्ग जिल्ह्यात ८ अशा एकूण ५४ कौशल्य विकास केंद्रांचे एकाच वेळी दृक श्राव्य प्रणालीद्वारे उद्घाटन झाले.
‘प्रमोद महाजन ग्रामीण कौशल्य विकास केंद्र'च्या लोकार्पण प्रसंगी कोंकण विभागीय आयुक्त डॉ.महेंद्र कल्याणकर यांनी पनवेल केंद्रावर उपस्थित राहून दृक श्राव्य प्रणाली द्वारे या कार्यक्रमात सहभाग घेतला. पनवेल केंद्र येथून आमदार प्रशांत ठाकूर, उपआयुक्त (विकास) गिरीश भालेराव, उपआयुक्त (कौशल्य विकास) डी. डी. पवार, पनवेल महापालिका उपायुक्त कैलाश गावडे, प्रगती स्किल डेव्हलपमेंटचे संचालक चव्हाण तसेच अधिकारी आणि कर्मचारी उपस्थित होते.
कोकण विभागात विविध ठिकाणी ‘प्रमोद महाजन ग्रामीण कौशल्य विकास केंद्र'च्या लोकार्पणाचा कार्यक्रम यशस्वीरित्या पार पाडणात आला. ठाणे येथे केंद्रीय राज्यमंत्री कपिल पाटील यांच्या उपस्थितीत कोन ग्रामपंचायत येथे कार्यक्रम संपन्न झाला. यावेळी जिल्हाधिकारी ठाणे अशोक शिनगारे उपस्थित होते. रायगड जिल्हाधिकारी डॉ. योगेश म्हसे यांनी चेंढरे ग्रामपंचायत केंद्र येथून कार्यक्रमामध्ये सहभाग घेतला. यावेळी सदर ठिकाणी १५०० युवक, युवती, विद्यार्थी उपस्थित होते. पालघर जिल्हाधिकारी गोविंद बोडके उमरोळी येथील ग्रामपंचायत येथून कार्यक्रमासाठी उपस्थित होते. पालघर जिल्ह्यात १२ ठिकाणी कार्यक्रम संपन्न झाला. रत्नागिरी जिल्ह्यात जिल्हाधिकारी एम. देवेंद्र सिंह यांच्या अध्यक्षतेखाली ११ ठिकाणी ‘कौशल्य विकास केंद्र'चा लोकार्पण संपन्न झाले. तर सिंधुदुर्ग जिल्ह्यात जिल्हाधिकारी किशोर तावडे यांच्या अध्यक्षतेखाली ८ ठिकाणी ‘प्रमोद महाजन ग्रामीण कौशल्य विकास केंद्र'चे लोकार्पण करण्यात आले.
कोकण विभागातील कौशल्य विकास कार्यक्रम यशस्वी करण्यासाठी जिल्हाधिकारी, मुख्य कार्यकारी अधिकारी, जिल्हा कौशल्य अधिकारी आणि अन्य विभागाच्या अधिकारी-कर्मचारी यांनी सक्रिय सहभाग घेतला होता. यावेळी विद्यार्थी-विद्यार्थिनी मोठ्या संख्येने उपस्थित होते.
