पनवेल महानगरपालिकेच्यावतीने नागरी प्राथमिक आरोग्य केंद्रामध्ये प्रत्येक शनिवारी आरोग्य मेळाव्याचे आयोजन
पनवेल महापालिका क्षेत्रातील नागरी प्राथमिक आरोग्य केंद्रांच्या वतीने आयुष्यमान भव: अंतर्गत ग्रामसभा
पनवेल : आयुक्त गणेश देशमुख यांच्या मार्गदर्शनाखाली आयुष्यमान भव: कार्यक्रमांतर्गत २ ऑक्टोबर रोजी सर्व नागरी प्राथमिक आरोग्य केंद्रांच्या वतीने ग्रामसभा घेण्यात आली. यावेळी सर्व नागरी प्राथमिक आरोग्य केंद्रातील वैद्यकिय अधिकाऱ्यांनी आयुष्यमान भव: कार्यक्रमांतर्गत घेण्यात येत असलेल्या विविध कार्यक्रमांची माहिती नागरिकांना दिली.
प्रत्येक स्तरावरील व्यक्तीला केंद्र शासनाच्या उत्कृष्ट दर्जाच्या आरोग्य सुविधा मिळाव्या यासाठी केंद्र शासनाने आयुष्यमान भव अभियान सुरू केले आहे. या अभियानांतर्गत महाराष्ट्र शासनाच्यावतीने साप्ताहिक आरोग्य मेळाव्याचे आयोजन करण्यात आले आहे. पनवेल महानगरपालिकेच्यावतीने आयुक्त गणेश देशमुख यांच्या मार्गदर्शनाखाली क्रमांक 1 ते 6 नागरी प्राथमिक आरोग्य केंद्रामध्ये प्रत्येक शनिवारी आरोग्य मेळाव्याचे आयोजन करण्यात आले आहे. नागरिकांनी या आरोग्य मेळाव्याचा लाभ घ्यावा असे आवाहन यावेळी करण्यात आले .
या अभियानांतर्गत दिनांक 30 डिसेंबरपर्यंत महिन्यातल्या पहिल्या शनिवारी असंसर्गजन्य आजार यामध्ये मधुमेह,उच्च रक्तदाब, किडनी आजार, दुसऱ्या शनिवारी संसर्गजन्य यामध्ये क्षयरोग, कुष्ठरोग, एचआयव्ही इत्यादींची तपासणी , तिसऱ्या शनिवारी माता बाल तपासणी , यामध्ये गरोदर माता, प्रसुती झालेल्या मातांची तपासणी करण्यात येत आहे. चौथ्या शनिवारी नाक, कान ,घसा, सिकलसेल, दंतरोग, उपशामक सेवा,नेत्ररोग, त्वचा आजार याबाबतची विशेष सत्रे या आरोग्य् मेळाव्यामध्ये घेण्यात येत आहे. या आरोग्य मेळाव्यामध्येच उपचार, संदर्भ सेवा याचबरोबर नागरिकांना आभा कार्ड, आयुष्यमान कार्ड नोंदणी वितरण याबाबतचे मार्गदर्शन करण्यात येत आहे. तसेच अवयव दान शपथ, व नोंदणी, रक्तदान चळवळ विषयीची माहितीही यावेळी देण्यात येत आहे.
