कोकण विभागातील शिक्षक, पदवीधरांनी मतदार नोंदणीसाठी सहभाग घेण्याचे कोकण आयुक्तांचे आवाहन
जास्तीत जास्त पदवीधरांनी तसेच शिक्षकांनी आपली नोंदणी करुन घ्यावी - डॉ. महेंद्र कल्याणकर
नवी मुंबई : मुंबई पदवीधर, मुंबई शिक्षक आणि कोकण पदवीधर मतदार संघासाठी नव्याने मतदार यादी तयार करण्यासाठी ‘भारत निवडणूक आयोग'कडून ३० सप्टेंबर ते ३० डिसेंबर २०२३ असा कालावधीत जाहीर करण्यात आला आहे. कोकण विभागातील पदवीधरांनी जास्तीत जास्त प्रमाणात मतदार नोंदणीसाठी सहभाग घ्यावा, असे आवाहन कोकण विभागीय आयुक्त डॉ. महेंद्र कल्याणकर यांनी केले.
भारत निवडणूक आयोगाकडून मुंबई पदवीधर, मुंबई शिक्षक आणि कोकण पदवीधर मतदारसंघासाठी नव्याने मतदार याद्या तयार करण्याच्या जाहीर करण्यात आलेल्या कार्यमक्रमानुसार ३० सप्टेंबर ते ३० डिसेंबर २०२ या कालावधीत मतदार नोंदणीसाठी जाहिर सूचना प्रसिध्द करणे, नमुना-१८ किंवा नमुना-१ द्वारे दावे आणि हरकती स्विकारणे, हस्तलिखिते तयार करणे आणि प्रारुप मतदार याद्यांची छपाई करणे, प्रारुप मतदार याद्यांची प्रसिध्दी करणे, दावे-हरकती निकाली काढून पुरवणी यादी तयार करुन छपाई करणे आदि कामे केली जाणार आहेत. त्यानंतर मतदार याद्यांची अंतिम प्रसिध्दी करण्यात येणार आहे.
शिक्षक मतदारसंघाच्या सध्या अस्तित्वात असलेल्या यादीमध्ये ज्या व्यक्तींची नावे समाविष्ट आहेत, अशा सर्व व्यक्तींना सुध्दा नवीन यादी तयार करताना विहीत नमुन्यात नव्याने अर्ज सादर करणे बंधनकारक आहे.
तसेच जी व्यक्ती भारताची नागरिक आहे आणि त्या मतदारसंघाची सर्वसाधारणपणे रहिवासी आहे तसेच त्याने दिनांक १ नोव्हेंबर २०२३ पूर्वी लगतच्या सहा वर्षांमध्ये राज्यातील एखाद्या माध्यमिक शैक्षणिक संस्थेमध्ये किमान तीन वर्ष अध्यापनाचे काम केलेले आहे, अशी व्यक्ती शिक्षक मतदार संघाच्या मतदार यादीमध्ये नाव समाविष्ट करण्यास पात्र राहणार आहे. शिक्षक मतदारसंघाच्या मतदार यादीत नाव दाखल करण्यासाठी सादर केलेल्या नमुना १९ मधील अर्जासोबत संबंधित व्यक्तीने दिनांक १ नोव्हेंबर २०२३ पूर्वी लगतच्या सहा वर्षांमध्ये माध्यमिक शाळेच्या शैक्षणिक संस्थेमध्ये किमान तीन वर्ष अध्यापनाचे काम केले असल्याबाबत शैक्षणिक संस्था प्रमुखाचे प्रमाणपत्र जोडणे आवश्यक आहे. तर पदवीधर मतदार संघाच्या सध्या अस्तित्वात असलेल्या यादीमध्ये ज्या व्यक्तिींची नावे समाविष्ट आहेत, अशा सर्व व्यक्तींना सुध्दा नवीन यादी तयार करताना विहीत नमुन्यात नव्याने अर्ज सादर करणे बंधनकारक आहे. जी व्यक्ती भारताची नागरिक आहे आणि त्या मतदार संघातील सर्वसाधारण रहिवासी आहे आणि ती १ नोव्हेंबर २०२३ पूर्वी किमान ३ वर्षे भारताच्या राज्यक्षेत्रातील विद्यापीठाची पदवीधर असेल किंवा त्याच्याशी समतुल्य असलेली अर्हता धारण केलेली अशी प्रत्येक व्यक्ती पदवीधर मतदार संघाच्या मतदार यादीमध्ये नाव समाविष्ट करण्यास पात्र राहणार आहे. नमुना १८ मधील अर्जासोबत पदवीशी समतुल्य म्हणून निर्दिष्ट करण्यात आलेली अर्हता (एजम्ग्गि् ैंल्ीत्ग्ग्मि्ीूग्दहे) स्वसाक्षांकीत केलेला पुरावा आणि अतिरिक्त पदनिर्देशित अधिकाऱ्यांनी अधिप्रमाणीत करुन जोडणे आवश्यक आहे.
नमुना १८ मधील छापील अर्ज मतदार नोंदणी अधिकारी, सहाय्यक मतदार नोंदणी अधिकारी, पदनिर्देशित अधिकारी यांच्या कार्यालयाकडून मिळविता येणार असून हस्तलिखीत टंकलिखीत चक्रमुद्रीत किंवा खाजगीरित्या छापलेले अर्ज देखील स्वीकारले जातील. खोटे निवेदन आण खोटी माहिती देणाऱ्या व्यक्ती विरोधात लोकप्रतिनिधीत्व अधिनियम १९५० चे कलम ३१ अन्वये कारवाई करण्यात येणार आहे.
पदवीधर मतदार संघातील पदवीधर मतदारांची संख्या वाढावी यासाठी ठिकठिकाणी कॅम्प घेऊन त्याच ठिकाणी पदवीधरांची नोंदणी करुन घेण्याच्या तसेच विद्यापीठात जाऊन माहिती देण्याचे तसेच कँम्प घेण्याचे जिल्हाधिकाऱ्यांना सूचित करण्यात आले आहे. त्याचप्रमाणे शाळेत जाऊन शिक्षकांची सुध्दा नोंदणी करुन घेण्यासंदर्भात सूचना देण्यात आल्या आहेत. जास्तीत जास्त पदवीधरांनी तसेच शिक्षकांनी आपली नोंदणी करुन घ्यावी. - डॉ. महेंद्र कल्याणकर, आयुवत-कोकण विभाग.
