महापालिका प्रशासनाचे प्रसारमाध्यम प्रतिनिधींसमवेत दिवाळी स्नेह संमेलन
प्रसारमाध्यमे नागरिक - महापालिका यांच्यातील महत्वाचा दुवा -आयुवत नार्वेकर
नवी मुंबई : नवी मुंबई महापालिका मार्फत करण्यात येणाऱ्या लोकोपयोगी कामांची, प्रकल्पांची माहिती नागरिकांपर्यंत पोहोचविण्याचे काम प्रसार माध्यमांमार्फत होत असून नागरिकांच्याही अडी-अडचणी, मागण्या यादेखील प्रशासनापर्यंत प्रसार माध्यमांमार्फत पोहोचत असतात. प्रसारमाध्यमे नागरिक आणि महापालिका यांच्यामधील अत्यंत महत्वाचा दुवा असून देशातील सर्वात मोठ्या प्रमाणात साजऱ्या होणाऱ्या दिवाळी सणानिमित्ताने माध्यम प्रतिनिधींशी संवाद व्हावा आणि विचारांचे, शुभेच्छांचे आदान-प्रदान व्हावे याकरिता दिवाळी स्नेहसंमेलन सारखा उपक्रम राबविण्याचे ठरविले अन् या उपक्रमाला इतक्या मोठ्या प्रमाणात उत्साही प्रतिसाद देऊन उपक्रम यशस्वी केल्याबद्दल माध्यम प्रतिनिधींचे महापालिका आयुक्त राजेश नार्वेकर यांनी आभार मानले.
दिवाळी सणाच्या पार्श्वभूमीवर आयुक्त राजेश नार्वेकर यांच्या संकल्पनेतून प्रसारमाध्यम प्रतिनिधींसमवेत दिवाळी स्नेहसंमेलनाचे आयोजन ९ नोव्हेंबर रोजी महापालिका मुख्यालयात करण्यात आले होते. यावेळी विविध वृत्तपत्रे आणि वृत्तचित्रवाहिन्यांचे प्रतिनिधी, कॅमेरामन मोठ्या संख्येने उपस्थित होते. याप्रसंगी अतिरिक्त आयुक्त सुजाता ढोले, विजयकुमार म्हसाळ, शहर अभियंता संजय देसाई, मुख्य लेखा-वित्त अधिकारी सत्यवान उबाळे, मुख्य लेखा परीक्षक जितेंद्र इंगळे, उपायुक्त मंगला माळवे, ललिता बाबर, दत्तात्रय घनवट, महापालिका सचिव चित्रा बाविस्कर, वैद्यकीय आरोग्य अधिकारी डॉ. प्रशांत जवादे आणि इतर अधिकारी उपस्थित होते.
यावेळी प्रसारमाध्यम प्रतिनिधींच्या वतीने मनोगत व्यक्त करताना प्रवीण पुरो यांनी आयुक्तांमार्फत प्रसारमाध्यम प्रतिनिधींसमवेत दिवाळी फराळासह स्नेहसंमेलनाचे आयोजनाची संकल्पनाच सकारात्मक भावना निर्माण करणारी असल्याचे सांगितले. अशाप्रकारे आयुक्तांनी पुढाकार घेऊन प्रसारमाध्यम प्रतिनिधींशी संवादी असणे यामधून माणसे जोडण्याचा त्यांच्या व्यक्तिमत्वाचे दर्शन घडते, असेही ते म्हणाले. दरम्यान, सदरचा अत्यंत स्तुत्य उपक्रम असल्याचे अभिप्राय देत सर्व पत्रकार बंधू-भगिनींच्या वतीनेही आयुक्त राजेश नार्वेकर आणि महापालिका प्रशासनास दिवाळी शुभेच्छा प्रदान करण्यात आल्या.
