‘गडकरी रंगायतन'चे लवकरच नुतनीकरण
ठाणे : ठाणे महापालिकेच्या राम गणेश गडकरी रंगायतन या नाट्यगृहाचे नुतनीकरण नाट्यकर्मी आणि रसिक प्रेक्षक यांच्यासाठी सुविधा देणारे असावे. तसेच ते नेटकेपणाने केले जावे, अशी अपेक्षा ज्येष्ठ अभिनेते, निर्माते तथा ‘अखिल भारतीय नाट्य परिषद'चे अध्यक्ष प्रशांत दामले यांनी व्यक्त केली आहे.
ठाणे शहराची असलेल्या तसेच नाट्यकर्मी आणि नाट्य रसिकांची पहिली पसंती असलेल्या राम गणेश गडकरी रंगायतन नाट्यगृहातील नुतनीकरणासाठी मुख्यमंत्री एकनाथ शिंदे यांनी ८ कोटी रुपयांचा निधी मंजूर केला आहे. या नुतनीकरणाचा आराखडा तयार करण्याचे काम सध्या सुरु असून त्या दृष्टीने नाट्यकर्मींच्या सूचना जाणून घ्ोण्याचे निर्देश महापालिका आयुक्त अभिजीत बांगर यांनी दिले आहेत. त्यानुसार ‘अखिल भारतीय नाट्य परिषद'चे अध्यक्ष प्रशांत दामले, नगर अभियंता प्रशांत सोनाग्रा, उपायुक्त (माहिती-जनसंपर्क) उमेश बिरारी, उपनगर अभियंता विकास ढोले, उपनगर अभियंता शुभांगी केसवानी, कार्यकारी अभियंता प्रशांत पाठक यांची नुकतीच बैठक गडकरी रंगायतन येेथे झाली. त्यात रंगायतनमधील तांत्रिक आणि अतांत्रिक सुधारणांची चर्चा करण्यात आली.
या बैठकीत ‘गडकरी रंगायतन'च्या नुतनीकरणात आसनव्यवस्था बदलताना सध्या असलेली खुर्च्यांची संख्या कमी केली जाऊ नये, प्रेक्षकांसाठी लिपटची सोय केली जावी आणि स्वच्छतागृहे नियमितपणे स्वच्छ राहतील, याची काळजी घेतली जावी, अशा काही सूचना दामले यांनी केल्या. तसेच रंगायतनची ध्वनीक्षेपण यंत्रणा चांगली आहे; मात्र बाल्कनीतील प्रेक्षकांना अधिक सुस्पष्ट ऐकू येण्यासाठी तिथे जास्तीचे स्पीकर बसवण्यात यावेत, असेही दामले यांनी सांगितले. रंगमंच, ग्रीन रुम आदिंबाबत त्यांनी त्यांची निरीक्षणे नोंदवली.
‘रंगायतन'मधील कार्यक्रम सुरु ठेवून करता येणारे दुरुस्ती काम आणि रंगायतन बंद ठेवून करायचे दुरुस्ती काम याचे नियोजन करण्याचे निर्देश आयुक्त बांगर यांनी दिले आहेत. त्यानुसार दुरुस्तीचे काम लवकरच हाती घेतले जाणार आहे, असल्याची माहिती उपायुक्त उमेश बिरारी यांनी दिली.
नुतनीकरणासाठी ८ कोटींचा निधी...
‘गडकरी रंगायतन'मध्ये रंगकर्मींना तसेच प्रेक्षकांना जाणवणाऱ्या गैरसोयींबद्दल तक्रारी आणि सूचना मुख्यमंत्री शिंदे यांच्याकडे व्यक्त करण्यात आल्या होत्या. त्यासंदर्भात मुख्यमंत्री शिंदे यांनी दिलेल्या निर्देशानुसार, महापालिका आयुक्त अभिजीत बांगर यांनी प्रत्यक्ष पाहणी केली. तसेच ‘रंगायतन'च्या वास्तुचे स्ट्रक्चरल ऑडिट करण्यात आले. त्यात मूळ वास्तू सुस्थितीत असून अंतर्गत रचना आणि सुविधा यात आमुलाग्र बदल करण्याची गरज असल्याचे स्पष्ट झाले. त्याप्रमाणे ‘गडकरी रंगायतन'च्या नुतनीकरणाचा प्रस्ताव ठाणे महापालिकेने राज्य सरकारकडे देण्यात आला होता. त्यास मंजुरी मिळाली असून त्यासाठी ८ कोटी रुपयांचा निधी मंजूर झाला आहे.
१८ वर्षांनी नुतनीकरण...
सन १९७८मध्ये बांधण्यात आलेल्या ‘गडकरी रंगायतन'ची २००५ मध्ये मोठ्या प्रमाणावर दुरुस्ती करण्यात आली होती. त्यानंतर आता १८ वर्षांनी नुतनीकरण होत आहे. ‘रंगायतन'ची आसनक्षमता १०८० एवढी आहे. ‘गडकरी रंगायतन'चे नुतनीकरण करताना प्रामुख्याने मुख्य वास्तुचे मजबुतीकरण, तालीम हॉलचे नुतनीकरण, मुख्य प्रेक्षागृहातील संपूर्ण आसनव्यवस्था बदलणे, रंगकर्मी यांच्यासाठी असलेल्या ग्रीन रुममध्ये आवश्यक सुधारणा, रंगमंच-पलोरिंग अद्ययावत करणे, वातानुकूलन यंत्रणेत सुधारणा, शौचालयांचे संपूर्ण अद्यावतीकरण, आदि कामांचा समावेश आहे.
