वाशीमधील ‘महाराष्ट्र भवन’ कामाची आ. मंदाताई म्हात्रे यांनी केली पाहणी
एपीएमसी मसाला बाजारात छताचे प्लास्टर जमिनीवर
वाशी : वाशी मधील मुंबई कृषि उत्पन्न बाजार समिती (एपीएमसी) आवारातील मसाला मार्केट मधील के आणि जे विंग पॅसेजमधील छताचे प्लास्टर कोसळले आहे. सदर घटना २५ जुलै रोजी घडली असून, छताचा प्लास्टर कोसळला त्यावेळी त्याठिकाणी कोणीही उपस्थित नसल्याने जीवितहानी टळली आहे. मात्र, या घटनेने एपीएमसी बाजारातील धोकादायक इमारतींचा प्रश्न पुन्हा एकदा ऐरणीवर आला आहे.
एपीएमसी मार्केट मधील धोकादायक इमारतींचा प्रश्न वर्षानुवर्षे रेंगाळत आहे. एपीएमसी कांदा-बटाटा बाजारातील काही इमारती आणि मसाला बाजारातील मध्यवर्ती इमारत अतिधोकादायक यादीत समाविष्ट आहे. मागील महिन्यात एपीएमसी सचिवांच्या दालनातील छताचे प्लास्टर पडले होता.त्यादिवशी ‘ईद'ची सुट्टी असल्याने एपीएमसी सचिव थोडक्यात बचावले. सदर घटना ताजी असतानाच २५ जुलै रोजी एपीएमसी मसाला बाजारातील के आणि जे विंग मधील छताचे प्लास्टर कोसळले. मात्र, या घटनेत कोणतीही जीवितहानी झाली नाही. मागील काही वर्षांपासून एपीएमसी कांदा-बटाटा बाजारातील कमानी सज्जा कोसळण्याच्या घटना घडत आहेत. एपीएमसी बाजार आवारातील काही ठिकाणी छताला लोखंडी टेकू देऊन कारभार सुरु आहे. वर्षानुवर्षे एपीएमसी बाजारातील इमारती धोकादायक यादीत समाविष्ट होऊन देखील या ठिकाणी कोणतीही ठोस पावले उचलली जात नाहीत. याच दरम्यान एपीएमसी बाजारातील छताचा भाग, सज्जा कोसळण्याच्या घटना देखील घडत आहेत. मात्र, सुदैवाने यामध्ये आतापर्यंत कोणतीही जीवितहानी झालेली नाही. मात्र, एपीएमसी मार्केट मध्ये जीवितहानी किंवा मोठी दुर्घटना घडल्यास प्रशासनाला जाग येणार आहे का?, असा प्रश्न व्यापारी उपस्थित करीत आहेत. एपीएमसी बाजाराची पुनर्बांधणी किंवा दुरुस्ती होणे आवश्यक आहे, असे मत व्यापारी व्यक्त करीत आहेत.
