वाशीमधील ‘महाराष्ट्र भवन’ कामाची आ. मंदाताई म्हात्रे यांनी केली पाहणी
ओवळे खाडीत प्रकल्पग्रस्तांचे जलसमाधी आंदोलन
नवीन पनवेल : नवी मुंबई आंतरराष्ट्रीय विमानतळ बाधित प्रकल्पग्रस्तांनी सिडको आणि अदानी कंपनीकडून होणाऱ्या त्रासाच्या निषेधार्थ नवी मुंबई विमानतळ प्रकल्पग्रस्तांनी ओवळे फाटा येथील खाडीत जलसमाधी आंदोलन करण्यात आले. या आंदोलनात शेकडो प्रकल्पग्रस्त सहभागी झाले होते.
नवी मुंबई आंतरराष्ट्रीय विमानतळ प्रकल्पामध्ये स्थानिक प्रकल्पग्रस्तांना नोकरी आणि रोजगार मिळाला पाहिजे, नवी मुंबई आंतरराष्ट्रीय विमानतळ भराव, नदीपात्रामुळे पूरग्रस्त आणि ब्लास्टिंगच्या कामामुळे ओवळे, दापोली, पारगांव, डुंगी, भंगारपाडा या गावांचे पुनर्वसन त्वरित करावे. नवी मुंबई आंतरराष्ट्रीय विमानतळाला जमीन संपादन करुन ६ वर्षे झाली त्याचे नुकसान भरपाई द्यावी. युडीसीपीआर येण्यास उशीर झाल्याने बांधकाम परवानगी वाढवून देणे या मागण्यांसाठी प्रकल्पग्रस्तांनी १२ जुलै रोजी ओवळे खाडीमध्ये जलसमाधी आंदोलन केले. यावेळी प्रकल्पग्रस्तांनी सिडको विरोधात घोषणा दिल्या. यावेळी प्रत्येक गावाला खेळाचे मैदान मिळाले पाहिजे, विमानतळाला लोकनेते दि. बा. पाटील यांचे नाव त्वरित द्यावे यादेखील मागण्या विमानतळ प्रकल्पग्रस्तांकडून करण्यात आल्या.
नवी मुंबई विमानतळ बाधित प्रकल्पग्रस्तांनी ओवळे खाडीत जलसमाधी आंदोलन केले. यावेळी पोलिसांनी त्यांना समजावण्याचा प्रयत्न केला. मात्र, ‘सिडको'चे अधिकारी आल्याशिवाय आम्ही बाहेर निघणार नाही अन्यथा याच नदीत खाडीत जलसमाधी घेऊ, असे प्रकल्पग्रस्तांनी सांगितले. त्यानंतर ‘सिडको'च्या अधिकाऱ्यांनी ओवळे खाडीजवळ येऊन प्रकल्पग्रस्तांच्या मागण्या ऐकून घेत त्यांना आश्वासित केले.
दरम्यान, येत्या ३० जुलै पर्यंत मागण्या मान्य झाल्या नाहीत तर आणखी उग्र आंदोलन करुन विमानतळाचे काम बंद आंदोलन केले जाईल, असा इशारा यावेळी प्रकल्पग्रस्त नेत्यांकडून देण्यात आला.
