वाशीमधील ‘महाराष्ट्र भवन’ कामाची आ. मंदाताई म्हात्रे यांनी केली पाहणी
‘उरण नगरपरिषद' नवीन प्रशासकीय इमारत उद्घाटनाच्या प्रतिक्षेत
उरण : ‘उरण नगरपरिषद'ने नव्याने बांधलेल्या प्रशासकीय इमारत, फुल मार्केट आणि समाज मंदिराचे लवकरच उद्घाटन करण्यात येणार असल्याचे संकेत अधिकाऱ्यांनी दिले आहेत. आचारसंहिता आणि विधिमंडळाचे अधिवेशन यामुळे सदर ३ इमारतींचे उदघाटन काहीसे लांबणीवर पडले होते. आमदार महेश बालदी यांच्या प्रयत्नातून सदर विकासकामे करण्यात आली आहेत.
‘उरण नगरपरिषद'ची अत्याधुनिक प्रशासकीय इमारत जवळपास पूर्ण झाली असून येत्या महिनाभरात या इमारतीचे उद्घाटन करण्यात येणार आहे. या इमारतीतील फर्निचर आणि काही किरकोळ कामे वगळता सुसज्ज इमारत पूर्ण झाली आहे. ६.५० कोटी खर्चातून उभारण्यात आलेल्या सदर प्रशासकीय कार्यालयाचे काम सध्या वेगाने करण्यात आले आहे. या इमारतीत कार्यालयाच्या फर्निचरसाठी ३.५० लाख खर्च करण्यात येणार आहे.
५० कोटींहून अधिक वार्षिक बजेट असलेल्या ‘उरण नगरपरिषद'ला ८ वर्षांत नियोजित प्रशासकीय इमारतीचे बांधकाम पूर्ण करता आलेले नाही. त्यामुळे कर्मचाऱ्यांना पावसाळ्यामध्ये गळक्या, जुन्या इमारतीच्या छताखाली कामकाज करावे लागत आहे. ‘नगरपरिषद'चे कामकाज वाढले असून सुसज्ज आणि प्रशस्त अशा जागेची आवश्यकता आहे. १८ व्या शतकातील ‘उरण नगरपरिषद'ने १५० पेक्षा अधिक वर्षांचा कालावधी पूर्ण केला आहे. नागरीकरण वाढल्याने व्यवसाय आणि व्यवहारांतही वाढ झाली आहे. त्यामुळे या शहराचा कारभार हाकण्यासाठी अद्ययावत कार्यालयाची आवश्यकता होती.
२५ हजार चौरस फुट क्षेत्रात उभारण्यात येत असलेल्या दुमजली इमारतीच्या तळमजल्यावर २० वाहनांसाठी पार्किंग, पहिल्या मजल्यावर प्रशासकीय कार्यालये, दुसऱ्या मजल्यावर अद्ययावत सभागृह आणि ‘उरण नगरपरिषद'ला आर्थिक उत्पन्न मिळवून देण्यासाठी व्यापारी बांधकाम करण्यात येणार आहे. दुसरीकडे ‘उरण नगरपरिषद'ने ५.२५ कोटी रुपये खर्च करुन नवीन समाज मंदिर बांधले आहे. तर फुल मार्केटची इमारत नव्याने बांधली असून त्यासाठी ४.११ कोटी रुपये खर्च करण्यात आले आहे. सदर तीनही इमारती बांधून पुर्ण झाल्या असून त्या सध्या उद्घाटनाच्या प्रतिक्षेत आहेत.
नियोजित प्रशासकीय इमारतीचे, फुल मार्केट आणि समाज मंदिराच्या इमारतींचे बांधकाम पूर्ण झाले आहे. प्रशासकीय इमारतीच्या फर्निचरची ऑर्डर दिली आहे. त्यामुळे महिनाअखेरपर्यंत काम पूर्ण होऊन नवीन इमारतीचा उद्घाटन सोहळा पार पडून तेथे कार्यालय सुरु होईल. -समीर जाधव, मुख्याधिकारी-उरण नगरपरिषद.
