छत्रपती शिवाजी महाराज रुग्णालयाच्या प्रसुती विभागात खाटांमध्ये वाढ
‘जल जीवन मिशन'च्या कामांना गती द्या; अन्यथा कारवाई
पुढील २ महिन्यांत ‘जल जीवन मिशन'चे काम पूर्ण करण्याचे आदेश
ठाणे : जल जीवन मिशन अंतर्गत ठाणे जिल्ह्यातील प्रगतीपथावर असलेल्या कामांची प्रभावी अंमलबजावणी होऊन कामे जलद गतीने पूर्ण होण्याच्या दृष्टीने ‘जिल्हा परिषद'च्या मुख्य कार्यकारी अधिकारी छायादेवी शिसोदे यांच्या अध्यक्षतेखाली १३ जून रोजी आढावा बैठक पार पडली. या बैठकीत जल जीवन मिशन अंतर्गत एवूÀण ७२० कामे मंजुर असून त्यापैकी १२८ योजनांची कामे पूर्ण झालेली आहेत. ५९२ योजनांची कामे प्रगतीपथावर आहेत. आढावा बैठकीत प्रगतीपथावर असलेल्या योजनांचा तपशिलवार आढावा घेण्यात आला.
‘जल जीवन मिशन'च्या संबंधित ठेकेदारांना योजनांच्या कामांची गती तात्काळ वाढवून कामे पुढील २ महिन्यात पूर्ण करण्याचे आदेश यावेळी मुख्य कार्यकारी अधिकारी शिसोदे यांनी दिले. तसेच ठेकेदारांना प्रत्यक्ष काम करत असताना उद्भवणाऱ्या अडचणींबाबत यावेळी चर्चा करण्यात आली. या अडचणींवर योग्य मार्गदर्शन करण्यात आले असून कामे विहीत मुदतीत पूर्ण न झाल्यास संबंधित ठेकेदारांवर कार्यवाही करण्यात येईल, असा इशारी सीईओ शिसोदे यांनी दिला.
सदर बैठकीस कार्यकारी अभियंता प्रदीप कुलकर्णी, उपकार्यकारी अभियंता चेतना पाटील, उपअभियंता जाधव (शहापूर विकास), प्रकाश सासे (भिवंडी), जगदीश बनकारी (मुरबाड), आशिष कटरे (कल्याण), अमित शिंदे (अंबरनाथ), केतन चौधरी (ठाणे), प्रकल्प व्यवस्थापन सल्लागार एन.जे.एस., नाबार्ड अंभियंता तसेच ठेकेदार उपस्थित होते.
योग्य गुणवत्ता आणि दर्जा राखुन कामे करावीत याबाबत संबंधित ठेकेदार यांनी खबरदारी घ्यावी. तसेच कामांचे सनियंत्रण- मार्गदर्शन करण्यासाठी राज्य स्तरावरुन नेमण्यात आलेल्या प्रकल्प व्यवस्थापन सल्लागार यांचे अभियंता यांनी ‘जल जीवन मिशन'च्या नियमाचे काटेकोरपणे पालन करुन संबंधित ठेकेदार यांच्यामार्फत कामे करुन घ्यावीत, अशा सूचना देखील बैठकीत देण्यात आल्या आहेत.
दरम्यान, पाणी पुरवठा उपविभागातील अभियंता यांनी केल्या जाणाऱ्या कामांबाबत खबरदारी बाळगून ठेकेदार आणि प्रकल्प व्यवस्थापन सल्लागार यांच्यावर योग्य नियंत्रण ठेऊन कामे करावीत. त्यामुळे ठाणे जिल्ह्यातील ग्रामीण भागातील गांव, पाड्यांतील ग्रामस्थांना पाण्याची कायम स्वरुपी व्यवस्था होणार असून पाणी टंचाईवर मात करणे शक्य होणार असल्याचे सांगितले.
