वाशीमधील ‘महाराष्ट्र भवन’ कामाची आ. मंदाताई म्हात्रे यांनी केली पाहणी
उरणच्या मच्छी मार्केट मध्ये माशांची आवक वाढली
उरण : सध्या समुद्रात मिळणाऱ्या कोळंबी, पापलेट, सुरमई, हलवा, बला, मांदेली, बोंबील, जिताडा, माकुल सारख्या मासळीची आवक उरणच्या मच्छी मार्केट मध्ये वाढल्याने खवय्यांची गर्दी मार्केट मध्ये वाढू लागली आहे. एकंदरीत बंदी काळातही उरणच्या मच्छी मार्केट मध्ये समुद्रातील मासे उपलब्ध होत असल्याने नागरिकांनी समाधान व्यक्त केले आहे.
शासनाने १ जून ते ३१ जुलै २०२४ या दोन महिन्यांच्या कालावधीत समुद्रातील मासेमारीला बंदी घातली आहे. परंतु, सदरचा नियम मत्स्य विभाग परवाना अधिकारी आणि पोलीस यंत्रणा यांच्या कृपाआशिर्वादाने करंजा, मोरा, दिघोडे, केळवणे, कोप्रोली, दादर, भाल या परिसरातील मासेमारी करणाऱ्या बांधवांना लागू होत नसल्याने येथील मच्छीमार भर पावसाळ्यात आपल्या बोटी समुद्रात घेऊन जात असल्याचे चित्र पहावयास मिळत आहे. त्यामुळे त्यांनी पकडून आणलेल्या माशांची विक्री सर्रासपणे उरणच्या मच्छी मार्केट मध्ये होताना दिसत आहे.
दरम्यान, बंदी काळातही उरणच्या मच्छी मार्केट मध्ये कोळंबी, पापलेट, सुरमई, हलवा, बला, मांदेली, बोंबील, जिताडा, माकुल सारखे समुद्रातील चविष्ट मासे उपलब्ध होत असल्याने मासे खवय्यांनी समाधान व्यक्त केले आहे.
