नवी मुंबई महापालिका आयुक्त निवासस्थान पत्त्यावर १५० मतदारांची नोंद
खारघर-सीबीडी कोस्टल रोडला ग्रीन सिग्नल
खारघर : खारघर ते सीबीडी ३० मीटर रुंदीच्या कोस्टल रोड उभारणीला भारत सरकारच्या ‘पर्यावरण, वन आणि हवामान बदल मंत्रालय'ने परवानगी दिल्यामुळे ८ वर्षांपासून रखडलेल्या खारघर ते सीबीडी खाडीकिनारा कोस्टल रोडचा प्रश्न मार्गी लागणार आहे. त्यामुळे प्रवाशांची वाहतुकीतून सुटका होणार असून कळंबोली, कामोठे आणि खारघरवासियांना नवी मुंबई विमानतळ गाठणे आता सोयीचे होणार आहे.
‘सिडको'ने नवी मुंबई प्रकल्प उभारण्याचा संकल्प हाती घेताना तळोजा, कळंबोली आणि खारघरवासियांना नवी मुंबई विमानतळ विना अडथळा जाता यावे यासाठी ‘सिडको'ने खारघर ते सीबीडी खाडीकिनारा ६.९६ किलोमीटर लांबीच्या कोस्टल रोडसाठी २०१८ साली निविदा काढली काढून २७३ कोटीचे कंत्राट एका कंपनीला देण्यात आले होते. मात्र, सदर प्रकल्पाला पर्यावरण विभागाकडून परवानगीसाठी ‘सिडको'कडून प्रयत्न सुरु होते. मात्र, त्याला यश मिळत नव्हते. अखेर ऑगस्ट महिन्याच्या पहिल्या आठवड्यात केंद्र सरकारच्या ‘पर्यावरण, वन आणि हवामान बदल मंत्रालय'च्या ‘तज्ञ मूल्यांकन समिती'ने कोस्टल रेग्युलेशन झोन नुसार खारघर ते सीबीडी-बेलापूर, सेक्टर-१५ दरम्यान उभारल्या जाणाऱ्या कोस्टल रोडच्या बांधकामाला परवानगी दिली दिल्यामुळे खारघर ते सीबीडी दरम्यान होणाऱ्या वाहतूक कोंडीतून प्रवाशांची सुटका होणार आहे.
खारघर रेल्वे स्थानकाच्या मागे ‘सिडको'कडून पंतप्रधान आवास योजनातून जवळपास २ हजाराहून अधिक घरे उभारली जात आहे. सदर प्रकल्प कोस्टल रोड आणि खारघर रेल्वे स्थानकाला लागून असल्यामुळे येथील घरांना अधिक मागणी असणार असून अनेकांचे या गृहनिर्माण प्रकल्पाकडे लक्ष लागले आहे.
कोस्टल रोडचेे फायदेः
पुणे-मुंबईकडे जाणाऱ्या नागरिकांना नवी मुंबई पामबीच आणि कोस्टल रोडने थेट खारघर टोल नाक्यावर पर्यंत विना अडथळा येता येणार आहे.
खारघर ते सीबीडी सेक्टर-१५ खाडीकिनारा अंदाजे ६.९६ किलोमीटर अंतराचा कोस्टल रोड आहे. तळोजा-खारघर मधील नागरिकांना सीबीडी, सेक्टर-११ मार्गे मार्गे नवी मुंबई विमानतळावर विना अडथळा जाता येणार आहे.
खारघर-सीबीडी दरम्यान होणारी वाहतूक कोंडी सुटण्यास मदत होणार आहे.
कोस्टल रोड मुळे खारघर कार्पोरेट पार्क, फुटबॉल स्टेडियमचा प्रवास सुखाचा होणार आहे.
खारघर टोल नाका दरम्यान सायन-पनवेल महामार्गावर पुल उभारुन रस्ता केला जाणारा असल्यामुळे भविष्यात खारघर सेक्टर-१५, १६ ते १८ येथील घरांना अधिक मागणी असणार आहे.
केंद्र सरकारच्या ‘पर्यावरण विभाग'कडून खारघर-सीबीडी बेलापूर कोस्टल रोडला मंजुरी मिळाली आहे. या प्रकल्पामुळे खारघर-बेलापूर-नेरुळ कोस्टल रोड सायन-पनवेल रोडचा नवीन दुवा आहे. शिवाय या रस्त्यामुळे खारघर-तळोजा येथील कॉर्पोरेट पार्क, ‘सिडको'च्या गृहनिर्माण प्रकल्पात वास्तव्य करणाऱ्या नागरिक तसेच नवी मुंबई विमानतळ पर्यंत पर्यायी रस्ता उपलब्ध होणार आहे.
-प्रिया रातांबे, जनसंपर्क अधिकारी-सिडको.
