नवी मुंबई महापालिका आयुक्त निवासस्थान पत्त्यावर १५० मतदारांची नोंद
ठाणे जिल्हा परिषद मार्फत ५ समुपदेशन केंद्र
ठाणे : ठाणे जिल्हा परिषद महिला आणि बालविकास विभाग मार्फत २०२४-२०२५ या आर्थिक वर्षात महिलांसाठी विशेष योजना अंतर्गत महिलांसाठी समुपदेशन केंद्र चालवण्यात येत आहे. ‘ठाणे जिल्हा परिषद'चे मुख्य कार्यकारी अधिकारी रोहन घुगे यांच्या मार्गदर्शनाने ठाणे जिल्ह्यात ५ समुपदेशन केंद्र सुरु असून, प्रत्येक केंद्रासाठी संस्थेमार्फत समुपदेशक, विधीसल्लागार यांची नियुक्ती करण्यात आली आहे.
कौटुंबिक हिंसा, छळ, मारहाण आदी प्रकारांनी त्रासलेल्या महिलांना योग्य मार्गदर्शन करण्यासाठी समुपदेशन केंद्र मध्ये तज्ञ मार्गदर्शक नेमले गेले आहेत. नियुक्त कर्मचारी, अधिकारी पीडित महिलांची समस्या जाणून घेऊन पीडित महिलेस असलेली समस्या?, त्यावर कायदेशीर मार्ग कोणत आहेत?, याबाबत सल्ला देत आहेत. एकंदरीत सल्ला घेण्यासाठी आलेल्या पीडित महिलांना सामाजिक, मानसशास्त्रीय, कायदेशीर समुपदेशन या केंद्रात केले जाते. महिलांचे समुपदेशन करण्यासाठी कार्यालयीन वेळेत कामकाज सुरु आहे, अशी माहिती ठाणे जिल्हा कार्यक्रम अधिकारी संजय बागुल यांनी दिली.
समुपदेशन केंद्र मध्ये महिलांना कायदेशीर मदत, मानसोपचार तज्ज्ञांची मदत, पोलिसांची मदत मिळवून दिली जाते. यासाठी ठाणे जिल्हा पातळीवरील संस्थेला विधी सल्लागार आणि समुपदेशन यांना प्रत्येकी दरमहा १२ हजार रुपये तर तालुका पातळीवरील संस्थेला प्रत्येकी ९ हजार रुपये मानधन दिले जात आहे.
पीडित महिला आणि मुलींनी समुपदेशन केंद्रास भेट द्यावी, असे आवाहन ठाणे जिल्हा परिषद महिला आणि बालविकास विभागामार्फत करण्यात आले आहे.
ठाणे जिल्ह्यातील समुपदेशन केंद्राचे नाव आणि पत्ता
- कौंटुबिक समुपदेशन केंद्र, भारतीय महिला फेडरेशन (ठाणे समिती), सार्वजनिक बांधकाम विभाग, दुसरा मजला, ठाणे (पश्चिम).
- कौंटुबिक समुपदेशन केंद्र, भारतीय महिला फेडरेशन (ठाणे समिती), महिला आणि बाल सहाय्य केंद्र, पंचायत समिती कार्यालय पहिला माळा, कल्याण.
- ‘महिला विकास केंद्र संस्था'चे समुपदेशन/ सल्लागार केंद्र, एकात्मक बाल विकास सेवा योजना, पंचायत समिती शहापुर, जिल्हा-. ठाणे.
- आश्रय महिला संस्था, तहसिल कार्यालय बिल्डींग, अंबरनाथ पंचायत समिती कार्यालय, तिसरा मजला, के. बी. रोड, अंबरनाथ, जिल्हा-ठाणे.
- ‘वननिकेतन संस्था'चे चेतना महिला समुपदेशन आणि कुटुंब सल्ला केंद्र, सरकारी दवाखाना शेजारी, तालुका-मुरबाड, जिल्हा- ठाणे.
पीडित महिला आणि मुलींना आधार देण्याच्या उद्देशाने समुपदेशन केंद्र सुरु करण्यात आले असून, पीडित महिलांनी या समुपदेशन केंद्रास भेट दिल्यास त्यांना तत्परतेने कायदेशीर मदत, मानसोपचार तज्ज्ञांची मदत, पोलिसांची मदत मिळवून दिली जाणार आहे. - रोहन घुगे, मुख्य कार्यकारी अधिकारी - ठाणे जिल्हा परिषद.
