ग्रामपंचायत निवडणुकीचे वाजले बिगुल वाजले
उरण तालुक्यातील ३ ग्रामपंचायतींसाठी ५ नोव्हेंबर रोजी मतदान
उरण : ‘राज्य निवडणूक आयोग'च्या १२ जून २०२३ रोजीच्या आदेशान्वये राज्यातील जानेवारी ते डिसेंबर २०२३ या कालावधीत मुदत संपणाऱ्या उरण तालुक्यातील जासई, चिरनेर आणि दिघोडे या तीन ग्रामपंचायतीच्या सार्वत्रिक निवडणुकीची घोषणा करण्यात आली आहे. त्यानुसार येत्या ५ नोव्हेंबर रोजी ग्रामपंचायत निवडणूक होणार असल्याची माहिती ‘उरण'चे तहसीलदार डॉ. उध्दव कदम यांनी दिली आहे.
जानेवारी ते डिसेंबर २०२३ या कालावधीत मुदत संपणाऱ्या ग्रामपंचायती नव्याने स्थापित आणि सन २०२२ मध्ये चुकीची प्रभाग रचना झाल्यामुळे निवडणुका होऊ शकलेल्या नाहीत, त्या ग्रामपंचायतींच्या सदस्य पदासह थेट सरपंच पदाच्या सार्वत्रिक निवडणुकांसाठी संगणक प्रणालीद्वारे तसेच ग्रामपंचायतीतील रिक्त जागांच्या पोट निवडणुकांसाठी निवडणूक होणार आहे. यामध्ये उरण तालुक्यातील प्रामुख्याने जासई, चिरनेर आणि दिघोडे या तीन ग्रामपंचायतींचा समावेश आहे. येत्या ५ नोव्हेंबर २०२३ रोजी होत असलेल्या सदर ३ ग्रामपंचायतींच्या निवडणुकीकरिता आचारसंहिता ६ ऑक्टोबर २०२३ पासून लागू करण्यात आल्या आहेत.
सदर तीन ग्रामपंचायतींच्या निवडणुकीकरिता नामनिर्देशन पत्र मागविण्यासाठी १६ ते २० ऑक्टोबर पर्यंत मुदत देण्यात आली आहे. तर नामनिर्देशन पत्राची छाननी २३ ऑक्टोबर रोजी ११ पासून ते छाननी संपेपर्यंत वेळ निश्चित करण्यात आली आहे. नामनिर्देशन पत्र मागे घेण्याचा दिनांक २५ ऑक्टोबर रोजी २ वाजेपर्यंत असणार आहे. तर मतदान ५ नोव्हेंबर २०२३ रोजी सकाळी ७.३० ते सायंकाळी ५.३० या कालावधीत होणार असून मतमोजणी ६ नोव्हेंबर रोजी होणार असल्याचे तहसीलदार डॉ. उध्दव कदम यांनी सांगितले.
