फ्लेमिंगो पक्षी पाहण्यासाठी ‘बोट सफरी'ला पर्यटकांचा भरघोस प्रतिसाद
वाशी : ठाणे खाडी किनारा लगतचे पाणथळ क्षेत्र आता फ्लेमिंगो पक्षांसाठी हक्काचे घर बनले आहे. त्यामुळे दरवर्षी हिवाळा सुरु होताच परदेशी पलेमिंगो पक्षी ठाणे खाडी मध्ये मुक्काम ठोकतात. या पक्षांना जवळून पाहण्यासाठी ऐरोली येथील सागरी जैवविविधता निसर्ग परिचय केंद्र तर्फे फ्लेमिंगो सफर बोट सेवा मागील काही वर्षांपासून सुरु करण्यात आली आहे. यंदा देखील पक्षीप्रेमी, पर्यटक फ्लेमिंगो पक्षी पाहण्यासाठी गर्दी करत असून, या फ्लेमिंगो सफरीला भरघोस प्रतिसाद लाभत आहे. चालू जानेवारी महिन्यात आतापर्यंत ९०० पक्षी प्रेमींनी बोटींग सफर केली असून, पर्यटक आगाऊ नोंदणी करत आहेत, अशी माहिती वनविभाग अधिकाऱ्यांनी दिली.
नवी मुंबईसह, ठाणे, मुंबईतील पर्यावरण प्रेमींना खाडी किनाऱ्यांचे महत्त्व समजण्यासाठी, जैवविविधतेची तसेच किनाऱ्यांचे संरक्षण कसे करावे याबद्दल माहिती मिळण्यासाठी आणि पक्षीनिरीक्षण करण्यासाठी फ्लेमिंगो सफर बोट सेवा सुरु करण्यात आली आहे. ठाणे आशिया खंडातील सर्वात मोठी खाडी आहे. २६ किलोमीटर अंतरच्या ठाणे खाडी परिसरामध्ये २०० पेक्षा जास्त पक्षी स्थलांतर करीत असतात. फ्लेमिंगोसह अनेक विदेशी पक्षीही खाडी किनाऱ्यावर प्रत्येक वर्षी आश्रयाला येतात. नवी मुंबई शहराला लाभलेला खाडी किनारा आणि जैवविविधता यांची माहिती उपलब्ध होण्यासाठी ऐरोलीमध्ये सागरी जैवविविधता निसर्ग परिचय केंद्र उभारण्यात आले आहे. पक्षीप्रेमींना फ्लेमिंगो पक्षी पाहता यावे, यासाठी बोटिंगची सुविधा उपलब्ध आहे. २४ आसनी बोटिंग करिता १२ आसन तर ७ आसनी बोटिंगला ४ आसनी पर्यंत मर्यादा ठेवण्यात आली आहे. थंडी वाढल्याबरोबर नवी मुंबई शहरात खाडी किनारी फ्लेमिंगो पक्षी मोठ्या प्रमाणात दाखल होण्यास सुरुवात झाली आहे. त्यामुळे या फ्लेमिंगो पक्ष्यांना पाहण्यासाठी पर्यटकांकडून पसंती दिली जात आहे. जानेवारीपासून बोटिंग सुरु करण्यात आली असून, आतापर्यंत ९०० जणांनी खाडी सफर केली आहे. तसेच जानेवारी मधील संपूर्ण महिण्यात आगाऊ बुकिंग केली आहे, असे वनविभाग अधिकाऱ्यांनी सांगितले.
