कल्याण रेल्वे यार्ड रिमॉडेलिंग प्रकल्प पहिला टप्पा ऑक्टोबरमध्ये पूर्णत्वास
कल्याण : ‘कल्याण'चे खासदार डॉ. श्रीकांत शिंदे यांच्या पुढाकाराने मार्गी लागत असलेल्या कल्याण रेल्वे यार्ड रिमॉडेलिंग प्रकल्पाच्या उभारणीचे काम प्रगतीपथावर आहे. कल्याण रेल्वे स्थानकाला नवा आयाम देणारा सुमारे ८१३ कोटींचा यार्ड रिमॉडेलिंग प्रकल्प सध्या जलद गतीने सुरु असून, या प्रकल्पाचा पहिला टप्पा येत्या ऑक्टोबर महिन्यात पूर्ण होणार आहे. तर येत्या दीड वर्षात उर्वरित काम देखील मार्गी लागणार आहे. खासदार डॉ. श्रीकांत शिंदे यांच्या पुढाकारामुळे साकारत असलेला सदर प्रकल्प पूर्ण झाल्यानंतर कल्याण स्थानकाचे रुप पालटणार आहे.
खासदार डॉ. श्रीकांत शिंदे यांनी कल्याण मतदारसंघात सातत्याने पायाभूत सुविधा उभारणीवर भर दिला आहे. कल्याण रेल्वे यार्ड रिमॉडेलिंग प्रकल्पांतर्गत सध्या कल्याण पूर्व भागात नवीन ट्रॅक टाकणे, फुटओव्हर ब्रिजवर कव्हरिंग शेड, डेकचे गर्डर आणि जुन्या गुडस् यार्ड ट्रॅक्स काढून नवीन टाकण्याची कामे सुरु आहेत. या प्रकल्पात गुडस् यार्डसाठी वेगळ्या रिसेप्शन आणि डिस्पॅच लाईन, ३ नवीन फुटओव्हर ब्रिज, फलाटांवर मोठ्या स्लॅबचे बांधकाम, एलिवेटेड डेक सेंटिस प्रकल्पाचाही समावेश आहे. सदर काम येत्या दीड वर्षात पूर्णत्वास जाणार आहे.
सदर प्रकल्पामुळे लांब पल्ल्याच्या आणि उपनगरीय गाड्यांच्या मार्गिका स्वतंत्र होऊन गाड्यांची गती आणि वेळेची अचुकता वाढेल. प्लॅटफॉर्मची संख्या वाढून प्रवाशांची गर्दी कमी होईल. रेल्वे फेऱ्यांची संख्या वाढवणे शक्य होईल. विमानतळाच्या धर्तीवर आधुनिक सुविधा मिळतील. बोगद्यातून होणारा पायी प्रवास बंद होईल. प्रवाशांना थेट होम प्लॅटफॉर्म पर्यंत वाहन घेऊन जाण्याची सुविधा मिळेल.
