दिवाळीत आनंदाबरोबर सुरक्षितताही जपा ! नॅशनल बर्न्स सेंटरचा नागरिकांना सावधतेचा सल्ला
‘नवी मुंबई इंटक'चा तेरणा रुग्णालय व्यवस्थापनाला दणका
तेरणा रुग्णालय व्यवस्थापनाला ‘नवी मुंबई इंटक'चा दणका
नवी मुंबई ः बाप दाखव नाहीतर श्राध्द घाल अशी कामगार नेते रविंद्र सावंतयांची कार्यप्रणाली पुन्हा एकदा कामगार क्षेत्राला जवळून पहायला मिळाली. पाच वर्षे पीएफचा भरणा न होणे, वेतनास विलंब होणे अशा विविध समस्या तेरणा रुग्णालयातील सफाई कर्मचारी कामगार नेते तथा ‘नवी मुंबई इंटक'चे अध्यक्ष रविंद्र सावंत यांना भेटण्यासाठी २ फेब्रुवारी रोजी
सकाळी नेरुळ, सेक्टर-२ मधील इंटकच्या कार्यालयात आले होते. समस्या ऐकल्यावर आणि पीएफ पाच वर्षे न भरल्याचे समजल्यावर कामगार नेते रविंद्र सावंत यांनी कामगारांना घेवून तात्काळ नेरुळ स्टेशन समोरील तेरणा रुग्णालयासमोरच कामगारांच्या समस्यांबाबत निदर्शने आणि जोरदार घोषणाबाजी सुरु केली. या आंदोलनाची दखल तेरणा रुग्णालयाला घ्यावी लागली आणि त्यांनी या कामगारांच्या समस्या सोडविण्यासाठी ६ फेब्रुवारी पर्यंतची वेळ रविंद्र सावंत यांच्याकडून मागून घेतली.
तेरणा रुग्णालयात सफाई आणि अन्य कामांसाठी अंधेरी मरोळ नाका येथील गोल्डन हॉस्पिलिटी सर्व्हिसेस प्रा. लि. या कंपनीला कंत्राट दिलेले आहे. या कंपनीकडून कार्यरत कर्मचाऱ्यांना मागील दीड महिन्यापासून वेतन दिलेले नाही. कंपनीने सदर कर्मचाऱ्यांच्या खात्यात मागील ५ वर्षांपासून पीएफच्या रवकमेचा भरणा केलेला नाही. पगारी रजाही दिल्या जात नसून कर्मचाऱ्यांच्या मोठ्या प्रमाणावर पगारी रजाही शिल्लक आहे. कर्मचारी रुग्णालयाचेच काम मागील अनेक वर्षांपासून करीत असल्याने संबंधित कर्मचाऱ्यांच्या समस्या सोडविणे रुग्णालय व्यवस्थापनाचे कर्तव्य आहे.
सदर कर्मचाऱ्यांचा थकीत पीएफचा भरणा, थकीत वेतन आणि पगारी रजांचे पैसे रुग्णालय व्यवस्थापनाकडून तात्काळ मिळण्यासाठी ‘नवी मुंबई इंटक'च्या माध्यमातून रुग्णालयाच्या प्रवेशद्वारावरच कामगार नेते रविंद्र सावंत यांनी घोषणाबाजी करुन आंदोलनाला सुरुवात केली. आंदोलन सुरु होताच रुग्णालय व्यवस्थापणाने रविंद्र सावंत यांच्याशी चर्चा करीत येत्या ६ फेब्रुवारी पर्यंत मुदत मागून घेतली. कर्मचारी आंदोलनाचा दणका देताच तेरणा रुग्णालय व्यवस्थापनाला जाग आल्याने कर्मचाऱ्यांनी ‘इंटक'मुळेच आम्हाला न्याय मिळणे शक्य असल्याचा आशावाद व्यक्त केला. या आंदोलनात शंभरहून अधिक कर्मचारी सहभागी झाले होते.
