आमदार कुमार आयलानी ‘भाजपा'च्या वेटींग लिस्टमध्ये?
उल्हासनगर : ‘भाजपा'ने आगामी विधानसभा निवडणुकांसाठी आपली पहिली उमेदवारी यादी जाहीर केली आहे. परंतु, त्यात उल्हासनगरचे विद्यमान आमदार कुमार आयलानी यांना या यादीत स्थान मिळालेले नाही. यामुळे उल्हासनगरच्या राजकीय वर्तुळात विविध चर्चांना उधाण आले असून, आयलानी यांचे नाव प्रतिक्षा यादीतच राहिल्याने त्यांच्या राजकीय भवितव्याबद्दल अनिश्चितता निर्माण झाली आहे.
‘भाजपा'ने ठाणे जिल्ह्यातील भिवंडी पश्चिम, मुरबाड, कल्याण पूर्व, डोंबिवली, ठाणे, ऐरोली आणि बेलापूर या मतदारसंघांमधील विद्यमान आमदारांना पुन्हा उमेदवारी दिली आहे. मात्र, उल्हासनगर या ठाणे जिल्ह्यातील सर्वात लहान; पण राजकीयदृष्ट्या महत्त्वाच्या मतदारसंघात विद्यमान आ. कुमार आयलानी यांचे नाव पहिल्या यादीत दिसले नाही. उल्हासनगरच्या राजकीय इतिहासात सदर घटना महत्त्वपूर्ण ठरली आहे. गेल्या काही दिवसांपासून या मतदारसंघात ‘भाजपा'साठी वातावरण बरे नाही, अशी चर्चा सुरु आहे.
कुमार आयलानी यांनी उल्हासनगर मधील आमदार म्हणून ५ वर्षांचा कार्यकाळ पूर्ण केला. परंतु, त्यांच्या कार्यकाळात शहराच्या विकासाबाबत समाधानकारक कार्ये न झाल्याचा आरोप त्यांच्या विरोधकांकडून सातत्याने होत आला आहे. याशिवाय, पक्षांतर्गतही त्यांना विरोध वाढत असल्याचे बोलले जात आहे. आयलानी यांना त्यांच्याच पक्षातील काही नेत्यांचा पाठिंबा नसल्याची चर्चा आहे. या सर्व पार्श्वभूमीवर त्यांचे उमेदवारी यादीत नाव नसणे, पक्षासाठी मोठा धक्का मानला जात आहे.
उल्हासनगरच्या राजकारणात कायम चर्चेत असणारे माजी आमदार सुरेश उर्फ पप्पू कलानी यांनी गेल्या काही महिन्यांत आपली राजकीय सक्रियता वाढवली आहे. त्यांच्या नेतृत्वाखाली उल्हासनगरातील ‘राष्ट्रवादी काँग्रेस'ने जोरदार मोर्चेबांधणी सुरु केली आहे. पप्पू कलानींचे पुत्र ओमी कलानी जे राजकारणात सक्रिय होत आहेत, ते आता राष्ट्रवादी काँग्रेस (शरद पवार गट)च्या तिकिटावर कुमार आयलानी यांच्या विरोधात निवडणूक लढवण्याच्या तयारीत आहेत. कलानी कुटुंबाची उल्हासनगरातील लोकप्रियता आणि त्यांचे ठोस कार्य त्यांच्या बाजुने असल्याचे जाणकारांचे मत आहे.
उल्हासनगर मतदारसंघ नेहमीच ‘भाजपा'साठी महत्त्वाचा राहिला आहे. परंतु, सध्या येथील राजकीय परिस्थिती पक्षासाठी धोकादायक बनली आहे. कुमार आयलानी यांना पहिल्या यादीत स्थान न मिळाल्यामुळे भाजप या जागेवर उमेदवार बदलण्याच्या विचारात आहे का? अशी चर्चाही रंगू लागली आहे. स्थानिक स्तरावरील पक्ष कार्यकर्त्यांमध्येही या निर्णयामुळे नाराजी आहे. आयलानी यांनी पक्षात चांगली पकड ठेवली होती.
कलानी कुटुंबाच्या राजकीय पुनरागमनामुळे उल्हासनगर मधील निवडणूक अत्यंत चुरशीची होणार असल्याचे संकेत आहेत. भाजप जर या मतदारसंघात योग्य उमेदवार उतरवण्यात अपयशी ठरला, तर या लहानशा मतदारसंघात मोठा पराभव होण्याची शक्यता आहे. त्यामुळे आगामी काही दिवस उल्हासनगरच्या राजकारणासाठी निर्णायक ठरणार आहेत.
‘भाजपा'ची दुसरी उमेदवारी यादी कधी जाहीर होईल, याची उत्सुकता आता वाढली आहे. कुमार आयलानी यांना उमेदवारी मिळणार की नाही, यावरच त्यांच्या राजकीय करिअरची दिशा ठरणार आहे. याचबरोबर पक्ष नेतृत्वाने त्यांच्याविरुद्धचे स्थानिक विरोधाचे स्वर कसे हाताळतील आणि या प्रकरणात अंतिम निर्णय काय घेतील, तेे पाहणे महत्त्वाचे ठरणार आहे. आता सर्वांची नजर ‘भाजपा'च्या पुढील निर्णयावर आहे, ज्यावर उल्हासनगरच्या राजकारणाचा पुढील रंग स्पष्ट होईल.
