एनएमएमटी कर्मचाऱ्यांच्या समस्या सोडविण्याची मागणी
नवी मुंवई : नवी मुंबई महापालिका परिवहन उपक्रमातील ठोक मानधनावर कार्यरत असणाऱ्या वाहक आणि चालक कर्मचारी तसेच कंत्राटी कर्मचारी यांच्या समस्या सोडवण्याची मागणी ‘महाराष्ट्र कर्मचारी युनियन'चे अध्यक्ष रविंद्र सावंत यांनी परिवहन व्यवस्थापकांकडे केली आहे.
यासंदर्भात रविंद्र सावंत यांनी शिष्टमंडळासोबत परिवहन व्यवस्थापकांची भेट घेऊन त्यांना मागण्यांचे निवेदन दिले. नमुंमपा परिवहन विभागामध्ये काम करणारे सर्व वाहक, चालक, रोजंदारी तसेच ठोक मानधनावरील कार्यरत कर्मचाऱ्यांना कायम सेवेमध्ये सामावून घेणेबाबत तसेच कंत्राटी कर्मचाऱ्यांना ‘समान काम, समान वेतन लागू' करण्यात यावे. वाढत्या महागाईप्रमाणे वाहक, चालक यांच्या वेतनात वाढ करुन रोजंदारीतही वाढ करण्यात यावी. वाहक आनि चालक यांचा अपघात झाल्यास अथवा आजारपण आल्यास त्यांना कर्ज काढून उपचार करावा लागतो. त्यासाठी आपण या कर्मचाऱ्यांना मेडिक्लेमची सुविधा तातडीने उपलब्ध करुन द्यावी. २०१९ पासून सर्व वाहक, चालक तसेच रोजंदारीवरील आणि ठोक मानधनावरील कर्मचाऱ्यांना गणवेश त्वरित देण्यात यावा. रोजंदारी आणि ठोक मानधनावरील कर्मचारी आजारी पडल्यास अथवा त्याचा अपघात झाल्यास उपचार घरी बसूनच घेत असल्यास त्याचा पगार प्रशासनाने द्यावा. ठोक मानधनावरील कर्मचारी आणि कंत्राटी कर्मचारी जे १० ते १२ वर्ष परिवहन विभागामध्ये काम करत आहेत, ते अपघातामुळे अथवा आजारपणामुळे दगावल्यास त्याच्या कुटुंबातील मुख्य सदस्याला नोकरीमध्ये प्राधान्य देण्यात यावे. ‘एनएमएमटी'मध्ये कार्यरत कंत्राटी कर्मचाऱ्यांना मागील २०१५ पासूनचा थकीत एरियस देण्यात यावा. चालक-वाहकाला ट्रेनिंगला काढल्यास प्रति दिन २०० रुपये जमा करु नयेत. परिवहन विभागामध्ये काम करणारे सर्व वाहक, चालक, रोजंदारी तसेच ठोक मानधनावरील कार्यरत कर्मचारी यांना सर्व सार्वजनिक सुट्ट्या आणि वैद्यकीय रजा देण्यात याव्यात, आदि मागण्या कामगार नेते रविंद्र सावंत यांनी परिवहन व्यवस्थापकांकडे केल्या आहेत.
कर्मचारी असुविधेमध्ये तसेच समस्यांमध्ये असतानाही तो प्रामाणिकपणे काम करत आहे. कामावर त्याचा कोणताही परिणाम ते होऊ देत नाहीत. कर्मचाऱ्यांच्या समस्या सोडवून, त्यांना सुविधा उपलब्ध करुन देताना कर्मचाऱ्यांच्या मागण्यांवर सकारात्मक कार्यवाही करण्याची मागणी रविंद्र सावंत यांनी केली आहे.
