1 लाख 30 हजार रुपये किंमतीचे ई-सिगारेट जप्त
नेरुळमध्ये ई-सिगारेटची विक्री करण्यासाठी आलेला तरुण अटकेत
नवी मुंबई : नवी मुंबई पोलिसांच्या अंमली पदार्थ विरोधी पथकाने गुरुवारी सायंकाळी नेरुळ सेक्टर-6 मध्ये ई-सिगारेटची विक्री करण्यासाठी आलेल्या तरुणाला सापाळा लावुन अटक केली आहे. श्रुतीक विजय जाधव (24) असे या तरुणाचे नाव असून अंमली पदार्थ विरोधी पथकाने त्याच्याकडुन 1 लाख 30 हजार रुपये किंमतीचे ई सिगारेट जप्त केले आहेत. सदरचे ई-सिगारेट तो कुणाला विक्री करणार होता, याबाबत पोलिसांकडुन अधिक तपास करण्यात येत आहे.
नेरुळ सेक्टर-6 मधील पामबीच मार्गालगत द वुड झोनच्या समोरील सार्वजनिक रस्त्यावर एक व्यक्ती ई-सिगारेटची डिलीव्हरी देण्यासाठी येणार असल्याची माहिती अंमली पदार्थ विरोधी पथकाला मिळाली होती. सदर माहितीच्या आधारे वरिष्ठ पोलीस निरीक्षक बी.एस.सय्यद यांच्या सुचनेनुसार पोलीस उपनिरीक्षक कुलदिप मोरे व त्यांच्या पथकाने गुरुवारी दि.18 मे रोजी सायंकाळी नेरुळ सेक्टर-6 मध्ये सापळा लावला होता. सायंकाळी 6.30 च्या सुमारास श्रृतीक जाधव हा तरुण पामबीच मार्गालगत द वुड झोनच्या समोरील सार्वजनिक रस्त्यावर ई-सिगारेटचा साठा असलेला बॉक्स घेऊन आल्यानंतर अंमली पदार्थ विरोधी पथकाने त्याची धरपकड केली.
त्यानंतर अंमली पदार्थ विरोधी पथकाने श्रृतीक जाधव याच्या जवळ असलेल्या बॉक्सची तपासणी केली असता, सदर बॉक्समध्ये 1 लाख 30 हजार रुपये किंमतीचे 130 ई-सिगारेट आढळुन आले. सदरचे ई सिगारेट तो विक्री करण्यासाठी घेऊन आल्याचे चौकशीत आढळुन आल्यानंतर अंमली पदार्थ विरोधी पथकाने सदर ई सिगारेटचा साठा जप्त केला. त्यानंतर ई सिगारेटाचा साठा घेऊन आलेल्या श्रृतीक जाधव याच्या विरोधात नेरुळ पोलीस ठाण्यात द प्रोहिबिशन ऑफ इलेक्ट्रॉनिक सिगारेट ऍक्ट 2019 चे कलम 4 (1) 7 अन्वये गुन्हा दाखल करुन त्याला अटक केली.