आ. प्रशांत ठाकूर यांनी घडविला इतिहास
पनवेल : ‘पनवेल'च्या विकासासाठी दिवसरात्र एक करुन काम करणारे ‘महायुती'चे उमेदवार आ. प्रशांत ठाकूर यांनी पुन्हा एकदा आणि सलग चौथ्यांदा दणदणीत विजय मिळवत विजयाचा चौकार मारला. तर विधानसभा निवडणुकीत ‘शेकाप'चे बाळाराम पाटील यांच्या पराभवाचीही हॅटट्रिक झाली असून विकासपुरुष आमदार ठाकूर यांनी ‘पनवेल'मध्ये पुन्हा एकदा इतिहास घडवला आहे. तसेच या निमिताने पक्षश्रेष्ठींनी दाखवलेला विश्वास आ. प्रशांत ठाकूर यांनी पुन्हा एकदा सार्थ ठरवला आहे.
‘भाजप, शिवसेना, राष्ट्रवादी काँग्रेस, आरपीआय, पीआरपी, मित्र पक्ष महायुती'चे उमेदवार प्रशांत ठाकूर यांना १ लाख ८३ हजार ९३१ मते मिळाली. त्यांनी ५१ हजार ९१ मतांची आघाडी मिळवत बाळाराम पाटील आणि इतर विरोधकांचा पराभव केला. या निवडणुकीत ‘महाविकास आघाडी'च्या लीना गरड(४३९८९), ‘मनसे'चे योगेश चिले (१०२३१), ‘लोकमुद्रा जनहित पार्टी'चे कांतीलाल कडू (२४२९), ‘रिप्लब्लिकन सेना'चे संतोष पवार (१७२९), ‘बहुजन समाज पार्टी'चे गजेंद्र अहिरे (१५२६), ‘डिजीटल ऑर्गनायझेशन ऑफ नॅशन पार्टी'चे वसंत राठोड (१०३८), ‘भारतीय जन सम्राट पार्टी'चे पवन काळे (४७७), तर ‘नोटा'ला ३९०५ मते पडली. दरम्यान, या निवडणुकीच्या अनुषंगाने विरोधकांनाही अपप्रचाराचे रान उठवले होते. मात्र, शेवटी ‘पनवेल'च्या विकासासाठी आ. प्रशांत ठाकूर यांनी केलेली विकासकामे आणि सामाजिक बांधिलकी आणि ‘महायुती'च्या कार्यकर्त्यांची मेहनत कामी आली आहे.
माजी खासदार लोकनेते रामशेठ ठाकूर यांनी या विजयाबद्दल अगोदरच खात्री दिली होती. आमदार ठाकूर सहज निवडून येतील, असा त्यांनी जाहीर दावा केला होता. तो शब्द आणि शब्द तंतोतंत या निकालाच्या रुपातून खरा ठरला. या विजयाने मतदार संघातील जनतेने पुन्हा आपले प्रेम आ. प्रशांत ठाकूर यांच्यावरच असल्याचे दाखवून दिले. पनवेल विधानसभा मतदार संघ राज्यातील दुसऱ्या क्रमांकाचा सर्वात मोठा मतदार संघ आहे. ६ लाख ५२ हजार ६२ मतदार संख्या असून ३ लाख ८२ हजार ३३५ मतदारांनी मतदान झाले. अपक्षेनुसार सर्वाधिक मते मिळवत आमदार ठाकूर दणदणीत विजय मिळविला. या विजयाच्या निमिताने कार्यकर्ते आणि पनवेल मधील तमाम जनतेने जल्लोष करत आणि पेढे वाटत आनंदोत्सव साजरा केला. पनवेलध्ये फटाक्यांची आतषबाजी आणि ‘एकच वादा प्रशांतदादा' असा जयघोष सर्वत्र पहायला मिळत होता.
दरम्यान, सुरुवातीला आघाडी मिळवल्यानंतर ‘शेकाप'च्या गोटात उत्साह भरला होता. मात्र, काही क्षणात आमदार प्रशांत ठाकूर यांनी मतांची आघाडी मिळवत ती कायम ठेवली आणि ‘शेकाप'ला वरती डोकेच काढून दिले नाही. त्यामुळे पुन्हा एकदा बाळाराम पाटील आणि ‘शेकाप'ला मतदारांनी सपशेल नाकारले.
मला चौथ्यांदा निवडून दिल्याबद्दल मी ‘महायुती'तील प्रत्येक कार्यकर्ता आणि मतदाराचे मनपूर्वक आभार मानतो. ‘पनवेल'च्या विकासाचा आलेख उंचावण्याची माझी जबाबदारी आहे, ती जबाबदारी मानून यापुढेही कायम काम करत राहीन. पक्ष नेतृत्वाने माझ्यावर विश्वास टाकला त्या सर्व मान्यवरांचे मी आभार मानतो. -आ. प्रशांत ठाकूर, पनवेल.
