महापालिकेच्या रुग्णांना नकार. रेफर रुग्णाला दारात अडवलं... फोर्टिसच्या बेपर्वाईला मनसेची चपराक
बाल वैज्ञानिक परिषद मध्ये महापालिका शाळा मधील विद्यार्थिनींच्या प्रकल्पाची राष्ट्रीय स्तरावर निवड
गुणवत्तापूर्ण शिक्षणाची नाममुद्रा देश पातळीवर
नवी मुंबई : केंद्रीय विज्ञान आणि तंत्रज्ञान विभाग तर्फे आयोजित करण्यात आलेल्या ३१व्या राष्ट्रीय बाल विज्ञान परिषद द्वारे नाशिक येथे पार पडलेल्या राज्य पातळीवरील फेरीत गोठिवली येथील नवी मुंबई महापालिका शाळा क्रमांक-४६ मधील पल्लवी सोळंखे आणि प्रिती चिन्हा राठोड या दोन विद्यार्थिनींनी सादर केलेल्या अभिनव प्रकल्पाची निवड पुढील राष्ट्रीय पातळीवर झाली आहे. या त्यांच्या भरारीमुळे नवी मुंबई महापालिकेच्या गुणवत्तापूर्ण शिक्षणाची नाममुद्रा देश पातळीवर उमटली असून, महापालिका आयुक्त राजेश नार्वेकर यांनी पल्लवी सोळंखे आणि प्रिती राठोड यांचे कौतुक केले.
याप्रसंगी महापालिका अतिरिक्त आयुक्त सुजाता ढोले, विजयकुमार म्हसाळ, उपआयुक्त (शिक्षण विभाग) योगेश कडुस्कर आणि शाळेच्या मुख्याध्यापिका कल्पना गोसावी आदी मान्यवर उपस्थित होते.
राष्ट्रीय बाल विज्ञान परिषद-२०२३ या स्पर्धेत ४५०० पेक्षा अधिक विज्ञान प्रयोगांचा सहभाग असून, या स्पर्धामध्ये ३६ जिल्हे सहभागी आहेत. जिल्हास्तरीय फेरीतील १८८ प्रकल्पांची निवड होऊन त्यापैकी ५२ प्रकल्पांची राज्यस्तरीय फेरीमध्ये निवड झालेली आहे. तर ३० प्रकल्पांची राष्ट्रीय स्तरावर निवड करण्यात आली आहे.
जिज्ञासा ट्रस्ट यांच्या माध्यमातून या स्पर्धेचे आयोजन करण्यात आले असून, ठाणे येथील सुलोचना देवी संघानिया स्कुल मध्ये राष्ट्रीय पातळीवर निवडलेल्या ३० प्रकल्पांचे पत्रकार परिषद प्रसंगी सादरीकरण करण्यात आले. यामधील ‘विल्हेवाट लावता येणारे महिलांचे लघवीचे साधन' (Disposable Female Urination Device) या नवी मुंबई महापालिका शाळा मधील विद्यार्थिनींनी तयार केलेल्या अभिनव प्रकल्पाची निवड पुढील राष्ट्रीय पातळीवर झालेली आहे.
प्रसाधनगृहात विशेषत्वाने महिलांना जाणवणाऱ्या अडचणी आणि त्यामुळे होणारा त्रास याबाबत उपाय शोधण्याच्या दृष्टीने पल्लवी सोळंखे आणि प्रिती राठोड या दोन विद्यार्थिनींनी विज्ञानाची कास धरत केलेला विचार आणि शोधलेला उपाय म्हणजे त्यांच्यामधील कल्पकता आणि शास्त्रीय दृष्टीकोन दाखविणारी गोष्ट असून, महापालिका आयुक्त राजेश नार्वेकर यांनी त्यांचे विशेष कौतुक केले. ‘राष्ट्रीय बाल विज्ञान परिषद'चे अध्यक्ष सुरेंद्र दिघे तसेच राज्य समन्वयक विश्वास कोरडे यांनीही पल्लवी सोळंखे आणि प्रिती राठोड या विद्यार्थिनींच्या अडचणीतून शास्त्रीयदृष्ट्या मार्ग काढण्याच्या कल्पकतेची प्रशंसा केली.
नवी मुंबई महापालिका उपआयुक्त योगेश कडुस्कर तसेच शिक्षण अधिकारी अरुणा यादव यांनीही पल्लवी सोळंखे आणि प्रिती राठोड या विद्यार्थिनींचे कौतुक करुन अभिनंदन केले. प्रकल्प सादरीकरण करण्यासाठी महापालिका शाळा क्रमांक-४६, गोठिवली या शाळेतील पल्लवी सोळंखे आणि प्रिती राठोड या विद्यार्थिनींना शाळेच्या मुख्याध्यापक तसेच शिक्षण विस्तार अधिकारी कल्पना गोसावी, मुख्याध्यापक रघुनाथ शेलार, ‘पंडीत लर्निंग लिंक्स फाउडेशन स्टीम लॅब'च्या मार्गदर्शक स्नेहल पोदार तसेच र्वगशिक्षक वासंती पाटील आणि शिक्षकवृंदाचे मार्गदर्शन लाभले.
याच शाळेतील अंश शर्मा आणि विराज गुरव या दोन विद्यार्थ्यांनीही ५१व्या राज्यस्तरीय विज्ञान प्रदर्शनात ‘आजोबांची आधुनिक काठी' या प्रकल्पाचे सादरीकरण करुन आपल्या कल्पकतेचे दर्शन घडविले आहे. या प्रकल्पाची तालुका स्तरावरुन ठाणे जिल्हा स्तरावर निवड झाली असून, त्यांनीही आपल्या प्रकल्पाची माहिती महापालिका आयुक्त राजेश नार्वेकर आणि इतर मान्यवरांना दिली.
विद्यार्थ्यांमध्ये वैज्ञानिक दृष्टीकोन वाढीस लागावा तसेच या माध्यमातून वैज्ञानिक संशोधन पध्दतीची माहिती आणि ज्ञान मिळावे या करिता नवी मुंबई महापालिका शिक्षण विभाग मार्फत नियोजनबध्द प्रयत्न केले जात असून, त्यामधूनच विज्ञान आणि तंत्रज्ञानातील नवकल्पनांचा कल्पक वापर करणारे गुणवंत विद्यार्थी-विद्यार्थिनी घडविले जात आहेत. - योगेश कडुस्कर, उपआयुक्त (शिक्षण विभाग) - नवी मुंबई महापालिका.