महापालिकेच्या रुग्णांना नकार. रेफर रुग्णाला दारात अडवलं... फोर्टिसच्या बेपर्वाईला मनसेची चपराक
ठाणे महापालिका क्षेत्रात ८१ शाळा अनधिकृत
ठाणे : ठाणे महापालिका हद्दीत एकूण ८१ शाळा अनधिकृत असून यात मराठी माध्यमाच्या २, हिंदी माध्यमाच्या २ आणि इंग्रजी माध्यमाच्या ७७ शाळा आहेत. या शाळांमधून आयसीएसई, सीबीएसई, आयबी तसेच राज्य शिक्षण मंडळाच्या मराठी आणि इंग्रजी माध्यमांच्या शाळांच्या प्रवेशाचे सत्र सुरु झाले आहे. दरम्यान, पालकांची फसवणूक होवू नये यासाठी महापालिकेने ३० जुलै २०२४ रोजी स्थानिक वृत्तपत्रात शाळांची यादी प्रसिध्द केली होती. तसेच सर्व क्षेत्रीय अधिकाऱ्यांकडून नव्याने सर्वेक्षण करुन अनधिकृत शाळांचा शोध घेण्यात आला आहे.
ठाणे महापालिका हद्दीत मोठ्या प्रमाणात खासगी शाळा सुरु झाल्या असून अनेक शाळांतून नवीन शैक्षणिक वर्षाच्या प्रवेशासाठी रस्त्याच्या कडेला जाहिरातीचे पलेक्स लावण्यात आले आहेत. या जाहिराती पालकांचे लक्ष वेधून घेत असून या माध्यमातून पालकांची फसवणूक होण्याची शक्यता नाकारता येत नाही. पालकांची फसवणूक होवू नये यासाठी ठाणे महापालिका कार्यक्षेत्रात एकही अनधिकृत शाळा सुरु राहणार नाही याची दक्षता प्रशासन घेत असून महापालिकेच्या वतीने अनधिकृत शाळांची यादी प्रसिध्द करण्यात आली आहे.
सध्या सुरु असलेल्या अनधिकृत शाळेतील विद्यार्थ्यांचे पालकांच्या सहकार्याने अधिकृत शाळेत समायोजन करणे, दिवा परिसरात महापालिका स्तरावरुन मराठी आणि इंग्रजी माध्यमांची शाळा सुरू करण्याबाबत प्रयत्न सुरु आहेत. त्याचप्रमाणे अनधिकृत शाळांवर बालकांचा मोफत-सक्तीच्या शिक्षणाचा हक्क अधिनियम २००९ अन्वये दंडात्मक कारवाई आणि फौजदारी कारवाई करण्यात येत आहे. त्यामुळे आपल्या पाल्याला शाळेत प्रवेश घेण्यापूर्वी सदरची शाळा अधिकृत आहे किंवा नाही याची चौकशी करावी. तसेच शाळेचा युडायस क्रमांक, प्रथम मान्यता, खेळाचे मैदान, स्वच्छतागृह आदि आहे किंवा नाही याची खात्री करुनच घ्यावी जेणेकरुन आपली फसवणूक होणार नाही, असे आवाहन पालक नागरिकांना महापालिकेच्या वतीने करण्यात आले आहे.
पालकांनी मान्यताप्राप्त शाळेतच पाल्यांचे प्रवेश करावेत. तसेच शाळेत प्रवेश घेण्यापूर्वी शाळेच्या मान्यतेबाबत शंका असल्यास ठाणे महापालिका स्तरावर ठाणे महापालिका शिक्षण विभाग, विष्णुनगर, नौपाडा या ठिकाणी संपर्क साधवा. पालकांनी त्यांच्या पाल्याचा अनधिकृत शाळेत प्रवेश घेतल्यास त्याची जबाबदारी शिक्षण विभागाची राहणार नाही, याची नोंद घ्यावी.
-कमलाकांत मेहेत्रे, शिक्षणाधिकारी-ठाणे महापालिका.
