‘मिसिंग लिंक'चा आज लोकार्पण सोहळा
मुंबई : ‘महाराष्ट्र राज्य रस्ते विकास महामंडळ'च्या वतीने मुंबई-पुणे द्रुतगती मार्गाच्या क्षमता वाढीअंतर्गत उभारण्यात आलेल्या ‘मिसिंग लिंक' प्रकल्पाचा लोकार्पण सोहळा आज १ मे महाराष्ट्र दिनी पार पडणार आहे. राज्यातील वाहतूक व्यवस्थेला नवे बळ देणाऱ्या या महत्त्वाकांक्षी प्रकल्पामुळे प्रवास अधिक जलद, सुरक्षित आणि सुलभ होणार आहे.
या ‘मिसिंग लिंक'चे उद्घाटन दुपारी १२.३० वाजता मिसिंग लिंक वरील पुल क्र.१, खोपाली एक्झिटजवळ, यशवंतराव चव्हाण द्रुतगती मार्ग, जि. रायगड या ठिकाणी मुख्यमंत्री देवेंद्र फडणवीस यांच्या हस्ते होणार असून, केंद्रीय सहकार-नागरी विमान वाहतूक राज्यमंत्री मुरलीधर मोहोळ प्रमुख अतिथी म्हणून उपस्थित राहणार आहेत. तसेच उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांची उपस्थिती राहणार आहे.
सदर कार्यक्रमाला उच्च-तंत्रशिक्षण मंत्री चंद्रकांत पाटील, सार्वजनिक बांधकाम मंत्री शिवेंद्रसिंह भोसले, महिला-बालविकास मंत्री आदिती तटकरे, कृषी मंत्री दत्तात्रय भरणे यांच्यासह अनेक मान्यवर उपस्थित राहणार आहेत.
दरम्यान, ‘मिसिंग लिंक' प्रकल्प मुंबईपुणे द्रुतगती मार्गावरील वाहतूक कोंडी कमी करण्यासाठी आणि प्रवासाचा कालावधी लक्षणीयरित्या घटवण्यासाठी महत्त्वपूर्ण ठरणार आहे. अत्याधुनिक अभियांत्रिकी तंत्रज्ञानाचा वापर करुन उभारण्यात आलेल्या या प्रकल्पामुळे सुरक्षिततेच्या दृष्टीनेही मोठी सुधारणा होणार आहे. राज्यातील पायाभूत सुविधांच्या विकासातील एक महत्त्वाचा टप्पा मानला जात असून, या प्रकल्पामुळे आर्थिक आणि औद्योगिक प्रगतीलाही गती मिळणार असल्याचे मत व्यक्त करण्यात येत आहे.
जगातील सर्वात रुंद बोगदा म्हणून ‘गिनिज बुक ऑफ वर्ल्ड रेकॉर्ड'मध्ये नोंद...
‘मिसिंग लिंक'मुळे भारतातील पहिला एक्सप्रेस-वे आता अधिक वेगवान आणि सुरक्षित होत आहे. ‘मिसिंग लिंक'मुळे वेळ आणि इंधन वाचविणारा सुरक्षित आणि वेगवान प्रवासाचा अनुभव मिळणार आहे. मिसिंग लिंक जगातील सर्वात रुंद बोगदा (२३.५ मीटर) असून लोणावळा तलावाच्या १८० मीटर खालून खोदलेला बोगदा आहे. या ठिकाणी ६५० मीटर केबल-स्टेड ब्रिजसह भारतातील सर्वात उंच रस्त्यावरील पुल पायलॉन उंची (१८२ मीटर) असून ‘गिनिज बुक ऑफ वर्ल्ड रेकॉर्ड'मध्ये जगातील सर्वांत रुंद बोगदा म्हणून नोंद झालेली आहे.
