पनवेल पंचायत समिती सभापतीपदी रंजना वास्कर तर उपसभापतीपदी भूपेंद्र पाटील
नमुंमपा निवडणूक करिता ६ हजार कर्मचारी नियुक्त
नवी मुंबई : नवी मुंबई महापालिका सार्वत्रिक निवडणूक पारदर्शक रितीने आणि सुरळीतपणे पार पाडण्यासाठी निवडणूक प्रक्रियेत सहभागी सर्व अधिकारी, कर्मचारी यांना आवश्यक प्रशिक्षण देण्यात येत असून महापालिका आयुक्त तथा निवडणूक अधिकारी डॉ. कैलास शिंदे यांच्या मार्गदर्शनाखाली ६ हजारहून अधिक कर्मचाऱ्यांचे प्रशिक्षण कार्यक्रम वेळापत्रक तयार करण्यात आले आहे.
नवी मुंबई महापालिका क्षेत्रामध्ये २८ प्रभागांमधील १११ जागांकरिता १५ जानेवारी रोजी निवडणूक होत असून महापालिका क्षेत्रात ११४८ मतदान केंद्रे निश्चित करण्यात आलेली आहेत. निवडणूक प्रक्रियेसाठी ‘निवडणूक आयोग'च्या मान्यतेने ८ विभागांसाठी ८ निवडणूक निर्णय अधिकारी, प्रत्येक विभागासाठी प्रत्येकी ३ सहाय्यक निवडणूक निर्णय अधिकारी तसेच १८० क्षेत्रीय अधिकारी कार्यरत आहेत.
निवडणूक प्रक्रिया सुनियोजित पध्दतीने पार पाडण्यासाठी प्रत्येक मतदान केंद्रांवर मतदान केंद्राध्यक्ष, ३ सहाय्यक मतदान अधिकारी, शिपाई अशी पथके तयार करण्यात आली आहेत. त्याचप्रमाणे अशा प्रकारची राखीव पथकेही ठेवण्यात आली आहेत. या सर्व अधिकारी-कर्मचारी यांचे पहिले प्रशिक्षण १ ते ७ जानेवारी या कालावधीत विष्णुदास भावे नाट्यगृह-वाशी आणि सरस्वती विद्यालय, ऐरोली येथे विभागनिहाय सत्रांमध्ये आयोजित करण्यात आलेले आहे.
१ जानेवारी रोजी नेरुळ विभाग, २ जानेवारी रोजी बेलापूर विभाग, ४ जानेवारी रोजी दिघा विभाग, ५ जानेवारी रोजी घणसोली विभाग, ६ जानेवारी रोजी दोन सत्रात कोपरखैरणे आणि तुर्भे विभाग, ७ जानेवारी रोजी वाशी विभागातील मतदान केंद्रांसाठी नेमलेल्या मतदान अधिकारी, कर्मचारी यांचे प्रशिक्षण विष्णुदास भावे नाट्यगृह येथे होणार आहे. तसेच ६ जानेवारी रोजी ऐरोली विभागातील मतदान केंद्रांसाठी नेमलेल्या मतदान अधिकारी, कर्मचारी यांचे प्रशिक्षण सरस्वती विद्यालय, सेवटर-५ ऐरोली या ठिकाणी होणार आहे.
अशाच प्रकारे दुसऱ्या प्रशिक्षण वर्गाचेही ८ जानेवारी ते १२ जानेवारी या कालावधीतील वेळापत्रक निश्चित करण्यात आले आहे. या प्रशिक्षणामध्ये नियुक्त अधिकारी, कर्मचारी यांच्या निवडणूक प्रक्रियेतील जबाबदाऱ्या, मतदान साहित्य तपासणी व वितरण, मतदार यादीचा वापर, मतदाराची ओळख पडताळणी, मॉकपोल प्रक्रिया, मतदान यंत्र सिलींग प्रक्रिया, कायदेशीर बाबी अशा निवडणुकीशी संबंधित विविध बाबींची माहिती देण्यात येणार असून विविध शंकांचे निरसनही केले जाणार आहे. त्याचप्रमाणे ईव्हीएम मशीनची प्रत्यक्ष हाताळणी प्रात्यक्षिकही करुन घेतले जाणार आहे.
प्रशिक्षणास उपस्थित राहणे बंधनकारक; गैरहजरांवर होणार कारवाई...
निवडणूक प्रक्रिया पारदर्शक रितीने पार पाडण्यासाठी आणि कामकाजात कोणतीही त्रुटी राहू नये तसेच गैरप्रकार टाळण्याच्या दृष्टीने सदर प्रशिक्षण वर्गांचे आयोजन करण्यात आले असून प्रशिक्षणाची तारीख, वेळ आणि ठिकाण याची माहिती संबंधित सर्व अधिकारी, कर्मचारी यांना स्वतंत्रपणे कळविण्यात आली आहे. या प्रशिक्षणास उपस्थित राहणे बंधनकारक असून अनुपस्थित राहणाऱ्या आणि आदेशांचे पालन न करणाऱ्या अधिकारी-कर्मचारी यांच्या विरोधात ‘राज्य निवडणूक आयोग'च्या निर्देशानुसार फौजदारी कारवाई करण्यात येईल, असा इशारा आयुक्त डॉ. कैलास शिंदे यांनी दिला आहे.
