जनजागृती सेवा संस्थेच्या वतीने कल्याण येथील आधारवाडी कारागृहातील कैद्यांना वाचनासाठी पुस्तकांची भेट
कल्याणः मोबाईल, पीडीएफ, इलेक्ट्रॉनिक मिडीया, कॉम्प्युटरच्या या युगात वाचन संस्कृती कमी होत चाललेली असताना वाचनाची आवड निर्माण करण्यासाठी, शिक्षा भोगण्यासाठी कारागृहात असणाऱ्या कैद्यांचा वेळ सत्कारणी लागावा म्हणून जनजागृती सेवा संस्थेच्या वतीने कल्याण येथील आधारवाडी कारागृहातील कैद्यांसाठी पुस्तके भेट देण्याचा कार्यक्रम नुकताच संपन्न झाला.
कल्याण आधारवाडी कारागृहाचे उप अधिक्षक यु.पी.पाटील, वरिष्ठ पोलिस निरीक्षक अभिजीत कोळी यांजकडे संस्थेच्या वतीने दिवाळी अंक, प्रवास वर्णन, ललित लेख संग्रह, काव्यसंग्रह, कथा संग्रह अशा विविध प्रकारची पुस्तके सुपूर्द करण्यात आली. याप्रसंगी ज्येष्ठ समाजसेवक अरविंद सुर्वे, महिला उत्कर्ष समिती महाराष्ट्रच्या कार्याध्यक्षा श्रुती उरणकर, मुंबई ॲन्टीपायरसी सेलचे मुख्य तपास अधिकारी रामजित गुप्ता, कल्याण-डोंबिवली महानगरपालिका शिक्षण समितीचे माजी सभापती तसेच बिर्ला कॉलेजचे माजी उप प्राचार्य प्रा.उदय सामंत, सेवा सेवा समाधान ट्रस्टच्या विश्वस्त मानसी मोने, शब्दसुमने साहित्य मंचच्या अध्यक्षा अनिता कळसकर, बहिणाबाई ट्रस्टचे संस्थापक अध्यक्ष सुनिल इंगळे, उत्कर्ष सेवा मंडळाचे सचिव विलास शिंदे आदी मान्यवर उपस्थित होते. संस्थेचे अध्यक्ष गुरुनाथ तिरपणकर यांनी सर्व उपस्थित मान्यवरांचे आभार मानले.
