प्रतिक्षा संपली! गव्हाण फाटा रेल्वे क्रॉसिंग पुल वाहतुकीसाठी खुला
‘शोभायात्रा'मध्ये विकास प्रकल्पांचा चित्ररथ प्रमुख आकर्षण
डोंबिवली : गुढीपाडवा आणि मराठी नववर्षाच्या उत्साहात डोंबिवली शहर रंगून गेले. श्री गणेश मंदिर संस्थान आणि ‘नववर्ष स्वागत यात्रा संयोजन समिती'च्या माध्यमातून दरवर्षीप्रमाणे यंदाही भव्य आणि आकर्षक ‘शोभायात्रा'चे आयोजन करण्यात आले होते. या ‘शोभायात्रा'मध्ये विविध सामाजिक संदेश देणारे चित्ररथ साकारण्यात आले होते. यंदा कल्याण लोकसभा मतदारसंघातील विकासकामांचे दर्शन घडवणारा खास चित्ररथ नागरिकांचे प्रमुख आकर्षण ठरला. खासदार डॉ. श्रीकांत शिंदे यांच्या पुढाकारातून कल्याण लोकसभा मतदारसंघात राबविण्यात येत असलेल्या महत्त्वाकांक्षी विकास प्रकल्पांचे प्रतिबिंब या चित्ररथातून अत्यंत देखण्या पध्दतीने साकारण्यात आले होते.
कल्याण लोकसभा मतदारसंघाच्या सर्वांगीण विकासाची झलक दाखवणारा सदर चित्ररथ पाहण्यासाठी नागरिकांची मोठी गर्दी झाली होती. या चित्ररथामध्ये वाहतूक व्यवस्थेला नवा आयाम देणाऱ्या डबल डेकर मार्ग प्रकल्पाची प्रतिकृती विशेष आकर्षण ठरली. खालच्या स्तरावर रस्ता आणि पलायओव्हर तर वरच्या स्तरावर धावणारी मेट्रो अशी कल्पक मांडणी यात साकारण्यात आली होती. भविष्यातील आधुनिक वाहतूक व्यवस्थेची झलक या प्रतिकृतीतून पाहायला मिळाली.
तसेच खिडकाळी येथील प्राचीन श्री शिव मंदिराची आकर्षक प्रतिकृती देखील साकारण्यात आली होती. या मंदिर परिसराच्या सुशोभिकरणाचा महत्त्वाकांक्षी प्रकल्प सध्या राबविण्यात येत असून धार्मिक आणि पर्यटनदृष्ट्या या परिसराला नवे स्वरुप मिळणार आहे. याचबरोबर उल्हासनगर येथे उभारण्यात आलेल्या सुपर स्पेशलिटी कॅशलेस हॉस्पिटलची प्रतिकृती देखील या चित्ररथात साकारण्यात आली होती. गेल्या २ वर्षांत या रुग्णालयाच्या माध्यमातून हजारो गरजू रुग्णांवर मोफत उपचार करण्यात आले असून, सर्वसामान्यांसाठी आरोग्यसेवेचे ते महत्त्वपूर्ण केंद्र ठरत आहे.
क्रीडा क्षेत्राला चालना देणाऱ्या ह.भ.प. संत सावळाराम महाराज म्हात्रे क्रीडा संकुलाची प्रतिकृती देखील ‘शोभायात्रा'मध्ये उभारण्यात आली होती. ठाणे जिल्हा आणि कल्याण लोकसभा मतदारसंघातील युवकांना जागतिक दर्जाच्या सुविधा उपलब्ध करुन देणारे भव्य क्रीडा संकुल उभारले जात आहे. तसेच बेतवडे येथे उभारण्यात येत असलेल्या ‘आगरी-कोळी वारकरी भवन'ची प्रतिकृती देखील या चित्ररथात साकारण्यात आली. समाजाच्या सांस्कृतिक आणि धार्मिक उपक्रमांसाठी सदर भवन महत्त्वाचे ठरणार असून, त्याचे बांधकाम अंतिम टप्प्यात आले आहे.
गुढीपाडव्याच्या या शुभमुहूर्तावर विकासकामांचे दर्शन घडवणारा चित्ररथ नागरिकांच्या विशेष पसंतीस उतरला. यावेळी खासदार डॉ. श्रीकांत शिंदे यांनी माध्यमांशी संवाद साधत या चित्ररथामागील संकल्पना आणि मतदारसंघात सुरु असलेल्या विविध विकास प्रकल्पांची माहिती दिली.
कल्याण लोकसभा मतदारसंघाचा सर्वांगीण आणि वेगवान विकास घडवून आणण्याच्या दिशेने सुरु असलेल्या कामांची एक झलक असल्याची भावना अनेक नागरिकांनी व्यक्त केली.
