म्हाडा निर्णयाच्या धर्तीवर सिडकोनेही घरांच्या किंमती कमी करण्याचा निर्णय घ्यावा
ठाणे मध्ये ‘पॉड टॅक्सी'चा पायलट प्रकल्प
जागा ताब्यात घेणे, अतिक्रमणे हटवण्याबाबत तातडीने कार्यवाही करण्याचे निर्देश
ठाणे : ठाणे शहरातील वाहतूक कोंडीवर मार्ग काढण्यासाठी भविष्यात स्वयंचलित पॉड टॅक्सी प्रकल्प अनिवार्य ठरणार आहे. त्याचाच एक भाग म्हणून प्रायोगिक तत्त्वावर ठाणे महापालिका क्षेत्रात, घोडबंदर मार्गावरील भाईंदर पाडा मेट्रो स्टेशन ते विहंग हिल्स सर्कल पर्यंत पॉड टॅक्सीचा पायलट प्रोजेक्ट राबवण्यात येणार आहे, अशी माहिती परिवहन मंत्री प्रताप सरनाईक यांनी दिली.
ठाणे महापालिकेच्या क्षेत्रातील विविध विकास कामाचा आढावा घेण्यासाठी ना. प्रताप सरनाईक यांच्या अध्यक्षतेखाली महापालिका मुख्यालयातील कै. अरविंद पेंडसे सभागृहात बैठक झाली. ओवळा-माजिवडा परिसरातील विकास कामे, ‘एमएमआरडीए'च्या माध्यमातून होणारी कामे, पॉड टॅक्सी, तसेच पॉड टॅक्सीसोबत मल्टीमोडल इंटीग्रेशन या विषयांचा आढावा घेण्यात आला. सदर बैठकीस ‘महामेट्रो'चे व्यवस्थापकीय संचालक श्रावण हर्डीकर, महापालिका अतिरिक्त आयुक्त प्रशांत रोडे, नगर अभियंता प्रशांत सोनाग्रा, उपायुक्त जी. जी. गोदेपुरे, शंकर पाटोळे, उपनगर अभियंता विकास ढोले, शुभांगी केसवानी, कार्यकारी अभियंता संजय कदम, आदि उपस्थित होते.
सदर बैठकीमध्ये ठाणे शहरामध्ये महापालिकेच्या माध्यमातून सुरु असलेले जलतरण तलाव, स्मशानभूमी, उद्यान, डॉ. बाबासाहेब आंबेडकर विपश्यना केंद्र, लता मंगेशकर संगीत विद्यालय अशा विविध विकासकामांचा आढावा ना. सरनाईक यांनी घेतला. ज्या प्रकल्पांसाठी जागा ताब्यात घेण्यात येणार आहेत, किंवा अतिक्रमणे हटवायची आहेत, ती कामे १५ मार्च पर्यंत पूर्ण करुन पुढील बैठकीत त्याची माहिती द्यावी, असे निर्देश त्यांनी यावेळी दिले.
अरुंद रस्ते आणि वाढती वाहन संख्या यांचा विचार करता भविष्यात रस्त्यावरील वाहतुकीला मर्यादा येणार आहेत. त्यामुळे रोप-वे, पॉड टॅक्सी यासारख्या हवेतील वाहतूक व्यवस्थेला पर्याय नाही. पंतप्रधान नरेंद्र मोदी यांच्या संकल्पनेतून आणि केंद्रीय रस्ते वाहतूक मंत्री नितीन गडकरी यांच्या मार्गदर्शनाखाली न्युट्रॉन ईव्ही मोबिलीटी प्रा. लि. या कंपनीमार्फत बडोदा येथे चाचणी स्वरुपात स्वयंचलित उन्नत पॉड टॅक्सीचा प्रकल्प राबवला जात आहे. गुजरात दौऱ्यावर असताना या प्रकल्पाला ना. प्रताप सरनाईक यांनी भेट दिली होती.
अशाच प्रकारचा प्रकल्प तत्कालीन मुख्यमंत्री आणि सध्याचे उपमुख्यमंत्री एकनाथ शिंदे यांनी ‘बीकेसी' मध्ये प्रायोगिक तत्वावर राबविण्यास मान्यता दिली आहे. त्याच धर्तीवर मिरा-भाईंदर येथील जे.पी. इन्फ्रास्ट्रक्चर ते शिवाजी महाराज पुतळा आणि ठाणे मधील घोडबंदर मार्गावरील भाईंदर पाडा मेट्रो स्टेशन ते विहंग हिल्स सर्कल दरम्यान स्वयंचलित पॉड टॅक्सीचा पायलट प्रोजेक्ट राबवला जाणार आहे. त्यासाठी महापालिकातर्फे जागा उपलब्ध करून दिली जाणार आहे. या प्रकल्पाचा सर्व खर्च संबंधित संस्था करणार असून त्यामध्ये सरकार अथवा महापालिकेला एक रुपया देखील खर्च करावा लागणार नाही. सदर प्रकल्प यशस्वी झाल्यास भविष्यात ठाणे आणि मिरा-भाईंदर मध्ये ‘मेट्रो'ला संलग्न होईल अशा पध्दतीने विजेवर चालणाऱ्या स्वयंचलित पॉड टॅक्सीचे जाळे निर्माण करणे शक्य होणार आहे.
-ना. प्रताप सरनाईक, परिवहन मंत्री-महाराष्ट्र.
