म्हाडा निर्णयाच्या धर्तीवर सिडकोनेही घरांच्या किंमती कमी करण्याचा निर्णय घ्यावा
तनय लाड याचा जलतरणामध्ये विक्रम
पनवेल : सध्या कामोठे येथे राहणारा १२ वर्षीय तनय तुषार लाड याने गेटवे ऑफ इंडिया ते अटल सेतू असे १७ कि.मी. सागरी अंतर केवळ २ तास २६ मिनिटांत पार करत सर्वात वेगवान जलतरणपटू होण्याचा मान मिळवला आहे. तनय लाड याने अभूतपूर्व जलतरण कामगिरी करुन एक नवा विक्रम प्रस्थापित केला आहे. या कामगिरीबद्दल महापालिका आयुक्त मंगेश चितळे यांच्या हस्ते त्याचा महापालिका मुख्यालयात सत्कार करण्यात आला.
तनय लाड याने २ मार्च २०२५ रोजी सकाळी ८.४६ वाजता गेटवे ऑफ इंडिया येथून अरबी समुद्रात उडी घेतली आणि भरतीचे लहरी प्रवाह, वाऱ्याचा जोर आणि हवामानाच्या स्थितींशी झुंज देत लाटांवरचा खडतर प्रवास ११.१४ वाजता अटल सेतू येथे पूर्ण केला. त्याने एक नवीन विक्रम प्रस्थापित केला.
तनय सध्या न्यू होरायझन पब्लिक स्कूल, पनवेल येथे इयत्ता सहावी मध्ये शिक्षण घेत आहे. याआधी २०२४ मध्ये त्याने थायलंडमध्ये ओशियन मॅन स्पर्धेत कांस्यपदक, संकरॉक ते गेटवे, पेरियार कोची केरळ, विजयदुर्ग, रंकाळा कोल्हापूर येथे रौप्यपदक आणि मालवण, पोरबंदर स्पर्धेत सहभाग घेऊन आपल्या जलतरण कौशल्यांचे शानदार प्रदर्शन केले होते. खुल्या समुद्रात स्विमिंग अत्यंत कठीण आणि धाडसी क्रीडा प्रकार आहे.
तनय लाड यांच्या यशात आई-वडिलांच्या मार्गदर्शनाबरोबरच प्रशिक्षकांचा मोलाचा सहभाग लाभला आहे. पलावा येथील प्रसिध्द जलतरणपटू रुपाली रेपाळे आणि अनिरुध्द महाडिक यांच्या मार्गदर्शनाखाली तनय प्रशिक्षण घेत आहे. तनयच्या या विक्रमी कामगिरीमुळे त्याच्यावर शुभेच्छांचा वर्षाव होत असून त्याच्या कुटुंबीयांबरोबरच प्रशिक्षक, मित्र मंडळी आणि संपूर्ण शाळेतील शिक्षक-विद्यार्थ्यांमध्ये आनंदाचे वातावरण आहे.
