एपीएमसी मार्केट मध्ये अनधिकृत व्यापार
वाशी : ‘मुबंई कृषि उत्पन्न बाजार समिती'चे (एपीएमसी) सभापती प्रभू पाटील यांनी पदभार स्वीकारल्यापासून बाजार समिती प्रशासनाच्या उत्पन्न वाढीसाठी धडाकेबाज कारवाई सुरु केली आहे. ‘एपीएमसी'चे सभापती प्रभू पाटील यांनी सर्वप्रथम दक्षता पथकामध्ये फेरबदल करुन एक नवीन दक्षता पथक तयार केले आहे. या दक्षता पथकाने मागील १० दिवसांमध्ये ‘बाजार समिती'ची बाजार फी न भरता एपीएमसी मार्केट मध्ये मोठ्या प्रमाणात शेतमाल अनधिकृतपणे आयात करणाऱ्या आयातदारांवर कारवाई करुन११ लाख रुपये दंड वसूल केला आहे.
एपीएमसी मार्केट मध्ये अनधिकृपणे व्यापार करणारे आयातदार ‘बाजार समिती'च्या विना अनुज्ञप्ती शिवाय व्यवसाय करत होते. या आयातदारांच्या आणि व्यापाऱ्यांच्या ‘बाजार समिती'ची बाजार फी बुडवणाऱ्या गाड्या दक्षता पथकाकडून पकडण्याची सुरुवात ‘एपीएमसी'चे सभापती प्रभू पाटील यांनी केली आहे. या गाड्यांमध्ये मोठ्या कंटेनरचा समावेश आहे. या मालाची किंमत जवळपास ६ कोटींच्या घरात आहे. दक्षता पथकाने पकडकेल्या वाहनांमध्ये वेलची, लवंग, बासमती तांदूळ, चवळी, सूर्यफूल, नाचणी आणि राजमा या अन्न पदार्थांचा समावेश असून, या वाहन चालकांकडून आतापर्यंत जवळपास ११ लाखाची दंड वसुली करण्यात आली आहे. यामुळे ‘बाजार समिती'च्या विनापरवानगीने मालाची आयात, निर्यात आणि किरकोळ व्यवसाय करणाऱ्या व्यापाऱ्यांमध्ये या दक्षता पथकाची दहशत निर्माण झाली आहे. दक्षता पथकाची कारवाई आपल्यावर कधीही होवू शकते, अशी भीती व्यापाऱ्यांमध्ये निर्माण झाली आहे. त्यामुळे एपीएमसी मार्केट मध्ये शेतमाल अनधिकृतपणे आयात करणाऱ्या आयातदारांचे द्याबे दणाणले आहेत.
‘एपीएमसी'चे सभापती प्रभू पाटील यांनी तयार केलेल्या नवीन दक्षता पथकामध्ये ‘मुंबई कृषि उत्पन्न बाजार समिती'चे सचिव पी. एल. खंडागळे यांच्या मार्गदर्शनाखाली उप सचिव महेश साळुंके पाटील, अनंत पारदुले, संजय खांडेकर, अजित नारंगकर, विनीत उबाळे यांचा समावेश आहे.
दरम्यान, एपीएमसी मार्केट मधील व्यापाऱ्यांनी अनधिकृतपणे व्यापार, आयात आणि निर्यात करण्यापेक्षा ‘बाजार समिती'ची अनुज्ञप्ती घेवून व्यापार करावा, असे आवाहन ‘एपीएमसी'चे सभापती प्रभू पाटील यांनी केले आहे .
