चंद्रशेखर सोमण यांच्या पाठपुराव्याला यश; अमरधाम स्मशानभूमी सफाईला सुरुवात
पनवेल : पनवेल येथील मुंबई-पुणे हायवे लगत असलेल्या मुख्य अमरधाम स्मशानभूमीची प्रचंड दुरवस्था झाली होती. २ खाजगी कंत्राटदारांतर्फे व्यवस्थापन करण्यात येत असलेल्या या स्मशानभूमीतील दुरावस्थेचे कथन करणारे निवेदन शिवसेना स्थानिक नेते चंद्रशेखर सोमण यांच्या नेतृत्वाखालील शिष्टमंडळाने महापालिका आयुक्त मंगेश चितळे यांना फोटो पुराव्यासहित दिले होते. अमरधाम स्मशानभूमीतील पिण्याचे पाणी, आसन व्यवस्था,शववाहिन्यांची अंतर्गत दुरवस्था, अपुरी प्रकाश व्यवस्था, बंद पडलेले इन्व्हर्टर, लहान मुलांची दफनभूमी, आदिंविषयी त्यांनी आयुक्तांचे लक्ष वेधले होते.
चंद्रशेखर सोमण यांच्या नेतृत्वाखाली उपमहानगर प्रमुख महेश सावंत, शिवसेना शहरप्रमुख प्रसाद सोनावणे, शहर संघटक अभिजीत साखरे, उपशहर संघटक सिध्देश खानविलकर, खंडेश धनावडे, सुजन मुसलोंडकर, माजी नगरसेवक अनिलकुमार कुलकर्णी आदिंनी आयुक्त चितळे यांच्याशी तपशिलवार चर्चा करून सदर स्मशानभूमी इतरत्र स्थलांतरीत होणार असल्याच्या ऐकीव चर्चेवर ठोस भूमिका घेऊन स्थलांतरणाला विरोध केला आहे. तेथील सर्व गैरसोयी दूर करण्या सोबतच २४ तास सुरक्षा रक्षक ठेवण्याची मागणी केली होती.
सदरचे निवेदन देऊन महिना उलटला तरी काही हालचाल न झाल्यामुळे चंद्रशेखर सोमण यांनी पुनश्च एकदा महापालिका प्रशासनास स्मरणपत्र पाठवून तात्काळ कार्यवाहीची सूचना केली होती. त्यानंतर लगेचच आयुक्त मंगेश चितळे यांनी सदर विषय गांभीर्याने घेत संबंधित विभागाकडून अमरधाम स्मशानभूमीच्या स्वच्छतेेला ताबडतोब सुरुवात करून तसे फोटो शिवसेना शिष्टमंडळाला पाठवले. त्याचबरोबरच महापालिका हद्दीतील सर्वच प्रमुख स्मशानभूमींची महिन्यातून २ वेळा स्वच्छता करण्यात येईल, असे आश्वासन देतानाच इतर पायाभूत सुविधांसाठी सुध्दा तातडीने कार्यवाही करण्याचे आदेशही देण्यात आले आहेत.
