कुंडेवहाळ येथील बोगदा खोदण्याचा महत्वपुर्ण टप्पा पूर्ण
पनवेल : एक्सप्रेस फ्रेट रेल्वे कॉन्सोर्टियम प्रकल्पांतर्गत वैतरणा ते जेएनपीटी मार्गावरील कुंडेवहाळ येथील बोगदा खोदण्याचा महत्वपुर्ण टप्पा पार पडला असून, बोगद्यातील सर्व लाईन टाकण्याचे आणि इतर काम लवकरच पूर्ण होणार आहे, अशी माहिती ‘डेडिकेटेड फ्रेट कॉरिडॉर कॉर्पोरेशन ऑफ इंडिया लिमिटेड'चे एमडी प्रवीण कुमार यांनी कुंडेवहाळ येथे बोगद्याच्या ब्रेक थ्रू सोहळ्यात दिली.
कुंडेवहाळ येथील बोगदा वेस्टर्न डेडिकेटेड फ्रेट कॉरिडॉर प्रकल्पातील जेएनपीटी-वैतरणा सेक्शनमधील एक महत्वाचा भाग आहे. ‘वेस्टर्न डेडिकेटेड फ्रेट कॉरिडॉर प्रकल्प' उरण येथील जवाहरलाल नेहरु पोर्ट ट्रस्ट ते वैतरणा पर्यंत सुमारे १०२ किलोमीटर लांबीचा आहे. ‘वेस्टर्न डेडिकेटेड फ्रेट कॉरिडॉर' मार्ग भारतातील उत्तरी भागाशी मालवाहतुकीचे दळणवळण सुधारण्यासाठी महत्वाचा मानला जातो. या मार्गामुळे जेएनपीटी आणि भारताच्या उत्तरी प्रदेशातील मालवाहतुकीत मोठी सुधारणा होणार आहे. वाहतुकीचा वेग वाढून लॉजिस्टिक्स खर्चात बचत होणार आहे. याशिवाय पायाभूत सुविधा अधिक मजबूत होणार असून, ‘वेस्टर्न डेडिकेटेड फ्रेट कॉरिडॉर मार्ग' उद्योग आणि व्यापारासाठी उपयुक्त ठरणार आहे. ‘वेस्टर्न डेडिकेटेड फ्रेट कॉरिडॉर' प्रकल्प पूर्ण झाल्यानंतर भारत देशातील मालवाहतुकीच्या नेटवर्कमध्ये माठी आश्वासक भर पडणार आहे, असे प्रवीण कुमार यांनी सांगितले.
वैतरणा ते जेएनपीटी दरम्यान १०२ किलोमीटर अंतराचा ‘वेस्टर्न डेडिकेटेड फ्रेट कॉरिडॉर' प्रकल्प आहे. टाटा प्रोजेक्ट लिमीटेड कंपनी या प्रकल्पाचे काम करत असून, सबकॉन्ट्रॅक्टर म्हणून ठाकूर इन्फ्राप्रोजेक्ट प्रायव्हेट लिमिटेड अर्थात टीआयपीएल या प्रकल्पाचे काम करत आहे. त्या अनुषंगाने या प्रकल्पातील महत्वपूर्ण असलेल्या कुंडेवहाळ येथील १६९ मीटर लांबीचा बोगदा खोदण्याचे काम पुर्ण झाले आहे. त्यापार्श्वभुमीवर २६ मार्च रोजी कुंडेवहाळ येथे ‘टनेल ब्रेक थू्र' सोहळा पार पडला. यावेळी प्रवीण कुमार यांनी बटन दाबून या बोगद्याचे काम पूर्ण झाल्याचे जाहीर केले. यावेळी ‘डेडिकेटेड फ्रेट कॉरिडॉर कॉर्पोरेशन ऑफ इंडिया लिमिटेड'चे चीफ जनरल मॅनेजर परमजीत सिंग, ‘टाटा प्रोजेक्ट लिमीटेड'चे उप्पलपती व्यंकट कुमार, राजकुमार शर्मा, साहिल शर्मा, पनवेल महापालिकेचे माजी सभागृह नेते परेश ठाकूर, डायरेक्टर एम.पी. त्यागी, महादेव यादव, प्रकाश पाटील, यल्लालिंग दिगी, कपील कड यांच्यासह अधिकारी उपस्थित होते.
‘वेस्टर्न डेडिकेटेड फ्रेट कॉरिडॉर' प्रकल्पामुळे मालवाहतूक वेगाने होणार असून, नॅशनल लॉजिस्टिक कॉस्ट कमी होणार आहे. त्यामुळे वाहतूकदारांचा वेळ आणि पैशाची बचत होणार आहे. टाटा प्रोजेक्ट लिमीटेड कंपनीकडे ‘वेस्टर्न डेडिकेटेड फ्रेट कॉरिडॉर' या प्रकल्पाचे काम असून टीआयपीएल सब कॉन्ट्रॅक्टर म्हणून योग्य वेगाने प्रकल्पाचे काम पुर्ण करत आहे. ‘वेस्टर्न डेडिकेटेड फ्रेट कॉरिडॉर' प्रकल्पाचा महाराष्ट्रातील अर्थव्यवस्थेला मोठ्या प्रमाणात फायदा होणार आहे. तसेच पनवेल आणि उरण मध्ये ‘वेस्टर्न डेडिकेटेड फ्रेट कॉरिडॉर' प्रकल्प होत असल्याने या प्रकल्पाचा फायदा पनवेल, उरण परिसरातील नागरीकांना नक्कीच होणार आहे, असे परेश ठाकूर यांनी यावेळी अधोरेखित केले.
