कल्याणकर नागरिक-क्रीडाप्रेमींचा कपील पाटील यांना घेराव
कल्याण : कल्याण मधील सुभाष मैदानात होऊ घातलेल्या इनडोअर स्टेडियमला कल्याणकर नागरिक आणि क्रीडाप्रेमींचा विरोध कायम असून २९ जानेवारी रोजी या ठिकाणी आलेल्या माजी केंद्रीय मंत्री कपिल पाटील यांना या नागरिकांनी आणि खेळाडुंनी घेराव घालत विरोध दर्शविला. सुभाष मैदानातील एक इंच देखील जागा इनडोअर स्टेडियमसाठी घेऊन देणार नाही, असा पवित्रा आंदोलनकर्त्या नागरिकांनी घेतला. त्यावर सदर मैदानाला लागून असेलल्या नक्षत्र उद्यानात स्टेडियम उभारण्याचा आरखडा तयार करुन तो नागरिक आणि क्रीडाप्रेमींना दाखवूनच काम सुरु करण्याचे आश्वासन कपिल पाटील यांनी यावेळी दिले.
यावेळी माजी आमदार नरेंद्र पवार, ‘मनसे'चे माजी आमदार प्रकाश भोईर, मनसे जिल्हाध्यक्ष उल्हास भोईर, सामाजिक कार्यकर्ते श्रीनिवास घाणेकर, मनसे शाखा अध्यक्ष संदीप पंडित, क्रीडाप्रेमी समीर खान, अझर काझी, सुधाकर शेट्टी, प्रशांत माळी यांच्यासह महापालिका अधिकारी, इतर राजकीय पदाधिकारी, कार्यकर्ते आणि कल्याणकर नागरिक उपस्थित होते.
महापालिकेच्या शेजारी असलेले सुभाष मैदान, याबाबतीत जनतेने आणि क्रीडाप्रेमींनी सदर मैदान देण्यासाठी महापालिकेने कोणतेही टेंडर काढू नये आणि बांधकाम करू नये याकरिता आंदोलन करण्यात आले. महापालिकेकडे मैदानाची मालकी नाही अशी माहिती सामाजिक कार्यकर्ते श्रीनिवास घाणेकर यांनी उघडकीस आणली असून जर माहिती खरी असेल तर महापालिकेने केंद्र शासनाची दिशाभूल करुन निधी प्राप्त केल्याचा आरोप घाणेकर यांनी केला आहे. तर सुभाष मैदान वाचविण्यासाठी उद्या ३१ जानेवारी रोजी सुभाष मैदान ते महापालिका मुख्यालय असा मोर्चा आयोजित केला आहे. त्यासही क्रीडाप्रेमी कल्याण-डोंबिवलीकर नागरिकांनी उपस्थित राहण्याचे आवाहन घाणेकर यांनी केले आहे.
दरम्यान, सदर आंदोलनावेळी माजी मंत्री कपिल पाटील यांनी नागरिक आणि क्रीडाप्रेमी यांच्या या प्रकल्पास हरकती काय आहेत? याची माहिती समजून घेतली. शहर अभियंता अनिता परदेशी यांना ‘सुभाष मैदान बचाव समिती'च्या मागणीनुसार मैदानात कोणतेही बांधकाम न करता मैदानाच्या बाहेर काही बांधकाम करता येते का? याचा डीपीआर नव्याने बनवायला सांगितला आहे. तशा लेखी सूचना सुध्दा महापालिका अधिकाऱ्यांना देण्यात आल्या आहेत. नवीन प्लॅन बनेपर्यंत सद्यस्थितीत मैदान राहणार आहे.
